ចំនួនភ្ញៀវទេសចរណ៍មកកម្ពុជាមានការធ្លាក់ចុះបើប្រៀបធៀបកាលពីប៉ុន្មានឆ្នាំកន្លងមកនេះ។
លោក ទិត ចន្ថា អគ្គនាយកទេសចរណ៍នៃក្រសួងទេសចរណ៍ បានមានប្រសាសន៍អំពីហេតុផលមួយចំនួនយ៉ាងនេះថា ៖ «ផលប៉ះពាល់មកពីឥទ្ធិពលនៃវិបត្តិសេដ្ឋកិច្ចជាសកល ហើយក្រៅពីនោះក៏មានផលប៉ះពាល់ផងដែរអំពីវិបត្តិនយោបាយនៃប្រទេសជិតខាងដែលជាច្រកចូលមួយនៃទេសចរមកកាន់ព្រះរាជាណាចក្រកម្ពុជា ហើយក៏អាចថា យើងអាចទទួលផលប៉ះពាល់ខ្លះអំពីការគំរាមកំហែងនៃជំងឺ A(H1N1)...»។
លោក ទិត ចន្ថា ថ្លែងបញ្ជាក់ផងដែរថា តាមការបូកសរុបចំនួនភ្ញៀវទេសចរណ៍មានការធ្លាក់ចុះក្នុងអំឡុង៦ខែដើមឆ្នាំ២០០៩ ប៉ុន្តែចូលដល់ខែកក្កដាបានកើនឡើងវិញ។ លោកបន្តថា នៅក្រុងភ្នំពេញចំនួនភ្ញៀវទេសចរណ៍កើនបាន១០% នៅឆ្នេរសមុទ្ទក្រុងព្រះសីហនុកើនបាន១% ក៏ប៉ុន្តែនៅក្នុងខេត្តសៀមរាបវិញគឺមានការធ្លាក់ចុះដល់ទៅ១៤%។
លោក ទិត ចន្ថា បានមានប្រសាសន៍បន្ថែមថា ៖ «បើយើងពិនិត្យមើលអំពីតំបន់ គេហៅតំបន់ទេសចរណ៍ តំបន់សំខាន់ដែលយើងមានបច្ចុប្បន្ននេះគឺមានតំបន់សៀមរាប តំបន់ភ្នំពេញ និងតំបន់ឆ្នេរ ដែលក្នុងនោះមានខេត្តព្រះសីហនុជាចំណុចសំខាន់។ បើយើងគិតទូទាំងប្រទេសទៅវាមានតំបន់ខ្លះធ្លាក់ចុះ តំបន់ខ្លះមានការកើនឡើង សរុបទៅយើងឃើញថា ទូទាំងប្រទេសហ្នឹងមានការកើនឡើង០,៣% គឺកំណើននេះទាបណាស់»។
វាគ្មិនកិត្តិយសមួយរូបទៀតគឺលោក អាង គឹមអៀង ប្រធានសមាគមទីភ្នាក់ងារទេសចរណ៍កម្ពុជា បានថ្លែងរៀបរាប់អំពីផលប៉ះពាល់នៃវិស័យទេសចរណ៍នៅក្នុងខេត្តសៀមរាប ៖ «ជាផ្លូវការមានតិចតួច មានប្រហែលជា១ឬ២ទេដែលគាត់បិទទាំងស្រុង ហើយគាត់ឆ្លៀតឱកាសហ្នឹងជួសជុលសណ្ឋាគារគាត់តែម្ដង ពីព្រោះថា គាត់ទទួលភ្ញៀវពេញៗ គាត់មិនដែលបានជួសជុលសណ្ឋាគារ ហើយសណ្ឋាគារមួយចំនួនទៀតគឺថា គាត់បិទជាជាន់ៗទេ ឧទាហរណ៍ថា គាត់មាន៤ជាន់ គាត់បិទ២ជាន់ គាត់ទទួលភ្ញៀវ២ជាន់ ហើយនិយោជក និយោជិត របស់គាត់ហ្នឹងមានការបន្ថយចំនួនការងារធ្វើការ ម៉ោងធ្វើការ ដើម្បីស្របទៅនឹងទំហំនៃការធ្លាក់ចុះភ្ញៀវហ្នឹង។ ដូច្នេះខ្ញុំយល់ថា ការធ្លាក់ចុះនេះមានការប៉ះពាល់ខ្លះៗ ជាពិសេសនៅខេត្តសៀមរាប...»។
លោក អាង គឹមអៀង មានប្រសាសន៍បន្តថា ចំនួនភ្ញៀវទេសចរណ៍មកពីប្រទេសជប៉ុននិងកូរ៉េមានការថយចុះ តែភ្ញៀវមកពីប្រទេសវៀតណាមមានការកើនឡើង ក៏ប៉ុន្តែការចំណាយប្រាក់វិញគឺតិចជាងភ្ញៀវមកពីសហរដ្ឋអាមេរិកឬមកពីអឺរ៉ុប។
លោក អាង គឹមអៀង បានបញ្ជាក់ថា ៖ «ភ្ញៀវមួយចំនួនកើនឡើង ជាពិសេសភ្ញៀវជនជាតិវៀតណាម។ ភ្ញៀវជនជាតិវៀតណាមគាត់ស្នាក់នៅសណ្ឋាគារទាបៗនិងសណ្ឋាគារតម្លៃរវាងពី២០ទៅ៣០ដុល្លារ ដូច្នេះភ្ញៀវសណ្ឋាគារដែលមានតម្លៃខ្ពស់ជាងហ្នឹង ដែលមានខ្នាតផ្កាយខ្ពស់ជាងនេះ គឺថាមានការប៉ះពាល់»។
ទោះជាយ៉ាងនេះក្តី វាគ្មិនកិត្តិយសទាំងពីររូបនេះក៏បានសម្ដែងសុទិដ្ឋិនិយមថា ចំនួនភ្ញៀវទេសចរណ៍មកកម្ពុជានឹងមានការកើនឡើងច្រើន ចាប់តាំងពីខែកញ្ញានេះតទៅ គឺដោយសារតែជារដូវភ្ញៀវមកលេងច្រើន ឬភាសាអង់គ្លេសហៅថា High Season ហើយក្នុងនោះក៏មានភ្ញៀវអ្នកកក់សណ្ឋាគាររួចហើយច្រើនជាងពីខែមុនៗផងដែរ៕