មន្ត្រីស៊ើបអង្កេត លោក ប៉ែន ប៊ុណ្ណារ៍ បញ្ជាក់ថា នេះគឺជាឧក្រិដ្ឋកម្មព្រៃឈើថ្មីមួយទៀតដែលបានរកឃើញ កាលពីថ្ងៃចន្ទដើមសប្តាហ៍នេះ ហើយសមាគមអាដហុកអំពាវនាវឲ្យមានការស៊ើបអង្កេត បន្ទាន់មួយទៅកាន់ទីនោះ ៖ «យើងនឹងដាក់ពាក្យបណ្ដឹង ប្ដឹងមន្រ្តីរដ្ឋបាលព្រៃឈើ ទទួលខុសត្រូវក្នុងតំបន់ហ្នឹង»។
កាលពីថ្ងៃចន្ទ កន្លងទៅនេះ ក្រុមសមត្ថកិច្ចចម្រុះដឹកនាំដោយព្រះរាជអាជ្ញារងតុលាការខេត្ររតនគិរីបានចុះធ្វើការត្រួតពិនិត្យនៅទីតាំងក្រុមហ៊ុន ឌីអឹម ហ្រ្គូប មានទីតាំងនៅភូមិប៉ាតាង ស្រុកលំផាត់ ទីដែលប្រជាសហគមន៍បានរាយការណ៍ថា ក្រុមហ៊ុនបានបំពានរំលោភឈូសឆាយដីធ្លីចម្ការវិលជុំអ្នកភូមិ តំបន់ព្រៃឈើ ហើយបានធ្វើសកម្មភាពកាប់ឈើប្រណីតក្នុងព្រៃនិងបង្កើតរោងអារច្រៀកឈើលួចលាក់ខុសច្បាប់ក្នុងការដ្ឋានក្រុមហ៊ុនប្រមាណជិតមួយឆ្នាំកន្លងទៅនេះ។
ព្រះរាជអាជ្ញារង លោក រស់ សារាំ ឲ្យដឹងថា ការត្រួតពិនិត្យធ្វើឡើងបានតែមួយទីតាំងនៅចំណុចព្រំដីនៃការដ្ឋានក្រុមហ៊ុនខាងលើឃើញមានម៉ាស៊ីនច្រៀកឈើមួយនិងគំនរឈើបេងដែលអារជាក្តារបន្ទះ ឬជាឈើជ្រុងប្រមាណ ២ម៉ែត្រគូបបន្សល់នៅទីនោះ។
យ៉ាងនេះក្តី ប្រជាសហគមន៍និងក្រុមមន្ត្រីអាដហុកដែលបានធ្វើដំណើរចូលព្រៃដែលមានទីតាំងជាប់ខាងជើងការដ្ឋានក្រុមហ៊ុនចម្ងាយប្រមាណ ៤គីឡូម៉ែត្ររាយការណ៍ថា ៖ «មានគ្នា ៤នាក់ ទៅដល់ជ្រោះមួយ ខ្ញុំបានឃើញឈើគេរំលំធំៗណាស់ ឃើញមានផ្ទះមួយគេទើបធ្វើ ប៉ុន្តែបើតាមសហគមន៍ រាយការណ៍ថា កន្លែងហ្នឹងអាចជាទីស្តុកឈើ។ ... ម្យ៉ាងទៀត ខ្ញុំឃើញបេងច្រើនណាស់ ៦០ដើមឯណោះ នៅលើដីនេះ»។
តំណាងប្រជាសហគមន៍លោក យ៉ាវ ថន មានប្រសាសន៍បញ្ជាក់បន្ថែម ៖ «ដឹក ជួនណាយប់ ជួនណាព្រឹកក៏មាន អារជួនណាម៉ាស៊ីនពីរគ្រឿងក៏មាន ដឹកមក យកមកអារហ្នឹង»។
តំណាងក្រុមហ៊ុន ឌីអឹម ហ្រ្គូប លោក គង់ ងីម ទទួលស្គាល់ថា រោងម៉ាស៊ីនច្រៀកឈើដែលសមត្ថកិច្ចរកឃើញគឺជារបស់លោក ហើយឈើបេងដែលអារច្រៀកនោះគឺជាឈើចាស់ដែលសេសសល់ក្នុងចម្ការ។
លោកបដិសេធថា មិនជាប់ពាក់ព័ន្ធនឹងការដ្ឋានកាប់ឈើក្នុងព្រៃក្រោយក្រុមហ៊ុននោះឡើយ ៖ «យកឡានដឹកទាំងយប់ ទាំងថ្ងៃអី មិនមែនទេ កូនកៅស៊ូ ៤០ម៉ឺនកូន។ ការឈូសឆាយទៅលើព្រៃរដ្ឋអី ខ្ញុំអត់ដឹងទេ ដឹងតែការទិញពីពលរដ្ឋបានប៉ុណ្ណា ឈូសឆាយហ្នឹងធ្វើ ស្រាប់តែឥឡូវ មានអ្នកផ្សេងមកថា ជាដីរបស់គេដែរ ខ្ញុំអត់ដឹង។ ស្រាប់ពេលនេះ មកដាំកៅស៊ូ គេដកកៅស៊ូចោល»។
ប្រធានផ្នែកនៃខណ្ឌរដ្ឋបាលព្រៃឈើខេត្តរតនគិរី ទទួកបន្ទុកស្រុកលំផាត់ លោក ឡេង យុ បញ្ជាក់ថា លោកមិនបានដឹងរឿងនេះទេ ហើយអះអាងថា នឹងចុះពិនិត្យរបាយការណ៍នេះ។
យ៉ាងនេះក្ដី មន្រ្តីឃ្លាំមើលសិទ្ធិមនុស្សអាដហុក រាយការណ៍ថា ក្រុមហ៊ុន ឌីអឹម ហ្រ្គូប កន្លងទៅធ្លាប់ប្រើប្រាស់មន្ត្រីកងអង្គរក្សលោកនាយករដ្ឋមន្ត្រី មានអាវុធគំរាមកំហែងប្រឆាំងប្រជាសហគមន៍។ ហើយបច្ចុប្បន្ន នៅក្នុងការដ្ឋានក្រុមហ៊ុនមានបន្សល់គ្រឿងចក្រឈូសឆាយធំៗ ប្រភេទប៊ុលដូហ្ស័រ ត្រាក់ទ័រនិងរថយន្តរ៉េវ ស្ទូចឈើសរុបជិត ១០គ្រឿង៕