អភិបាលរងស្រុក លោក សំ ម៉ុក មានប្រសាសន៍ឲ្យដឹងថា ប្រមាណជិត១ខែកន្លងទៅនេះអ្នកភូមិមួយចំនួនត្រូវរ៉ូវជាមួយឈ្មួញឆ្លងទន្លេសេសានចូលទៅកាន់តំបន់ឧទ្យាន ហើយអារច្រៀកឈើគ្រញូងដោយម៉ាស៊ីនស្វ័យប្រវត្តិតូចៗ និងដឹកជញ្ជូនចេញពីព្រៃបន្តិចម្ដងៗមកលាក់ទុកក្បែរច្រាំងទន្លេដើម្បីលក់ឲ្យឈ្មួញដែលភាគច្រើនជាបុគ្គលមានតួនាទីក្នុងមូលដ្ឋាន។
លោក សំ ម៉ុក បានឲ្យដឹងថា ៖ «ឃើញមានការដឹកឈើចេញពេលយប់ព្រលប់អី តាមកូនរថយន្តតូចៗ ហើយមួយចំនួនទៀតដឹកតាមទឹកចុះទៅស្រុកវើនសៃ តែមិនដឹងថាទៅដល់ណាអីកន្លែងណាព្រោះគេទៅតែយប់ៗ។ គេមានគណៈកម្មការចម្រុះគេទប់ស្កាត់ដែរ ប៉ុន្តែមិនដឹងទប់របៀបម៉េច បើនៅតែរបៀបហ្នឹងឧទ្យានវាអាចមានបញ្ហាទៅមុខទៀតហើយ»។
ស្រុកតាវែងបើតាមប្រជាសហគមន៍ធ្លាប់បានរាយការណ៍ដែរថា កាលពីឆ្នាំ ២០០៧-២០០៨ សកម្មភាពកាប់ឈើប្រណីតមានបេង នាងនួន កើតមានជាច្រើនករណីនៅក្នុងព្រៃដែលអ្នកភូមិអភិរក្ស ក៏ប៉ុន្តែតំបន់ឧទ្យានជាតិក្រៅពីសកម្មភាពលួចប្រមាញ់សត្វព្រៃ ពុំមានព័ត៌មានថាមានការលួចកាប់ឈើនៅទីនោះទេ។
ផ្ទុយពីនេះស្រុកវើនសៃដែលមានព្រំប្រទល់ជាប់នឹងស្រុកតាវែងនិងតំបន់ឧទ្យានជាតិដូចគ្នា បើតាមអ្នកភូមិរាយការណ៍ថា ឈើគ្រញូងត្រូវបានគេលួចកាប់នៅតំបន់ទ្រនាប់នៃឧទ្យានជាតិនាតំបន់នោះ។
វិទ្យុអាស៊ីសេរីមិនអាចសុំកិច្ចអធិប្បាយជុំវិញរបាយការណ៍ខាងលើពីប្រធានផ្នែកការពារឧទ្យានជាតិវីរជ័យ លោក កៃ ផេង បានទេ ដោយលោកមិនទទួលទូរស័ព្ទ ក៏ប៉ុន្តែនាយកឧទ្យានជាតិនិងជាប្រធានមន្ទីរបរិស្ថានខេត្តរតនគិរី លោក ជូ សុភក្ដិ បដិសេធថាលោកមិនមានរបាយការណ៍ណាមួយដែលថា មានការកាប់ឈើដូចសេចក្ដីរាយការណ៍នោះឡើយ។ យ៉ាងនេះក្ដីលោកអះអាងថា នឹងស្រាវជ្រាវរបាយការណ៍ខាងលើនេះ។
លោក ជូ សុភក្ដិ បានមានប្រសាសន៍ថា ៖ «អត់មានអ្នកណាចុះទៅកាប់ទេ គេមានតែក្រុមហ៊ុនត្រូវច្បាប់គេ ១-២ចូលទៅសិក្សា។ ចាំមើលខ្ញុំឆែកមើលមើល៍ ខ្ញុំដូចមិនទាន់បានទទួលរបាយការណ៍ហ្នឹង»។
បើតាមមន្រ្តីស៊ើបអង្កេតសមាគមអាដហុកខេត្តរតនគិរី លោក ប៉ែន ប៊ុណ្ណារ៍ មានប្រសាសន៍ថា លោកក៏ទទួលបានព័ត៌មានខាងលើដូចគ្នា។ ហើយបើតាមស្ថិតិដែលអង្គការលោកទទួលបាន មូលដ្ឋាននេះមានរណារយន្តកាត់ឈើរហូតដល់ទៅ៥០គ្រឿងឯណោះ។
លោក ប៉ែន ប៊ុណ្ណារ៍ បានបញ្ជាក់ថា ៖ «ការធ្វើអាជីវកម្មឈើប្រណីតវាកើតយូរហើយ ប៉ុន្តែយើងឃើញថាស្រាកប៉ុន្មានខែ វិនាសកម្មនៃការកាប់បំផ្លាញព្រៃឈើ ព្រោះគេទិញរណារយន្តដើម្បីកាប់អាររំលំដើមឈើហ្នឹងហើយ»។
ប្រមុខរាជរដ្ឋាភិបាលកម្ពុជា លោក ហ៊ុន សែន កាលពីឆ្នាំ២០០៦ បានចេញបទបញ្ជាឲ្យប្រមូលរណារយន្តកាត់ឈើដុតកម្ទេចចោលជាវិធានការទប់ស្កាត់សកម្មភាពលួចកាត់ឈើអនាធិបតេយ្យ ក៏ប៉ុន្តែបើតាមរបាយការណ៍ក្នុងកិច្ចប្រជុំខែធ្នូ ឆ្នាំ២០០៦ របស់អាជ្ញាធរខេត្ត បានបង្ហាញស្ថិតិរណារយន្តត្រង់ស៊ីន័រមានរហូតដល់១៤៤៣គ្រឿង ហើយការអនុវត្តបទបញ្ជាខាងលើមិនមានប្រសិទ្ធភាពអ្វីឡើយ។ ជាក់ស្ដែងឈើប្រណីតគ្រប់ប្រភេទត្រូវបានគេកាត់រាល់ថ្ងៃនាំចូលរោងសិប្បកម្មប្រមាណ៤០ទីតាំងនៅក្នុងខេត្តនេះ។
គួរបញ្ជាក់ដែរថា នៅស្រុកសៀមប៉ាង ខេត្តស្ទឹងត្រែង ក៏មានសេចក្ដីរាយការណ៍ថា ព្រៃឈើក្នុងឧទ្យានជាតិក៏ត្រូវគេកាប់ធ្វើអាជីវកម្មកាលពីខែកញ្ញាថ្មីៗនេះ ក៏ប៉ុន្តែទំហំនៃការខូចខាតមិនត្រូវបានមន្រ្តីពាក់ព័ន្ធបញ្ចេញឲ្យដឹងឡើយ៕