បុរសឈ្មោះ ជុន វីរៈ ជាតំណាងឲ្យពលរដ្ឋសហគមន៍ឃុំកោះរកា នៅថ្ងៃសុក្រ ទី១៩ ខែសីហា បានឲ្យដឹងថា បច្ចុប្បន្ននេះមានជនជាតិវៀតណាម បានប្រើឧបករណ៍ស្បៃមុងរាប់ពាន់ខ្សែនៅមូលដ្ឋានឃុំកោះរកា ដោយអាជ្ញាធរជលផល ក៏ដូចជាសមត្ថកិច្ចពាក់ព័ន្ធដទៃទៀត មិនបានទប់ស្កាត់នោះទេ។
លោកបន្តថា អាជ្ញាធរបានបង្ក្រាប និងទប់ស្កាត់តែចំពោះជនជាតិខ្មែរដែលប្រើឧបករណ៍ស្របច្បាប់ ដូចជាដាក់សន្ទូច ឬ មង ដើម្បីចាប់ត្រីជាលក្ខណៈគ្រួសារប៉ុណ្ណោះ ប៉ុន្តែចំពោះជនជាតិវៀតណាម ប្រើឧបករណ៍ចាប់កូនត្រីល្មើសច្បាប់បែរជាអាជ្ញាធរមើលមិនឃើញទៅវិញ។
តំណាងសហគមន៍ បានឲ្យដឹងបន្ថែមដូច្នេះ ៖ «មានករណីបទល្មើសនេសាទជនជាតិវៀតណាម បានដាក់ស្បៃមុងរាប់រយខ្សែ ដោយក្នុងមួយខ្សែៗមានប្រវែងរាប់ពាន់ម៉ែត្រ ហើយដាក់ហ្នឹងនៅខាងក្រោយប៉ុស្តិ៍ព្រំដែនឃុំកោះរកា តែម្ដង ដោយមានមន្ត្រីមួយចំនួនគេកាង ជាអ្នកកាងយួន ជាមន្ត្រីសមត្ថកិច្ចព្រំដែនឃុំកោះរកា»។
បន្ថែមលើនេះ ក្រុមប្រជាពលរដ្ឋក៏បានសំណូមពរទៅថ្នាក់ដឹកនាំរដ្ឋាភិបាល ក៏ដូចជាស្ថាប័នជលផលថ្នាក់លើ ឲ្យបញ្ចូនមន្រ្តីជំនាញចុះមកដល់មូលដ្ឋាន ដើម្បីបង្ក្រាបបទល្មើសនេសាទកំពុងកើតមាននៅមូលដ្ឋានឃុំកោះរកា ស្ថិតក្នុងស្រុកពាមជរ ខេត្តព្រៃវែង ឲ្យបានទាន់ពេលវេលា ប្រយោជន៍ដើម្បីរក្សាពូជត្រីមិនឲ្យបាត់បង់។
ចំណែកពលរដ្ឋឈ្មោះ ភី សារៈ បានលើកជាចម្ងល់ថា ហេតុអ្វីបានជាអាជ្ញាធរពាក់ព័ន្ធ រួមមានមន្ត្រីជលផលជាដើម មិនព្រមចាត់វិធានការបង្ក្រាបបទល្មើសនេសាទប្រើឧបករណ៍ខុសច្បាប់ កំពុងកើតមាននៅឃុំកោះរកា ទៅវិញ ឬមួយក៏មន្ត្រីមូលដ្ឋានទាំងនោះបានទទួលលាភសក្ការៈអ្វីមួយពីឈ្មួញល្មើសច្បាប់?
លោក ភី សារៈ បន្ថែម ៖ «ជាប់កន្លែងប៉ុស្តិ៍នគរបាលការពារព្រំដែនឃុំកោះរកា មានយួនដាក់ស្បៃមុង ឬហៅថា សៃយឺន ដាក់ច្រើនណាស់ ខាប់ រាប់រយខ្សែ តែបើប្រជាពលរដ្ឋខ្មែរដាក់តិចតួច គឺកាប់រយះរយាយអស់ហើយ»។
ទោះយ៉ាងណា អាជ្ញាធរមូលដ្ឋានស្រុកពាមជរ ខេត្តព្រៃវែង បានបដិសេធថា មិនមានជនជាតិវៀតណាម ចូលមកធ្វើសកម្មភាព ឬប្រើឧបករណ៍នេសាទចាប់កូនត្រីខុសច្បាប់នៅក្នុងមូលដ្ឋានឃុំកោះរកា ដូចពលរដ្ឋចោទប្រកាន់នោះទេ។
លោក ច័ន្ទ ដេន អភិបាលស្រុកពាមជរ បានឲ្យដឹងថា កន្លងមកមូលដ្ឋាននេះពិតជាកើតមានបទល្មើសនេសាទខ្លះៗពិតមែន ប៉ុន្តែអាជ្ញាធរបានចាត់វិធានការបង្ក្រាប ដោយអាជ្ញាធរចាប់បានស្បៃមុងរាប់រយរាប់ពាន់ខ្សែយកទៅដុតបំផ្លាញចោល។ ទោះយ៉ាងណា លោកទទួលស្គាល់ថា បទល្មើសនេសាទអាចនៅមានជនល្មើសលួចធ្វើសកម្មភាពម្ដងម្កាល ប៉ុន្តែបានលាក់កំបាំងពីភ្នែកសមត្ថកិច្ចជំនាញ។
លោក ច័ន្ទ ដេន បន្ថែម ៖ «ថ្ងៃមុននេះជាប់ព្រំប្រទល់ខាងឃុំកោះរកា ខាងគណៈបញ្ជាការឯកភាពខ្ញុំបានចុះទៅធ្វើសកម្មភាពចាប់បានស្បៃមុងហ្នឹងដុតចោលជាង ២ពាន់ម៉ែត្រ។ ជៀសមិនផុតទេ ដូចកៀសចកអ៊ីចឹង កម្លាំងសមត្ថកិច្ចយើងទៅប្រមូលដុតទៅ ផុតពីហ្នឹងទៅគេទិញដាក់ទៀតទៅ។ ការពិតទៅនៅកន្លែងព្រំប្រទល់វៀតណាមហ្នឹង វាជៀសមិនផុតពីមានអាណិកជនគាត់រកស៊ីខ្លះទេ ប៉ុន្តែសមត្ថកិច្ចរបស់យើងនៅតែបង្ក្រាបជាបន្តបន្ទាប់»។
លោក សុខ ស៊ីណាត មន្ត្រីជលផលស្រុកពាមជរ បានបដិសេធមិនធ្វើអត្ថាធិប្បាយជុំវិញបទល្មើសនេសាទកំពុងកើតមាននៅមូលដ្ឋានឃុំកោះរកា ដែលពលរដ្ឋបានចោទប្រកាន់នោះទេ។ យ៉ាងណាក៏ដោយ ពលរដ្ឋនៅឃុំកោះរកា ស្រុកពាមជរ ខេត្តព្រៃវែង នៅតែអះអាងថា បទល្មើសនេសាទប្រើឧបករណ៍ខុសច្បាប់ដើម្បីចាប់កូនត្រីផ្ដើមដោយជនជាតិវៀតណាម ពិតជាបានកើតមាននៅមូលដ្ឋាននេះយ៉ាងអនាធិបតេយ្យពិតមែន ហើយថា អាជ្ញាធរពាក់ព័ន្ធមូលដ្ឋានទំនងជាបានទទួលសំណូកលុយកាក់ពុករលួយពីឈ្មួញល្មើស ទើបអាជ្ញាធរមិនមានវិធានការទប់ស្កាត់។
ដើម្បីទប់ស្កាត់ភាពអនាធិបតេយ្យនៃបទល្មើសនេសាទ លោកនាយករដ្ឋមន្ត្រី ហ៊ុន សែន ថ្មីៗនេះបានចេញបទបញ្ជាលេខ ០០១ ដាក់ជូនមន្ត្រីពាក់ព័ន្ធក្រោមឱវាទអនុវត្ត និងចាត់វិធានការបង្ក្រាបបទល្មើសនេសាទដោយប្រើឧបករណ៍ខុសច្បាប់ឲ្យបានជាស្ថាពរ និងត្រូវធ្វើសកម្មភាពជាប្រចាំ។
បទបញ្ជាលេខ ០០១ បានឈានដល់ដកតួនាទីមន្ត្រីជលផលតាមខេត្តជាប់ទន្លេសាបចំនួន ៥រូប ដើម្បីព្រមានផងដែរ។ ប៉ុន្តែទោះជាបែបណាក្ដី រហូតមកដល់ពេលនេះ មានសេចក្ដីរាយការណ៍ពីសហគមន៍ពលរដ្ឋនៅតាមបណ្ដាខេត្តក្រុងមួយចំនួនក្នុងប្រទេសកម្ពុជា បានអះអាងថា បទល្មើសនេសាទនៅតែបន្តកើតមាន ហើយអាជ្ញាធរពាក់ព័ន្ធជាអ្នកកាងនៅពីក្រោយខ្នងឈ្មួញបង្កបទល្មើសថែមទៀត ដូចជាករណីបទល្មើសនេសាទកំពុងកើតមាននៅមូលដ្ឋានខេត្តព្រៃវែង ជាដើម៕