មន្ត្រីទាំង៣នាក់រងការចោទមានឈ្មោះ ស៊ឹម ចាន់ណារិទ្ធ ជាមន្ត្រីប៉ូលិសការពារព្រំដែនប៉ុស្តិ៍តាង៉ា ឈ្មោះ កាំង សារឿង យោធាខេត្ត និងឈ្មោះ អ៊ូ ស៊ីសុផុន ហៅ អ៊ុង មណ្ឌល យោធាស្រុកអណ្តូងមាស។
អនុប្រធានប៉ូលិសប៉ុស្តិ៍រដ្ឋបាលឃុំញ៉ាង លោក ពុង ពឿន មានប្រសាសន៍បញ្ជាក់ថា កាលពីវេលាម៉ោង១០និង៣០នាទីយប់ថ្ងៃទី២១ ខែមករា ឆ្នាំ២០១០ អ្នកទាំង៣បានដឹកជញ្ជូនឈើប្រណីតនាងនួនមួយរថយន្តតូចចំណុះប្រមាណ៣ម៉ែត្រគូប បំណងនាំចេញឆ្លងដែនទៅលក់ឲ្យឈ្មួញវៀតណាម ប៉ុន្តែសមត្ថកិច្ចឃុំបានស្ទាក់ឃាត់ពួកគេនៅចំណុចភូមិដាល ដើម្បីរឹបអូសវត្ថុតាងល្មើស ក៏ប៉ុន្តែមិនបានសម្រេចដោយអ្នកទាំងបីបានប្រើអំណាចនិងគំរាមបាញ់សម្លាប់មកលើក្រុមសមត្ថកិច្ចអ្នកបង្ក្រាបហើយសំរុកនាំឈើចេញ ៖ «យើងអនុវត្តទៅលើបញ្ជាស្ដីពីការបង្រ្កាបបទល្មើសព្រៃឈើ»។
ជំនួយការមេឃុំញ៉ាង លោក ឯម សុវណ្ណ ដែលចូលរួមក្នុងការទប់ស្កាត់បទល្មើសព្រៃឈើប្រណីតដែរនោះបញ្ជាក់ថា ក្រុមប្រឹក្សាឃុំបានផ្តល់របាយការណ៍នេះជូនអាជ្ញាធរស្រុករួចហើយ ដើម្បីចាត់វិធានការក្នុងរឿងនេះ។
លោក ឯម សុវណ្ណ បានឲ្យដឹងដូច្នេះ ៖ «ប្រើភាសាគំរាមកំហែងថា ពួកសមត្ថកិច្ចឃុំទាំងអស់មានប៉ុន្មាននាក់ត្រូវសម្លាប់ចោល ត្រូវបាញ់ចោល ត្រូវវ៉ៃចោល គេគំរាមអ៊ីចឹង»។
វិទ្យុអាស៊ីសេរីមិនអាចទាក់ទងមន្ត្រីទាំង៣នាក់ដើម្បីបំភ្លឺជុំវិញការចោទនោះបានទេនៅថ្ងៃសៅរ៍ ទី២៣ ខែមករា ឆ្នាំ២០១០ ក៏ប៉ុន្តែមេបញ្ជាការយោធាស្រុកអណ្តូងមាស លោក ប៉ុល សុវណ្ណ មានប្រសាសន៍ថា លោកបានស្រាវជ្រាវករណីនេះហើយមិនមានពាក់ព័ន្ធខាងមន្ត្រីយោធាទេ។
អភិបាលស្រុកអណ្តូងមាស លោក នង ដារិទ្ធ មានប្រសាសន៍ថា បានទទួលសេចក្តីរាយការណ៍ពីសមត្ថកិច្ចឃុំស្តីពីបញ្ហាខាងលើនេះហើយ។
លោក នង ដារិទ្ធ មានប្រសាសន៍ដូច្នេះ ៖ «មានឡានដឹកឈើ ហើយពួកឃុំចាប់ទៅវាមានការកាង។ អម្បាញ់មិញខ្ញុំប្រាប់ឃុំ ខ្ញុំថា ដាក់វិធានការធ្វើក្នុងនាមគណៈបញ្ជាការឯកភាពឃុំ»។
អាជ្ញាធរខេត្តរតនគិរី កាលពីសប្តាហ៍មុននេះ បានរកឃើញគំនរឈើប្រណីតដែលគេកាប់ពីព្រៃ ហើយអារជាឈើជ្រុងប្រវែង២ទៅ២ម៉ែត្រ៥០ ទទឹងពី៣០ទៅ៤០សង់ទីម៉ែត្រប្រមាណជាង២០០ដើមដែលគេលាក់ទុកនៅស្រុកកូនមុំ និងក្រុងបានលុង។ ជាមួយនោះដែរ ក៏បានរកឃើញការចរាចរឈើប្រណីតតាមរថយន្តធំៗបង្កប់ពីក្រោមការដឹកជញ្ជូនមើមដំឡូងបំណងនាំចេញពីស្រុកវ៉ឺនសៃទៅកាន់ព្រំដែនប្រទេសវៀតណាម។
មន្ត្រីសម្របសម្រួលសមាគមអាដហុកខេត្តរតនគិរី លោក ប៉ែន ប៊ុណ្ណារ៍ មានប្រសាសន៍ថា ចលនាធ្វើអាជីវកម្មឈើប្រណីតកំពុងកើតមានជាច្រើនករណី ដោយក្រុមឈ្មួញបានរត់ការត្រូវរ៉ូវជាមូយក្រុមសមត្ថកិច្ចគ្រប់ទីតាំងដើម្បីនាំឈើប្រណីតតាមរថយន្តចេញទៅប្រទេសវៀតណាម តាមច្រកទ្វារអន្តរជាតិស្រុកអូរយ៉ាដាវ ដោយគ្មានការទប់ស្កាត់។
វិទ្យុអាស៊ីសេរីមិនអាចទាក់ទងអភិបាលខេត្តរតនគិរី លោក ប៉ាវ ហមផាន ដើម្បីអត្ថាធិប្បាយជុំវិញសេចក្តីរាយការណ៍ទាំងអស់នេះបានទេនៅថ្ងៃសៅរ៍(២៣ មករា)ឈប់សម្រាកនេះ៕