ប្រភពសុំមិនឲ្យបញ្ចេញឈ្មោះ មានប្រសាសន៍ឲ្យដឹងថា ឈើប្រណីតទាំងនោះគឺឈ្មួញខាងលើប្រមូលទិញតាំងពីថ្ងៃសុក្រមកម្ល៉េះ ហើយគេគ្រោងដឹកជញ្ជូនចេញនៅថ្ងៃច័ន្ទដើមសប្តាហ៍ក្រោយ ៖ «ម្សិលមិញ គេទិញ ៤០គូប ថ្ងៃនេះគេទិញ ១០គូប ហើយគេយកមកគរពេញហ្នឹង។ ហ៊ុន សំណាង អ្នករត់ការឈើហ្នឹង...»។
បើតាមមន្ត្រីមូលដ្ឋានឃុំមានប្រសាសន៍ដែរថា ឈើប្រណីតត្រូវបានអ្នកភូមិតំបន់នោះស៊ីឈ្នួលចូលព្រៃកាប់នៅតំបន់ភ្នំក្រឡាពស់ និងភ្នំក្រហម ស្ថិតនៅជាប់ព្រំប្រទល់ស្រុកសេសាន និងស្រុកសៀមប៉ាង ហើយអារច្រៀកដោយម៉ាស៊ីនអារស្វ័យប្រវត្តិតូចៗនិងដឹកជញ្ជូនដោយរទេះគោយន្តមកស្តុកទុកនៅត្រើយម្ខាងទន្លេសាសាន ហើយឈ្មួញប្រមូលទិញដឹកជញ្ជូនឆ្លងទន្លេដាក់រថយន្តកាំមីញ៉ុងធំៗនាំទៅលក់ឲ្យឈ្មួញវៀតណាមតាមច្រកព្រំដែនស្រុកស្នួលខេត្តក្រចេះ។
វិទ្យុអាស៊ីសេរីមិនអាចទាក់ទងឈ្មួញអ្នកទិញឈើលោក ហ៊ុន សំណាង បានទេ ពីព្រោះមិនមានមន្ត្រីមូលដ្ឋាននិងអ្នកភូមិណាស្គាល់អាសយដ្ឋានឬលេខទូរស័ព្ទអាចទាក់ទងនឹងបំភ្លឺការចោទប្រកាន់នោះបានឡើយ។
មេឃុំតាឡាត លោក សឿង ខង មានប្រសាសន៍ថា អាជ្ញាធរឃុំមិនមានលទ្ធភាពទប់ស្កាត់បញ្ហានេះបានទេ ពីព្រោះឈ្មួញអ្នកទិញឈើ គឺជាអ្នកនៅពីក្រោយសកម្មភាពផ្តល់ប្រាក់គ្រឿងសម្ភារៈដល់អ្នកភូមិនិងជាអ្នកកាងការពារសកម្មភាពខុសច្បាប់នេះ ៖ «គេកាប់ពីភ្នំក្រឡាពស់ ភ្នំក្រហម»។
ភូមិខ្សាច់ធំ បើតាមមន្ត្រីមូលដ្ឋានបញ្ជាក់ថា គឺជាមូលដ្ឋានធ្វើអាជីវកម្មឈើប្រណីតខុសច្បាប់ជាច្រើនឆ្នាំមកហើយ ដោយអ្នកភូមិនិងមន្ត្រីមូលដ្ឋានមួយចំនួននៅទីនោះតែម្តង។
នាយសង្កាត់រដ្ឋបាលព្រៃឈើប្រចាំឃុំតាឡាត លោក អឿ គឹមហេង មានប្រសាសន៍ទទួលស្គាល់ដែរថា ពិតជាមានសកម្មភាពធ្វើអាជីវកម្មឈើប្រណីតខុសច្បាប់នៅតំបន់នោះប្រាកដមែន។
លោកថា បានចុះបង្រ្កាបជាច្រើនលើក ក៏ប៉ុន្តែមានករណីខ្លះ សមត្ថកិច្ចបង្រ្កាបក៏រងការគំរាមកំហែងពីមន្ត្រីមានអំណាចទាំងនោះវិញផង។
លោក អឿ គឹមហេង មានប្រសាសន៍ដូច្នេះថា ៖ «យើងហាមឃាត់ដែរ តែធ្វើម៉េច បើសុទ្ធតែថ្នាក់កំពូលៗអីអ៊ីចឹង។ ខ្ញុំចុះទៅទប់ស្កាត់បានមួយគំនរទេតើ! ហ៊ុន សំណាង ហ្នឹង គាត់ត្រូវជាក្មួយសម្ដេច ហ៊ុន សែន»។
ចំណែកអនុប្រធានមន្ទីរបរិស្ថានខេត្តស្ទឹងត្រែង លោក ហាក់ វិមាន មានប្រសាសន៍ថា វាជាផលប៉ះពាល់ផ្នែកបរិស្ថាន ក៏ប៉ុន្តែព្រៃឈើទៅតំបន់ភ្នំក្រឡាពស និងភ្នំក្រហម គឺជាដែនសមត្ថកិច្ចរបស់ជំនាញព្រៃឈើ។
លោក ហាក់ វិមាន ថ្លែងដូច្នេះថា ៖ «គោលការណ៍រួមហ្នឹង គឺអ្នកណាក៏ដូចគ្នា មានសិទ្ធិតួនាទីការពារធនធានធម្មជាតិទាំងអស់គ្នា។ ...ខាងរដ្ឋបាលព្រៃឈើអ៊ីចឹង វាពិបាកណាស់ ព្រោះថា យើងធ្វើទៅវាប៉ះអ៊ីចឹងៗទៅ វាពិបាកដែរ»។
អាជ្ញាធរខេត្តស្ទឹងត្រែង កាលពីខែតុលាកន្លងទៅ បានបង្កើតគណៈកម្មការទប់ស្កាត់សកម្មភាពកាប់ឈើប្រណីត ដែលកើតមានជាច្រើនករណី ក៏ប៉ុន្តែរហូតបច្ចុប្បន្ន អ្នកភូមិរាយការណ៍ថា ឈើប្រណីតនៅតែមានកាប់ឥតឈប់ឈរ។
បើតាមតួលេខបង្ក្រាបដោយសង្កាត់រដ្ឋាបាលព្រៃឈើតាឡាត ឲ្យដឹងថា ក្នុងឆ្នាំ២០០៨ មានម៉ាស៊ីនកាត់ឈើ ២០គ្រឿង រថយន្ត៥គ្រឿងនិងឈើប្រណីត ៨០ម៉ែត្រគូប ត្រូវបានរឹបអូស៕