ថ្លែងនៅក្នុងនាទីវេទិកាអ្នកស្ដាប់វិទ្យុអាស៊ីសេរី នៅថ្ងៃសុក្រ ទី១៥ តុលា ក្នុងប្រធានបទស្ដីពីប្រាក់ចំណូលរបស់កម្មករទៅធ្វើការនៅក្រៅប្រទេស លោក ហ៊ូ វុឌ្ឍី អគ្គនាយករង អគ្គនាយកដ្ឋានការងារ នៃក្រសួងការងារ និងបណ្ដុះបណ្ដាលវិជ្ជាជីវៈ បានបង្ហាញថា ក្រសួងការងារមានផែនការរៀបចំយុទ្ធសាស្ត្រចំនួន៥ដំណាក់កាល ដើម្បីបង្កើនការគ្រប់គ្រងការវិលត្រឡប់របស់ពលករ និងប្រាក់ឈ្នួលបញ្ជូនមកពីបរទេស ដែលពួកគេកំពុងធ្វើការ។
លោក ហ៊ូ វុឌ្ឍី មានប្រសាសន៍បញ្ជាក់បន្ថែមថា ៖ «យើងពង្រឹងការគ្រប់គ្រងតាំងពីជ្រើសរើស ធ្វើម៉េចការជ្រើសរើសកុំឲ្យមានបញ្ហាច្រើន ខ្ញុំជឿថាមានច្រើន ហើយពេលការអប់រំរៀនសូត្រក៏កុំឲ្យមានបញ្ហាទៀត ព្រោះកន្លងមក មានបញ្ហាច្រើនដែរ ឥឡូវយើងកំពុងតែកែទម្រង់បញ្ហាហ្នឹងហើយ ហើយពេលបញ្ជូនទៅកុំឲ្យមាន បញ្ហាហ្នឹងដែរ ដល់ពេលថាត្រឡប់មកវិញ និងការបញ្ជូនប្រាក់ក៏គ្រប់គ្រងទៀត ដូច្នេះ ៥ដំណាក់កាលហ្នឹងយើងនឹងពង្រឹងទាំងអស់នៅឆ្នាំ២០១១ នេះ»។
ក៏ប៉ុន្តែលោក យ៉ា ណាវុធ នាយកប្រតិបត្តិអង្គការខារ៉ាមកម្ពុជា បានថ្លែងក្ដីចម្ងល់ថា តើក្រសួងការងារធ្វើការគណនាប្រាក់ចំណូលរបស់កម្មករនោះរបៀបណា។ លោកថា ប្រាក់ចំណូលដែលបានពីធ្វើការងារនៅក្រៅប្រទេសនោះ គឺពលករបានចំណាយទៅលើការចាយវាយផ្ទាល់ខ្លួន ចំណាយប្រាក់ទៅលើបញ្ហាសុខភាព ចំណាយទៅលើបំណុលដែលខ្លួនបានជំពាក់ក្រុមហ៊ុន និងអ្នករួមការងារ រួមទាំងចំណាយទៅលើសំលៀកបំពាក់ក្នុងការរស់នៅ និងផ្ញើឲ្យក្រុមគ្រួសារផង ៖ «ពលករដែលថា បានប្រាក់ខែហ្នឹង សុទ្ធហ្នឹង គឺថា ២០០ដុល្លារមិនមែនបានលុយហ្នឹងទាំងដុលទេ គឺថាត្រូវចំណាយទៅអស់វិញ ហើយយើងមើលតាមរយៈបញ្ជូនលុយតាមប្រព័ន្ធនៃការបញ្ជូនលុយ បើយើងពិនិត្យមើលនៅក្នុងប្រទេសកូរ៉េ ភាគច្រើនគឺមានគណនីផ្ទាល់ខ្លួន ក៏ប៉ុន្តែយើងពិនិត្យមើលប្រទេសថៃវិញ ការបញ្ជូនលុយ គឺច្រើនតែធ្វើទៅតាមមានសាច់ញាតិស្គាល់គ្នា ឬតាមមេខ្យល់។ អ៊ីចឹងលុយហ្នឹងមិនដឹងថា ពេលផ្ញើមកហើយវាត្រូវកាត់កងចំណាយអីបន្ថែមទៀត»។
អ្នកទូរស័ព្ទចូលរួមក្នុងកម្មវិធីនេះមួយរូបឈ្មោះ សុធា នៅខេត្តកំពង់ចាម មានយោបល់ថា ប្រសិនណាបើទំនាស់ដីធ្លីនៅកើតមាននោះ ប្រជាពលរដ្ឋនៅតែបន្តចេញទៅធ្វើការនៅក្រៅប្រទេស ហើយទទួលរងនៅគ្រោះថ្នាក់ការងារដដែល ៖ «ខ្ញុំចង់សួរថា តើថ្ងៃណាទៅ បានឈប់លក់ខ្មែរទៅធ្វើការនៅបរទេស សំណួរទី១ ទី២ តើថ្ងៃណាទៅបានទើបរដ្ឋាភិបាលឈប់ប្លន់ដីប្រជាពលរដ្ឋ បើសិនជានៅមានប្លន់ដីទៀត ខ្មែរត្រូវតែនៅបង្ខំចិត្តទៅធ្វើការនៅបរទេស»។
ឆ្លើយតបទៅនឹងចម្ងល់របស់លោក សុធា រស់នៅខេត្តកំពង់ចាម លោក ហ៊ូ វុឌ្ឍី អគ្គនាយករង អគ្គនាយកដ្ឋានការងារ នៃក្រសួងការងារ បណ្ដុះបណ្ដាល និងវិជ្ជាជីវៈ បានបំភ្លឺថា លោកមិនអាចកំណត់បានទេថា ថ្ងៃណានឹងឈប់បញ្ជូនពលករទៅក្រៅប្រទេសនោះ។ ពីព្រោះក្នុងពេលបច្ចុប្បន្ននេះ លោកឃើញទឹកចិត្តប្រជាពលរដ្ឋខ្មែរកំពុងមានសន្ទុះយ៉ាងខ្លាំង ក្នុងការចេញទៅធ្វើការនៅក្រៅប្រទេស ៖ «មានពិសោធន៍ថា នៅប្រទេសលើលោកនេះ មិនត្រឹមតែប្រទេសយើង ដែលទើបតែអភិវឌ្ឍន៍បានប៉ុណ្ណឹងទេ ប្រទេសគេដែលអភិវឌ្ឍន៍មុនយើង ហើយអភិវឌ្ឍន៍ខ្ពស់ជាងយើងទៀត ក៏នៅតែបញ្ជូនពលករទៅបរទេសដែរ។ ឧបមាកូនក្មួយលោក សុធា ទៅប្រាក់ហ្នឹងមកចូលដល់លោក សុធា ហ្មង អត់មានចូលថវិការដ្ឋទេ»។
អ្នកទូរស័ព្ទចូលរួមមួយរូបទៀត មកពីខេត្តតាកែវ លោក ចាន់ សុខ បានសំណូមពរឲ្យក្រសួងការងារធ្វើការអង្កេតពីការផ្សព្វផ្សាយពាណិជ្ជកម្ម របស់ក្រុមហ៊ុនបញ្ជូនពលករ ដើម្បីជៀសវាងការបោកប្រាស់កម្មករតាមរយៈការផ្សព្វផ្សាយ ៖ «តើក្រសួងការងារបានពិនិត្យមើលទេ ដូចជាការផ្សាយពាណិជ្ជកម្ម ការបង្កើតក្រុមហ៊ុនហ្នឹង តើក្រសួងបានពិនិត្យ ឬក៏តាមដានទេ តើអាចបញ្ជូនទៅស្របច្បាប់ទេ»។
លោក ហ៊ូ វុឌ្ឍី អគ្គនាយករង អគ្គនាយកដ្ឋានការងារ នៃក្រសួងការងារ និងបណ្ដុះបណ្ដាលវិជ្ជាជីវៈ ឲ្យដឹងថា សព្វថ្ងៃមានក្រុមហ៊ុននាំពលករចំនួន ២៩ក្រុមហ៊ុន ដែលភាគច្រើននៃក្រុមហ៊ុនទាំងនោះ បញ្ជូនពលករទៅប្រទេសម៉ាឡេស៊ី និងទៅប្រទេសថៃ។ លោកថា ក្រសួងការងារមានមន្ត្រីតាមឃ្លាំមើលការងាររបស់ក្រុមហ៊ុនជាបន្តបន្ទាប់ ដើម្បីឃ្លាំមើលការអនុវត្តរបស់ក្រុមហ៊ុនទៅតាមគោលការណ៍របស់រដ្ឋាភិបាល ដែលខ្លួនបានចុះកិច្ចសន្យាជាមួយក្រសួងការងារ។
លោក យ៉ា ណាវុធ នាយកប្រតិបត្តិអង្គការខារ៉ាមកម្ពុជា បានសំដែងការគាំទ្រចំពោះការបញ្ជូនពលករខ្មែរទៅក្រៅប្រទេស ក៏ប៉ុន្តែលោកសុំឲ្យរដ្ឋាភិបាល ជាពិសេសក្រសួងការងារធ្វើយ៉ាងណាគ្រប់គ្រងយន្តការនៃការបញ្ជូនពលករឲ្យកាន់តែប្រសើរ ជៀសវាងបញ្ហាការក្រៀបសង្កត់ រំលោភបំពាន បោកប្រាស់ និងកេងប្រវ័ញ្ចកម្មករខ្មែរ ៖ «តាមពិតការប៉ាន់ស្មានវាមានលក្ខណៈខុសៗ គ្នា តាមរបាយការណ៍របស់ World Bank ដែលធ្វើការសិក្សាស្រាវជ្រាវនៅក្នុងឆ្នាំ២០០៧ បានប៉ាន់ប្រមាណថា និងមានរហូតដល់ ៣២២លាន អ៊ីចឹងយើងឃើញថាចំនួននេះច្រើនណាស់។ ហើយគឺបានប៉ានស្មានទៀតដែរថា វាតំណាងឲ្យប្រហែលជា ៤.១%នៃផលិតទុនសរុបរបស់ជាតិ នេះជាចំណូលមួយខ្ពស់ណាស់សម្រាប់កម្ពុជាយើង»។
ប្រភពពីអង្គការខារ៉ាមកម្ពុជាឲ្យដឹងថា របាយការណ៍ធនាគារពិភពលោក ធ្លាប់បានបង្ហាញថា ប្រាក់ចំណូលដែលបានមកពីចំណូលរបស់កម្មករក្នុង ១ឆ្នាំៗ អាចនឹងកើនដល់ ៥០០លានដុល្លារសហរដ្ឋអាមេរិក។ ប្រសិនបើកម្ពុជាធ្វើការគ្រប់គ្រងក្នុងការធ្វើចំណាកស្រុកបានប្រសើរ ទាក់ទងទៅនិងយន្តការការពារ និងលើកកម្ពស់សិទ្ធិពលករចំណាកស្រុកនោះ៕