ក្នុងអង្គសិក្ខាសាលាមួយនៅក្រុងសែនមនោរម្យ កាលពីថ្ងៃពុធ ទី១៦ ខែវិច្ឆិកា ប្រជាសហគមន៍ភាគច្រើនបានសម្ដែងនូវក្ដីកង្វល់ពីការបាត់បង់ធនធានធម្មជាតិក្នុងសហគមន៍នីមួយៗ ដោយសារជនល្មើសលួចកាប់ធ្វើអាជីវកម្មយ៉ាងអនាធិបតេយ្យជាបន្តបន្ទាប់ឥតឈប់។
ក្រុមប្រជាពលរដ្ឋសហគមន៍បានអះអាងថា រហូតមកទល់ពេលនេះគេពុំឃើញអាជ្ញាធរសមត្ថកិច្ចចាត់វិធានការបង្ក្រាបសកម្មភាពកាប់ឈើខុសច្បាប់ទាំងនោះឡើយ។
ស្ត្រីជនជាតិដើមភាគតិចព្នងឈ្មោះ ញើន អៀប បានឲ្យដឹងថា ការដែលសហគមន៍មិនអាចបង្ក្រាបបទល្មើសព្រៃឈើបាន ដោយសារខ្វះការគាំទ្រពីមន្ត្រីអនុវត្តច្បាប់ អាជ្ញាធរពាក់ព័ន្ធមិនសូវយកចិត្តទុកដាក់ពីបញ្ហានេះ៖ «អ្នកដែលពាក់ព័ន្ធបទល្មើសហ្នឹង ច្រើនសុទ្ធតែប៉ូលិស ទាហាន ពេលខ្លះខ្ញុំថា អាចពាក់ព័ន្ធទៅដល់ស្រុកទៀតណោះ ហើយឈើពេញតែព្រៃហ្នឹងពួកគាត់មើលអត់ឃើញ គាត់មើលឃើញតែអាលុយកាក់របស់គាត់ហ្នឹងច្រើនជាង»។
ប្រជាសហគមន៍ជនជាតិដើមភាគតិចក្នុងខេត្តមណ្ឌលគិរី បានថ្លែងថា ដើមឈើដែលអាចទាញយកផលជាជ័រទឹកបាន មានដូចជាដើមឈើទាល និងដើមត្រាច ប្រមាណជាង ១ពាន់ដើម ជារបស់អ្នកភូមិពូរាំង ឃុំសែនមនោរម្យ ស្រុកអូររាំង ត្រូវជនល្មើសលួចកាប់ផ្ដួលរំលំ អារច្រៀកធ្វើអាជីវកម្មដឹកទៅប្រទេសវៀតណាម ក្នុងអំឡុងខែតុលា និងខែវិច្ឆិកានេះ។
សូមស្ដាប់សេចក្ដីរាយការណ៍ពិស្ដាររបស់លោក សេក បណ្ឌិត អំពីរឿងនេះ៖