លោក អំ សំអាត មន្ត្រីស៊ើបអង្កេតនៃអង្គការ លីកាដូ បានមានប្រសាសន៍នៅថ្ងៃទី២៩ ខែតុលានេះថា រដ្ឋាភិបាលខ្មែរបានប្រកាសអំពីការពង្រឹងនីតិរដ្ឋ ប៉ុន្តែករណីនិទណ្ឌភាពនៅតែកើតមាននៅឡើយ ហើយសមត្ថកិច្ចមិនគួរបណ្តោយឲ្យជនប្រដាប់អាវុធនោះរួចខ្លួនឡើយ បើទោះជាអ្នកដែលប្រព្រឹត្តនោះមានឋានៈអ្វីក៏ដោយ។
លោក អំ សំអាត មានប្រសាសន៍ដូច្នេះថា ៖ «រាល់បទល្មើសដែលកើតឡើង មិនទាន់មានជនល្មើសណាមួយ បានចាប់ទៅផ្តន្ទាទោសតាមច្បាប់ទេ ទើបតែឃើញករណីនៅមាត់ទន្លេ ដែលបាញ់ថ្ងៃមុននោះ ឃើញចៅក្រមលោក ឆាយ គង់ ចេញដីកាបង្គាប់ឲ្យចាប់ខ្លួន ក៏ប៉ុន្តែជនល្មើសក៏មិនទាន់ត្រូវបានចាប់ខ្លួនយកទៅតុលាការនៅឡើយដែរ។ ហើយភាគច្រើន យើងឃើញថា ការបាញ់បោះហើយ គេសម្រួលទៅជាថវិកា ហើយសុំបញ្ចប់រឿង ដែលទាំងអស់នេះហើយ យើងឃើញថា បទល្មើសព្រហ្មទណ្ឌមិនអាចធ្វើការសម្របសម្រួលជាថ្នូររដ្ឋប្បវេណី ហើយបញ្ចប់នូវបទល្មើសព្រហ្មទណ្ឌនោះទេ»។
បើតាមរបាយការណ៍មួយរបស់អង្គការ លីកាដូ បានឲ្យដឹងថា ករណីបាញ់សម្លាប់និងបាញ់ឲ្យរបួសធ្ងន់នោះ មានជាក់ស្តែងដូចជា មន្ត្រីយោធានៃកងវិស្វកម្មកងពលលេខ ៧០ បានបាញ់ស្រីមួយរូប ដែលធ្វើការរោងចក្រកាត់ដេរមួយ កាលពីថ្ងៃទី៣១ ខែកក្កដា កន្លងទៅ។ មន្ត្រីយោធាម្នាក់ទៀតនៃកងវិស្វកម្មកងពលលេខ ៧០ បានបាញ់បុរសម្នាក់ក្រោយពួកគេគ្រោះថ្នាក់ចរាចរណ៍។ ករណីមន្ត្រីប៉ូលិសម្នាក់បាញ់សម្លាប់អ្នកបើករ៉ឺម៉កម៉ូតូ ពីថ្ងៃទី៥ ខែឧសភា និងមន្ត្រីអង្គរក្សម្នាក់បានបាញ់សម្លាប់ស្តី្របម្រើភោជនីយដ្ឋាន កាលពីថ្ងៃទី៤ ខែកញ្ញា ជាដើម។
ចំណែកឯមន្ត្រីស៊ើបអង្កេតនៃអង្គការ អាដហុក លោក ច័ន្ទ សូវ៉េត បានថ្លែងដែរថា មានករណីបទល្មើសព្រហ្មទណ្ឌមួយចំនួនដែលបង្កឡើងដោយមន្ត្រីយោធា ឬជាកងអង្គរក្សនោះច្រើនតែមិនមានការផ្តន្ទាទោស។
លោក ច័ន្ទ សូវ៉េត មានប្រសាសន៍ថា ៖ «បើសិនជាជនល្មើសក្នុងការប្រព្រឹត្តបទល្មើស ហើយមិនទទួលទោស មានន័យថា អំពើនិទណ្ឌភាពកើតមាន ហើយបើអត់មានរាងចាល វាធ្វើឲ្យអ្នកដទៃៗផ្សេងទៀត ជាពិសេសក្រុមប្រដាប់អាវុធ ដែលធ្លាប់តែប្រើប្រាស់អាវុធហ្នឹង គឺគ្មានការកោតខ្លាច អ៊ីចឹងហើយអំពើល្មើសឧក្រិដ្ឋហ្នឹង វាតែងតែកើតមាន។ ហើយទាំងអស់នេះ វាអាចកើតឡើងដោយសារថា មានក្រុមជនមួយចំនួន គាត់មានអាវុធ ដូច្នេះ ការប្រើប្រាស់អាវុធរបស់គាត់ មិនត្រូវបានត្រួតពិនិត្យ ហើយក៏បានរួចខ្លួន ពីការចោទប្រកាន់ទាំងឡាយទៀត ពួកគាត់មានខ្នង មានអ្នកអំណាចធំនៅក្នុងរដ្ឋ ធ្វើជាខ្នងបង្អែក»។
ក្រុមមន្ត្រីនៃអង្គការសិទ្ធិមនុស្សបានរិះគន់ថា ការបណ្តែតបណ្តោយឲ្យជនប្រព្រឹត្តល្មើសបានរួចពីការចោទប្រកាន់នេះ គឺបង្ហាញថយចុះនៃការអនុវត្តច្បាប់នៅក្នុងប្រទេស។
លោកថ្លែងបន្តថា ការមិនអនុវត្តច្បាប់នេះ មិនត្រឹមតែធ្វើឲ្យពលរដ្ឋខ្មែរមិនមានទំនុកចិត្តលើប្រព័ន្ធយុត្តិធម៌ប៉ុណ្ណោះទេ ថែមទាំងធ្វើឲ្យជនបរទេសដែលជាអ្នកវិនិយោគ នៅមានភាពអល់ឯក ឬមិនមកបណ្តាក់ទុននៅកម្ពុជាទៀតផង៕