តំណាងសហគមន៍សុំមិនឲ្យបញ្ចេញឈ្មោះមានប្រសាសន៍ថា ក្រុមសហគមន៍ដែលដើរល្បាតក្នុងព្រៃកាលពីថ្ងៃទី១៧ ខែកុម្ភៈ ឆ្នាំ២០១០ ប្រទះឃើញកម្មករច្រើននាក់កំពុងកាប់រំលំដើមឈើ និងព្រៃផ្នែកខាងក្រោមដើម្បីរានយកដី ហើយកម្មករមួយចំនួនទៀតមានម៉ាស៊ីនអារច្រៀកយកឈើមានតម្លៃនៅតំបន់ព្រៃស្រែទេស ជាប់មាត់អូរប៉ាប ចម្ងាយប្រមាណ១២គីឡូម៉ែត្រពីភូមិស្រែខ្ទុំ។
តំណាងសហគមន៍ដដែលបានបញ្ជាក់ថា ៖ «មានការប៉ះពាល់ដ៏ខ្លាំង ទី១ សំខាន់រឿងព្រៃបម្រុងទុក ហើយទី២ ជាព្រៃតម អត្តសញ្ញាណជនជាតិដើមភាគតិចព្នង។ កំពុងតែធ្វើរបាយការណ៍ ហើយបញ្ជូនទៅអង្គការអាដហុកឲ្យជួយ»។
ប្រភពឲ្យដឹងថា កម្មករកំពុងកាប់រានព្រៃនិយាយប្រាប់ក្រុមសហគមន៍ឲ្យដឹងថា អ្នកដែលជួលពួកគេឲ្យកាប់រានព្រៃនោះគឺជាអធិការរងប៉ូលិសឈ្មោះ ឈៀត ក៏ប៉ុន្តែកម្មករមិនបានដឹងថា លោក ឈៀត មានត្រកូលអ្វី ធ្វើការជាប៉ូលិសស្រុកកែវសីមា ឬយ៉ាងណាទេ។
វិទ្យុអាស៊ីសេរីមិនអាចទាក់ទងឈ្មោះ ឈៀត ដើម្បីបញ្ជាក់បញ្ហានេះបានទេ ក៏ប៉ុន្តែអធិការរងប៉ូលិសស្រុកកែវសីមា លោក ហេង អ៊ួង មានប្រសាសន៍ថា ឈ្មោះ ឈៀត មិនមែនជាមន្ត្រីប៉ូលិសស្រុកកែវសីមានោះទេ ក៏ប៉ុន្តែជាអធិការប៉ូលិសស្រុកអូររាំង ហើយលោកមិនបានដឹងពីការកាប់រានព្រៃឈើនោះទេ៖ «នៅខាងខ្ញុំមិនមែនទេ! ឈ្មោះហ្នឹង រងនៅអូររាំងទេ!»។
មេឃុំស្រែខ្ទុំ លោក ឈៀក ឈឹង មានប្រសាសន៍ដែរថា នេះគឺជាការទន្ទ្រានទៅលើព្រៃឈើទ្រព្យសម្បត្តិសាធារណៈរបស់រដ្ឋ។ លោកបញ្ជាក់ថា គឺជាការចូលទៅកាប់រានព្រៃដើម្បីកាន់កាប់ដីរដ្ឋខុសច្បាប់។
លោក ឈៀក ឈឹង បានឲ្យដឹងថា ៖ «ចេះតែចូលកាន់កាប់ដីរដ្ឋខុសច្បាប់ ហើយដល់ពេលរដ្ឋត្រូវការអី ចលាចលទៀតហើយ!»។
មន្ត្រីផ្នែកអង្កេតសមាគមអាដហុក ខេត្តមណ្ឌលគិរី លោក ឆាយ ធី មានប្រសាសន៍ថា ក្រុមសហគមន៍បានផ្តល់របាយការណ៍ពីការរកឃើញករណីកាប់រានព្រៃមកការិយាល័យសមាគមអាដហុកខេត្ត ដើម្បីជួយអន្តរាគមន៍ហើយនៅថ្ងៃច័ន្ទដើមសប្តាហ៍នេះ។
លោក ឆាយ ធី បានអះអាងថា ៖ «សកម្មភាពនេះវាជាសកម្មភាពបទល្មើសព្រៃឈើផង ហើយជាបទល្មើសកាប់រានដីព្រៃរដ្ឋផង។ រដ្ឋបាលព្រៃឈើមេត្តាចាត់វិធានការជាបន្ទាន់ដើម្បីចុះ»។
នាយខណ្ឌរដ្ឋបាលព្រៃឈើខេត្តមណ្ឌលគិរី លោក សុង ឃាង មានប្រសាសន៍ថា តំបន់ដែលសហគមន៍រាយការណ៍ថា មានការកាប់រានព្រៃនោះជាតំបន់គ្រប់គ្រងដោយក្រុមអភិរក្សព្រៃឈើស្រុកកែវសីមា ហើយករណីនេះលោកនឹងចាត់មន្ត្រីអភិរក្សចុះទៅតំបន់នោះជាបន្ទាន់។
កាលពីដើមខែមករានៅស្រុកកែវសីមា ក្រុមសមត្ថកិច្ចចម្រុះអភិរក្សព្រៃឈើបានផ្ទុះអាវុធជាច្រើនគ្រាប់ក្នុងការតាមចាប់ឡានដឹកឈើប្រណីតខុសច្បាប់មួយគ្រឿងរបស់មន្ត្រីក្រុមប្រឹក្សាស្រុកនោះ ដែលព្យាយាមបើកឡានរត់គេច មិនឲ្យក្រុមសមត្ថកិច្ចត្រួតពិនិត្យ ហើយបន្ទាប់ពីហេតុការណ៍នោះពីរថ្ងៃការិយាល័យរបស់ក្រុមអភិរក្សត្រូវគេលួចដុតចោល៕