ប្រជាពលរដ្ឋមួយក្រុមដែលរស់នៅតំបន់ជួរភ្នំក្រវាញបានបង្ហើបឲ្យវិទ្យុអាស៊ីសេរីដឹងថា ក្រុមអភិរក្សព្រៃឈើតំបន់ភ្នំក្រវាញ ភាសាអ្នកស្រុកហៅថា ក្រុម CI (Conservation International) ជាអ្នកនៅពីក្រោយការកាប់ព្រៃឈើដោយខុសច្បាប់នេះ។
ឈើប្រណីតប្រភេទគ្រញូង បេង នាងនួននិងធ្នង់រាប់សិបរទេះក្នុងមួយថ្ងៃត្រូវបានគេកាប់ដឹកយកមកលក់ឲ្យក្រុមអភិរក្សតំបន់ព្រៃការពារជួរភ្នំក្រវាញកណ្តាល ដែលមានទីស្នាក់ការនៅភូមិវាល ឃុំរកាត ស្រុកភ្នំក្រវាញ និងស្នាក់ការមួយទៀតនៅភូមិរវៀង តំបន់អូរលាក់មាស ក្នុងស្រុកវាលវែង ខេត្តពោធិ៍សាត់។
ប្រភពបានឲ្យដឹងថា នៅប៉ែកខាងស្រុកវាលវែង ក្នុងឃុំទួលក្រួស ក៏មានសកម្មភាពដូចគ្នានេះដែរ ពោលគឺជារៀងរាល់ថ្ងៃមានរទេះក្របីរាប់សិបដឹកឈើយកមកលក់ឲ្យក្រុមស៊ី.អាយ។
អ្នកដឹកឈើម្នាក់បានប្រាប់វិទ្យុអាស៊ីសេរីថា គាត់ស៊ីឈ្នួលដឹកពីក្នុងព្រៃយកមកដល់ទីស្នាក់ការស៊ី.អាយ ក្នុងមួយរទេះដែលមានចំណុះជិតមួយគូបឈើនេះក្នុងតម្លៃមួយលានរៀល។ ប្រភពក៏បានឲ្យដឹងដែរថា ការកាប់ព្រៃឈើដោយមិនមានច្បាប់អនុញ្ញាតនេះស្ថាប័នមានសមត្ថកិច្ចនានាក្នុងខេត្តបានដឹងទាំងអស់តែគេធ្វើជាមិនដឹង។
មិនអាចទាក់ទងសុំការបំភ្លឺពីនាយខណ្ឌរដ្ឋបាលព្រៃឈើខេត្តគឺលោក គឹម ចន្ថា បានទេនៅល្ងាចថ្ងៃទី២៤ មករានេះ។ រីឯមន្ត្រីជាន់ខ្ពស់នៃកម្មវិធីអភិរក្សតំបន់ព្រៃការពារជួរភ្នំក្រវាញ ឬហៅកាត់ថាអង្គការស៊ី.អាយ គឺលោក អ៊ុក គឹមសាន បានបដិសេធការចោទប្រកាន់របស់ប្រជាពលរដ្ឋ។ លោកមានប្រសាសន៍ថា ពុំមានរឿងដូច្នេះទេ អាចមានជនខិលខូចយកឈ្មោះអង្គការស៊ី.អាយ ប្រើដើម្បីបិទបាំងសកម្មភាពល្មើសច្បាប់របស់ពួកគេ។
ប្រជាពលរដ្ឋនិយាយថា ការកាប់ឈើខុសច្បាប់នៅក្នុងខេត្តពោធិ៍សាត់ បច្ចុប្បន្នបានកើតមានដោយសារមានការប្រកាសទិញពីក្រុមហ៊ុនមួយដែលទទួលបន្ទុកកសាងវារីអគ្គិសនីតំបន់ស្ទឹងអាតៃ នៃព្រំដែនខេត្តពោធិ៍សាត់និងខេត្តកោះកុង៕