លោកស្រី មូរ សុខហួរ ដែលបានបំពេញទស្សនកិច្ចនៅទីក្រុងម៉ុងរ៉េអាល់នៃប្រទេសកាណាដា, បូរីញូវយ៉កនិងទីក្រុងវ៉ាស៊ីនតោន សហរដ្ឋអាមេរិក ក្នុងសប្តាហ៍កន្លងទៅនេះ បានមានប្រសាសន៍ថា សហគមន៍ស្រ្តីខ្មែរដែលលោកស្រីបានជួបបានប្តេជ្ញាចិត្តថា នឹងស្វះស្វែងរកអន្តរាគមន៍ពីក្រុមអ្នកតំណាងរាស្រ្តក្នុងប្រទេសដែលគេកំពុងរស់នៅឲ្យពិនិត្យមើលសកម្មភាពរដ្ឋសភាប្រទេសកម្ពុជា និងចាត់វិធានការសមស្របដើម្បីឲ្យការអនុវត្តរបបប្រជាធិបតេយ្យមានដំណើរស្របទៅនឹងសេចក្តីប្តេជ្ញារបស់សហគមន៍អន្តរជាតិដែលបានចែងយ៉ាងច្បាស់ក្នុងកិច្ចព្រមព្រៀងសន្តិភាពទីក្រុងប៉ារីសស្តីពីកម្ពុជា។
លោកស្រី មូរ សុខហួរ បានមានប្រសាសន៍ថា ៖ «ខ្ញុំបានជួបជាមួយនឹងតំណាងរាស្ត្រ ព្រមទាំងព្រឹទ្ធសភានៃសហរដ្ឋអាមេរិកទាំងអស់មាន៨រូប ដែលគេជាគណៈកម្មការជួយបង្កើតឲ្យមានក្រុមមួយគេហៅថា Women Caucus នៅក្នុងគណបក្សប្រជាធិបតេយ្យ។ ខ្ញុំបានជួបជាមួយនឹងព្រឹទ្ធសភា៤រូប គឺសុទ្ធតែជាព្រឹទ្ធសភាដែលមានឈ្មោះល្បីល្បាញ ដូចជាព្រឹទ្ធសភាក្នុងរដ្ឋញូវយ៉ក នៅក្នុងរដ្ឋមីនីសូតា ដែលមានពលរដ្ឋខ្មែរយើងច្រើន ហើយលោកជំទាវទាំងអស់នោះមានការភ្ញាក់ផ្អើលក្នុងការដកអភ័យឯកសិទ្ធិរបស់ខ្ញុំ ហើយគេសុំឲ្យគណៈកម្មការរបស់គេដែលទទួលខុសត្រូវនៅក្នុងរឿងសិទ្ធិមនុស្ស ប្រជាធិបតេយ្យនិងសិទ្ធិស្ត្រីនេះ គេនឹងមកមើលក្នុងករណីរបស់ខ្ញុំ ក៏ដូចជាការវិវត្តន៍នៃរឿងសិទ្ធិស្ត្រីនៅប្រទេសកម្ពុជាដែរ»។
អ្នកតំណាងរាស្រ្តស្រ្តីនៃគណបក្សសមរង្ស៊ីមកពីខែត្រកំពតរូបនេះបានឲ្យដឹងថា លោកស្រីមិនបានអំពាវនាវឲ្យមានការផ្តាច់ជំនួយចំពោះរដ្ឋាភិបាលភ្នំពេញនោះទេ ប៉ុន្តែលោកស្រីបានសុំឲ្យប្រទេសផ្តល់ជំនួយទាំងឡាយចុះពិនិត្យការអនុវត្តកិច្ចព្រមព្រៀងក្រុងប៉ារីសនិងការអនុវត្តច្បាប់នៅកម្ពុជា ជាពិសេសចំពោះស្រ្តីភេទ។
លោកស្រី មូរ សុខហួរ ដែលត្រូវហោះទៅកាន់ទីក្រុង ASPEN នៃរដ្ឋកាឡូរ៉ាដូ នៅពេលបន្តិចទៀតនេះដើម្បីចូលរួមកិច្ចប្រជុំអន្តរជាតិពីបញ្ហាស្រ្តីដែលលោកស្រីជាសកម្មជននៃក្រុមស្រ្តីអន្តរជាតិប្រមាណ២០ឆ្នាំមកហើយនោះបានពណ៌នាការអនុវត្តច្បាប់នៅកម្ពុជាថានៅតែមានការរើសអើងចំពោះស្ត្រីខ្មែរយ៉ាងធ្ងន់ធ្ងរនៅឡើយ។
ក្នុងពេលជាមួយគ្នានេះ លោកស្រីបានអំពាវនាវជាពិសេសដល់រដ្ឋាភិបាលកម្ពុជាដែលជាហត្ថលេខីនៃកិច្ចព្រមព្រៀងក្រុងប៉ារីសដែរនោះឲ្យគោរពហត្ថលេខារបស់ខ្លួន ដោយលោកស្រីបានប្រដូចថា ភាពល្មើសនឹងហត្ថលេខារបស់ខ្លួននោះគឺជាការយកជើងទៅលុបស្មារតីខ្លួនឯងដែលយល់ព្រមរួចហើយក្នុងកិច្ចព្រមព្រៀងទាំងឡាយនោះ។
លោកស្រី មូរ សុខហួរ បានបញ្ជាក់ថា ៖ «យើងមានមោទនភាពណាស់ជាប្រជាពលរដ្ឋនៃប្រទេសដែលឯករាជ្យ ហើយយើងមានមោទនភាពដែលរដ្ឋាភិបាលបានចុះហត្ថលេខានូវអនុសញ្ញាដ៏សំខាន់ៗ តែនៅក្នុងពេលណាយើងចុះហត្ថលេខាហើយ យើងជាប្រជាពលរដ្ឋក្ដីហើយរដ្ឋាភិបាលក្ដីគឺយើងត្រូវតែមានការទទួលខុសត្រូវ។ យើងចុះហត្ថលេខានៅនឹងដៃ ហើយក៏យើងត្រូវតែគោរពទៅតាមស្មារតីហ្នឹងដោយយើងមិនយកជើងយើងលុបនូវហត្ថលេខាស្មារតីយើងក្នុងការទទួលខុសត្រូវនូវអនុសញ្ញានានាដែលយើងបានចុះហត្ថលេខាទៅហើយទេ»៕