ប្រធានសហគមន៍ការពារព្រៃឈើនៅស្រុកវ៉ឺនសៃ សុំមិនបញ្ចេញឈ្មោះបានរាយការណ៍ថា មកដល់ថ្ងៃនេះសកម្មភាពដឹកជញ្ជូនឈើនៅតែបន្តជាធម្មតា មិនបានអើពើទៅនឹងការព្រមានខ្លាំងៗរបស់លោក ហ៊ុន សែន នាយករដ្ឋមន្រ្តីខ្មែរនោះទេ។ ពួកអាជ្ញាធរនៅក្នុងស្រុកនេះនៅតែមានការឃុបឃិតជាដដែលឲ្យឈើចេញរាល់យប់។
លោកបានបន្តថា ឈើទាំងនោះត្រូវគេដឹកចេញពីចំណុចសំខាន់ៗមួយចំនួន ដូចជាឃុំកោះពាក ឃុំភ្នំកុកនិងឃុំវ៉ឺនសៃជាដើម សុទ្ធសឹងជាប្រភេទឈើគ្រញូង ធ្នង់ បេងនិងនាងនួនជាដើម ដែលជាប្រភេទឈើប្រណីតលេខ១។
លោកបានរៀបរាប់បែបនេះថា ៖ «បើថាខាងក្រសួងព្រៃឈើគេចុះមកដល់ស្រុកវ៉ឺនសៃអ៊ីចឹងហើយ ខាងស្រុកគេនិយាយប្រាប់លោកមេឃុំហ្នឹងឲ្យផ្អាកអារឈើសិន បើថា ថ្ងៃនេះគេចុះហើយ គេប្រាប់តាមភូមិតាមអីហ្នឹងឲ្យរោងម៉ាស៊ីនសម្រាកសិន ចាំគេទៅផុតហើយចាំធ្វើទៀត»។
លោក សល់ ភុន អនុប្រធានភូមិលើឃួន ឃុំកិចុង ស្រុកបរកែវ មានប្រសាសន៍ដែរថា ពីមុនដល់ឥឡូវនៅតែមានសកម្មភាពដឹកជញ្ជូនឈើដដែលតាមរយៈឡានតូចនិងឡានធំៗ ពីតំបន់នានាក្នុងស្រុកបរកែវ ហើយលោកឃើញថា មានឈើរាប់រយគូបទៀតត្រូវគេលាក់នៅក្នុងព្រៃមិនទាន់យកចេញអស់នៅឡើយ។ លោកថា មានការព្រួយបារម្ភទៅថ្ងៃមុខព្រៃឈើនៅក្នុងស្រុកបរកែវ ត្រូវវិនាសហិនហោចអស់។
លោក សល់ ភុន បានឲ្យដឹងដូច្នេះ ៖ «ច្រើនតើ...! ឈើនៅក្នុងព្រៃមិនទាន់ចេញនៅមិនដឹងជាប៉ុន្មានរយគូបទេ ឈើដែលចេញៗច្រើន»។
លោក ប៉ែន ប៊ុណ្ណារ៍ មន្រ្តីស៊ើបអង្កេតរបស់អង្គការការពារសិទ្ធិមនុស្សអាដហុក ប្រចាំខេត្តរតនគិរី មានប្រសាសន៍ថា សកម្មភាពខុសច្បាប់កាប់និងដឹកជញ្ជូនឈើនៅខេត្តនេះមិនទាន់មានការថមថយទេ បើទោះជាមានការព្រមានក្នុងអំឡុងប៉ុន្មានថ្ងៃមុននេះបន្ថែមទៅលើបទបញ្ជា០១ បទបញ្ជា០២ទៀតដោយនាយករដ្ឋមន្រ្តីខ្មែរក៏ដោយ។
លោក ប៉ែន ប៊ុណ្ណារ៍ មានប្រសាសន៍ថា តាមសេចក្តីរាយការណ៍ពីសហគមន៍និងបណ្តាញជាច្រើនរបស់លោកបានឲ្យដឹងថា មកដល់ថ្ងៃនេះការកាប់ដឹកជញ្ជូនឈើចេញ ពិសេសមានស្រុកវ៉ឺនសៃ ស្រុកតាវែង ស្រុកអណ្តូងមាសជាដើម នៅតែត្រូវបានធ្វើឡើងជារៀងរាល់ថ្ងៃមិនទាន់ថមថយឡើយ។ លោកបានបន្តទៀតថា ក្រុមហ៊ុនទទួលបានការសម្បទានខ្លះបានកាប់ដឹកឈើចេញបង្កនូវភាពវិនាសហិនហោចព្រៃឈើដ៏មានតម្លៃដែលមានអាយុរាប់រយឆ្នាំមកហើយ។
លោក ប៊ែន ប៊ុណ្ណារ៍ បានឲ្យដឹងដូច្នេះថា ៖ «ទោះលោកបានធ្វើការព្រមានមន្រ្តីយោធាថ្នាក់ខ្ពស់ៗ យើងឃើញថា ចលនាឈើ តាមបណ្ដាញសកម្មជនរាយការណ៍មកឃើញថា នៅតែមានការដឹកចេញទៅព្រំដែនដដែល ហាក់ដូចជាមិនមានការញញើតនឹងប្រសាសន៍ព្រមានរបស់នាយករដ្ឋមន្រ្តីទេ»។
លោក យូកាន វិមាន ប្រធានរដ្ឋបាលព្រៃឈើខេត្តរតនគិរី ធ្លាប់បញ្ជាក់ថា កន្លងមកកម្លាំងរបស់លោកបានប្រឹងប្រែងក្នុងការទប់ស្កាត់និងមានចាប់បានជាហូរហែដែរ ហើយលោកក៏បានអំពាវនាវសុំឲ្យមានកិច្ចសហការពីស្ថាប័នមានសមត្ថកិច្ចនៅច្រកទ្វារអន្តរជាតិអូរយ៉ាដាវ ដើម្បីទប់ស្កាត់បទល្មើសទាំងនោះ។
កាលពីប៉ុន្មានថ្ងៃមុន លោកនាយករដ្ឋមន្ត្រី ហ៊ុន សែន បានចង្អុលចំមុខនូវនាយឧត្តមសេនីយ៍មួយចំនួនរបស់លោក ដូចជាឈ្មោះ ឈឿន ចាន់ថន ហៅ ម៉ៅ ចៅហ្វាយខេត្តនិងមន្ត្រីជាច្រើននាក់ទៀតដែលមានការពាក់ព័ន្ធទៅនឹងអំពើកាប់ឈើខុសច្បាប់៕