ថ្លែងក្នុងសន្និសីទកាសែតនៅថ្ងៃទី១៧ ខែមីនា ឆ្នាំ២០១០នេះ លោក ឈិត សំអាត នាយកប្រតិបត្តិវេទិកាអង្គការមិនមែនរដ្ឋាភិបាលស្ដីពីកម្ពុជា មានប្រសាសន៍ថា ៖ «បញ្ហាជនជាតិដើមភាគតិចនេះកំពុងតែជាបញ្ហាមួយដែលក្ដៅគគុក ហើយដីរបស់ពួកគាត់កំពុងតែមានការចាប់យកពីសំណាក់ក្រុមហ៊ុន អ្នកមានអំណាចមួយចំនួន ហើយប៉ះពាល់ទៅដល់ប្រពៃណីវប្បធម៌របស់ជនជាតិដើមភាគតិច។ ជាសង្ខេបគឺថា មានការរំលោភសិទ្ធិរបស់ជនជាតិដើមភាគតិចជាទម្ងន់ ហើយបើសិនជាយើងមិនជួយការពារគ្នាទេ វានឹងអាចបាត់បង់នៅក្នុងពេលខាងមុខឆាប់ៗនេះ។ បញ្ហាដីធ្លីនេះគឺជាបញ្ហាធំ គាត់រស់ដោយសារដី កាលណាតែអស់ដី គេយកដីអស់ហើយ មិនដឹងគាត់រស់នៅឯណាទេ! តែដីអស់ ដើមឈើក៏អស់ដែរ!»។
តំណាងជនជាតិដើមភាគតិចម្នាក់ លោក អ៊ំ មិច ជាជនជាតិកួយនៅខែត្រកំពង់ធំ មានប្រសាសន៍ឲ្យដឹងពីផលប៉ះពាល់ដែលក្រុមជនជាតិដើមភាគតិចនៅកម្ពុជាកំពុងទទួលរងនោះដូច្នេះ ៖ «បញ្ហាព្រៃឈើ ទី២ បញ្ហាទំនប់វារីអគ្គិសនី ទី៣ បញ្ហាជីករករ៉ែ ទី៤ បញ្ហាសុខភាព ទី៥ បញ្ហាអប់រំ ទី៦ ការកាប់បំផ្លាញព្រៃឈើនៅតំបន់ព្រៃឡង់ ទី៧ បញ្ហាការបណ្ដេញចេញដោយបង្ខំ ដោយគ្មានការយល់ព្រមពីជនជាតិដើមភាគតិច ឬក៏ក្រៅពីជនជាតិដើមភាគតិច»។
តំណាងជនជាតិដើមភាគតិចម្នាក់ទៀត អ្នកស្រី វ៉ែន សាមីន ជនជាតិសួយនៅខែត្រកំពង់ស្ពឺ មានប្រសាសន៍បន្ថែមថា ក្រៅពីមានផលប៉ះពាល់ដូចខាងលើនោះ ពួកគាត់ក៏ទទួលរងនូវការរំលោភលើសិទ្ធិរបស់ពួកគាត់ផងដែរ។
អ្នកស្រី វ៉ែន សាមីន បានបញ្ជាក់ថា ៖ «ដូចតំបន់ទាំងអស់ ២៤ខេត្តក្រុង ប៉ះពាល់សហគមន៍ទាំងអស់។ ប្រសិនបើខ្ញុំអត់តវ៉ាគឺអស់រលីង គ្មានសល់ទេ ហើយពេលនោះមិនឲ្យខ្ញុំតវ៉ាទៀត។ ខ្ញុំនិយាយជាពាក្យពិត មិនបាច់ទៅតវ៉ាទេ សូម្បីតែពួកខ្ញុំយំ ក៏អត់ឲ្យយំដែរ។ អ៊ីចឹងហើយខ្ញុំសូមសំណូមពរដល់រាជរដ្ឋាភិបាលសូមឲ្យផ្អាកការសម្បទានប៉ះពាល់ទៅលើជនជាតិដើមភាគតិច...»។
តំណាងបងប្អូនជនជាតិដើមភាគតិចបានសំណូមពរទៅដល់រដ្ឋាភិបាលថា មុននឹងផ្ដល់ដីសម្បទានសេដ្ឋកិច្ចដើម្បីអភិវឌ្ឍនោះ សូមឲ្យរដ្ឋាភិបាលផ្ដល់សិទ្ធិដល់តំណាងជនជាតិដើមភាគតិចចូលរួមពិគ្រោះយោបល់ ដើម្បីឲ្យមានការអភិវឌ្ឍប្រកបដោយនិរន្តរភាព។
នាយកប្រតិបត្តិវេទិកាអង្គការមិនមែនរដ្ឋាភិបាលស្ដីពីកម្ពុជា លោក ឈិត សំអាត បានឲ្យដឹងថា កន្លងមកដីសម្បទានសេដ្ឋកិច្ចដែលរដ្ឋាភិបាលបានផ្ដល់ឲ្យក្រុមហ៊ុនឯកជនអភិវឌ្ឍនោះមានទំហំជិត ១លានហិកតារួចហើយ៕