ពលរដ្ឋបានឲ្យដឹងថា បទល្មើសនេសាទកំពុងកើតឡើងយ៉ាងពេញទំហឹងនៅឃុំមួយចំនួន នៅស្រុកកំពង់លែង ខេត្តកំពង់ឆ្នាំង។ អ្នកភូមិបានចោទថា បញ្ហានេះបណ្ដាលមកពីមានមន្ត្រីជំនាញខាងជលផល និងសមត្ថកិច្ចពាក់ព័ន្ធ មួយចំនួនទៀតជាអ្នកនៅពីក្រោយខ្នងជនល្មើស។
មេភូមិប្រឡាយមាស គឺលោក អ៊ឹម លឹមហេង បានឲ្យដឹងនៅព្រឹកថ្ងៃទី១៧ មីនា ថា ជនខិលខូចបានប្រើប្រាស់ឧបករណ៍នេសាទខុសច្បាប់ ដូចជារបាំងក្រឡាញឹកប្រវែងរាប់សិបម៉ែត្រ និងខ្លះបានប្រើឧបករណ៍ឆក់ដើម្បីចាប់ត្រី តែមន្ត្រីជំនាញបានបណ្ដោយឲ្យជនខិលខូចទាំងនោះប្រព្រឹត្តបទល្មើសតាមអំពើចិត្ត ៖ «នៅម្ដុំឃុំពោធិ៍ គឺសុទ្ធតែតំបន់គេឆក់ត្រី។ ខាងជំនាញជលផលគាត់បានលោកនាយករដ្ឋមន្ត្រី ហ៊ុន សែន មានប្រសាសន៍អ៊ីចឹង គាត់ធ្វើជាលេសគាត់លែងអើពើបណ្ដោយតែម្ដង...»។
បុរសអ្នកភូមិដែលសុំមិនបញ្ចេញឈ្មោះ ដោយបារម្ភពីសុវត្ថិភាពបានឲ្យដឹងបន្ថែមថា មន្ត្រីជំនាញកំពុងឆ្លៀតឱកាសប្រើប្រាស់ប្រសាសន៍លោកនាយករដ្ឋមន្ត្រី ដើម្បីផលប្រយោជន៍ផ្ទាល់ខ្លួន ៖ «ជនខិលខូចឆ្លៀតពេលដែលសម្ដេច ហ៊ុន សែន មានប្រសាសន៍ថា ទុកឲ្យប្រជាពលរដ្ឋរកជាលក្ខណៈគ្រួសារគេក៏ទាក់ទងជាមួយមន្ត្រីជលផល លួចប្រើឧបករណ៍នេសាទហាមឃាត់ដើម្បីចាប់ត្រី និងធ្វើនេសាទជាទ្រង់ទ្រាយធំ...»។
មេឃុំប្រឡាយមាសលោក នៅ ស៊ីម ទទួលស្គាល់ថា ពិតជាមានការប្រើប្រាស់របាំងក្រឡាល្អិតនៅក្នុងដែននេសាទឃុំប្រឡាយមាសមែន។ លោកថា អាជ្ញាធរដែនដីពុំមានសមត្ថកិច្ចក្នុងការហាមឃាត់ ឬចាប់ដកហូតឧបករណ៍នេសាទរបស់ប្រជាពលរដ្ឋនោះទេ ព្រោះនេះជាសមត្ថកិច្ចរបស់ជំនាញជលផល ៖ «ខ្ញុំបានចុះមើលរួចហើយ គឺគេពិតជាបានធ្វើរបាំងពី ៤០ទៅ៥០ម៉ែត្រ និងប្រើអួនក្រឡាញឹក...»។
យ៉ាងនេះក្ដី នាយខណ្ឌរដ្ឋបាលជលផលខេត្តកំពង់ឆ្នាំង គឺលោក សេង ប៊ុនឈឿន មានប្រសាសន៍ថា បន្ទាប់ពីបានទទួលដំណឹងនេះលោកនឹងចុះទៅពិនិត្យដោយផ្ទាល់។ លោកបានព្រមានចំពោះមន្ត្រីក្រោមឱវាទលោកថា ប្រសិនបើរកឃើញថាមន្ត្រីរូបណាមានការពាក់ព័ន្ធមន្ត្រីរូបនោះត្រូវទទួលការដាក់ពិន័យតាមបទបញ្ជាផ្ទៃក្នុង និងតាមផ្លូវច្បាប់ ៖ «ព្រឹកមិញខ្ញុំបានចាត់មន្ត្រីចុះទៅមើលហើយ ខ្ញុំក៏បានឃើញថា តំបន់អតីតឡូត៍លេខ៥ ដែលយើងរំសាយទុកជូនប្រជាពលរដ្ឋរកនោះខ្ញុំបានប្រាប់ពួកគាត់រួចហើយ សុំឲ្យគាត់គោរពតាមច្បាប់ជលផល ព្រោះសម្ដេចនាយកលោកក៏បានមានប្រសាសន៍ឲ្យរកជាលក្ខណៈគ្រួសារ និងតាមច្បាប់ដែរ...»។
កន្លងមកនៅខេត្តកំពង់ឆ្នាំង មានការចុះបង្ក្រាបបទល្មើសនេសាទយ៉ាងក្ដៅគគុក រហូតមានការចាប់ឃាត់ខ្លួនជនប្រព្រឹត្តិបទល្មើសនេសាទ និងបានកសាងសំណុំរឿងបញ្ជូនទៅតុលាការជាច្រើននាក់ផង។ យ៉ាងនេះក្ដី មន្ត្រីជំនាញបានត្អូញត្អែរថា ការបង្ក្រាបបទល្មើសនេសាទ មានការលំបាកដោយសារតែជនល្មើសច្រើនលួចធ្វើសកម្មភាពនៅពេលយប់ ដែលកម្លាំងមានសមត្ថកិច្ចមិនបានទៅដាក់ការពារ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។