លោក ចេហ្វ ដៃហ្គល (Jeff Daigle) ទទួលបន្ទុកផ្នែកកិច្ចការសធារណៈនៃស្ថានទូតអាមេរិកប្រចាំនៅកម្ពុជា បានមានប្រសាសន៍ថា លោក សម រង្ស៊ី នឹងគេចមិនផុតពីការចាប់ខ្លួន ប្រសិនបើគេធ្វើមែននោះ ហើយការចាប់ខ្លួននេះនឹងនាំឲ្យមានបរិយាកាសអាក្រក់ណាស់សម្រាប់ការបោះឆ្នោត ។
លោក ចេហ្វ ដៃហ្គល មានប្រសាសន៍បន្តយ៉ាងដូច្នេះ ៖ «នៅមានអំណរសាទរចំពោះការដោះលែងលោក ដាំ សិទ្ធិ និពន្ធនាយកកាសែតមនសិការខ្មែរ ។ យើងគិតថា ការបន្តឃុំខ្លួនរបស់គាត់ នឹងធ្វើឲ្យខូចដល់មុខមាត់របស់ប្រទេសកម្ពុជាលើឆាកអន្តរជាតិ ។ ក៏ប៉ុន្តែ យើងមានការសោកស្ដាយចំពោះករណីប្ដឹងផ្ដល់ដ៏ចម្រូងចម្រាសដែលធ្វើទៅលើលោក សម រង្ស៊ី នៅមុនថ្ងៃបោះឆ្នោត ហើយប្រកាសនេះនឹងអាចធ្វើឲ្យមានបរិយាកាសអាក្រក់ណាស់ដល់ការចាប់ផ្ដើមដ៏ចាំបាច់នៃការបោះឆ្នោតប្រកបដោយលទ្ធិប្រជាធិបតេយ្យ» ។
ប្រតិកម្មនេះបានធ្វើឡើង នៅបន្ទាប់ពីតុលាការក្រុងភ្នំពេញ បានស្នើជាបន្ទាន់កាលពីល្ងាចថ្ងៃអង្គារ កន្លងទៅ សុំឲ្យរដ្ឋសភាព្យួរអភ័យឯកសិទ្ធិរបស់លោក សម រង្ស៊ី ជាបណ្ដោះអាសន្នក្នុងការសង្ស័យពីបទបរិហារកេរ្តិ៍លោក ហោ ណាំហុង ដែលជាឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសថា ជាមេគុកបឹងត្របែក ក្នុងសម័យខ្មែរក្រហម ។
គណៈកម្មាធិការប្រព្រឹត្តិកម្ម និងមន្ត្រីសិទ្ធិមនុស្សនៅកម្ពុជា កំពុងមានការព្រួយបារម្ភថា លោក សម រង្ស៊ី អាចនឹងត្រូវចាប់ខ្លួន បន្ទាប់អំពីការទាមទារព្យួរអភ័យឯកសិទ្ធិនេះ ។
អ្នកស្រី ពុង ឈីវកេក ប្រធានអង្គការសិទ្ធិមនុស្ស លីកាដូ ឲ្យដឹងយ៉ាងដូច្នេះថា ៖ «ជាពិសេស យើងព្រួយបារម្ភថា នៅពេលមុនបោះឆ្នោតអ៊ីចឹង មានការចាប់ចងគណបក្សជំទាស់អ៊ីចឹង ខ្ញុំខ្លាចថា វាចោលសារមួយអវិជ្ជមានទៅដល់អ្នកបោះឆ្នោតទាំងអស់គ្នា ធ្វើឲ្យអ្នកបោះឆ្នោតមានការភិតភ័យ មិនសូវហ៊ានបញ្ចេញមតិ មិនសូវហ៊ានចេញមកធ្វើឃោសនា» ។
មកទល់ពេលនេះ រដ្ឋសភាមិនទាន់មានចំណាត់ការអ្វីទេទៅលើរឿងនេះ ។
ប្រភពពីមន្ត្រីបក្សប្រឆាំងបាននិយាយថា លោក សម រង្ស៊ី នឹងមិនគេចខ្លួនទៅណាឡើយ ចំពោះស្ថានភាពបែបនេះ ។
មន្ត្រីស្ថានទូតអាមេរិកដដែល បានទាមទារសុំឲ្យអ្នកនយោបាយខ្មែរបញ្ឈប់ការយកបទបរិហារកេរ្តិ៍មកធ្វើជារឿងសំខាន់ ក្នុងនាមខ្លួនជាបុគ្គលសាធារណៈ ដែលជៀសមិនផុតពីការរិះគន់នោះឡើយ ៕