សេចក្តីសម្រេចនេះ ធ្វើឡើងតាមរយៈលិខិតជម្រាបជូនអភិបាលខេត្តរតនគិរី ចុះថ្ងៃទី២១ តុលា ឆ្នាំ២០០៨។
មន្រ្តីសម្របសម្រួលអង្គការអាដហុក ខេត្តរតនគិរី លោក ប៉ែន ប៊ុណ្ណារ៍ បានហៅសេចក្តីសម្រេចខាងលើថា ជាជំហានជោគជ័យដ៏មានសារសំខាន់ដើម្បីការពារផលប្រយោជន៍ជាតិ និងជាពិសេស ការពារសិទ្ធិរស់រានមានជីវិតនៃជនជាតិដើមដែលកំពុងរងការរំលោភបំពាន។
លោក ប៉ែន ប៊ុណ្ណារ៍ មានប្រសាសន៍ដូច្នេះថា ៖ «បញ្ហាដែលធ្ងន់ធ្ងរហ្នឹង គឺការកាប់រានដីព្រៃមកធ្វើជាកម្មសិទ្ធិឯកជនហ្នឹង កាប់រំលំឈើប្រណីត យកមកធ្វើអាជីវកម្មយ៉ាងអនាធិបតេយ្យហ្នឹង ជាបញ្ហាដ៏ធ្ងន់ធ្ងរមួយ ដែលប្រឈមចំពោះមុខយើងរាល់ថ្ងៃ»។
អាជ្ញាធរខេត្តរតនគិរី បានបដិសេធសំណើខាងលើនេះ ជាលើកទី៣ កាលពីថ្ងៃទី១២ កញ្ញា ឆ្នាំ២០០៨ បន្ទាប់ពីបានបដិសេធដូចគ្នាពីរលើកកាលពីខែធ្នូ ឆ្នាំ២០០៧ និងខែឧសភា ឆ្នាំ២០០៨ ហើយបានបង្រ្កាបដោយកម្លាំងយោធា ប៉ូលិស និងកងរាជអាវុធហត្ថ រួមទាំងរថយន្តបាញ់ទឹកទៅលើក្បួនយុទ្ធនាការចូលរួមដោយមនុស្សជិត ២០០នាក់់។
វិទ្យុអាស៊ីសេរីមិនអាចទាក់ទងមន្ត្រីសំខាន់ៗនៃអាជ្ញាធរខេត្តដើម្បីធ្វើអត្ថាធិប្បាយលើលិខិតក្រសួងមហាផ្ទៃបានទេ ក៏ប៉ុន្តែអនុប្រធាននាយកដ្ឋានកិច្ចការនយោបាយក្រសួងមហាផ្ទៃ លោក ម៉ី ណារ៉ាត់ មានប្រសាសន៍បញ្ជាក់យ៉ាងដូច្នេះ ៖ «សួរខាងអាដហុក ព្រោះខ្ញុំបានជូនទៅអាដហុកហើយ»។
យ៉ាងនេះក្តី បើតាមលិខិតក្រសួងមហាផ្ទៃដែលវិទ្យុអាស៊ីសេរីទទួលបាន ក្រសួងបានបញ្ជាក់ថា អាជ្ញាធរខេត្តត្រូវសហការនិងជួយសម្រួលការពារសុវត្ថិភាព សន្តិសុខនិងសណ្តាប់ធ្នាប់ដល់ពិធីហែក្បួនដោយសន្តិវិធី។
តំណាងប្រជាសហគមន៍ជនជាតិដើមឃុំលំជ័រ ស្រុកអូរយ៉ាដាវ លោក ពុយ យ៉ុង សម្ដែងការភ្ញាក់ផ្អើល ៖ «ខ្ញុំគាំទ្រពេញទំហឹងហើយ ការអនុញ្ញាតរបស់ក្រសួងមហាផ្ទៃហ្នឹង គឺជាជោគជ័យរបស់ពលរដ្ឋ ការពារធម្មជាតិ ចំពោះខ្ញុំនេះពិបាកចិត្តដែរ ឈើជិតអស់ហើយ»។
ចំណែកមន្រ្តីសម្របសម្រួលនៃអង្គការគាំទ្រសម្ព័ន្ធភាពសហគមន៍ជនជាតិដើមខេត្តរតនគិរី លោក ឯក យោធិន មានប្រសាសន៍ថា ៖ «ជារឿងមួយល្អដែរ បើសិនជាអាជ្ញាធរហ្នឹង គាត់អនុញ្ញាតឲ្យយើងធ្វើវិញហ្នឹង យើងគិតថា អាជ្ញាធរមានគោរពបូជា ធ្វើការផ្ទាល់ជាមួយនឹងប្រជាពលរដ្ឋច្រើនជាង»។
គួរបញ្ជាក់ដែរថា សកម្មភាពកាប់ទន្ទ្រានព្រៃឈើ រួមទាំងឈើប្រណីតមានតម្លៃនិងសកម្មភាពទន្ទ្រានចូលកាន់កាប់ដីធ្លីទ្រព្យសម្បត្តិរដ្ឋនៅខេត្តរតនគិរី បើតាមរបាយការណ៍របស់ប្រជាសហគមន៍កើតមានរាប់ពាន់ហិកតារ ធ្វើឲ្យព្រៃឈើ រួមទាំងឈើមានតម្លៃក្នុងឧទ្យានជាតិវីរជ័យ ក៏រងការកាប់បំផ្លាញដោយមិនមានការទប់ស្កាត់។
បើតាមលោក ប៉ែន ប៊ុណ្ណារ៍ បញ្ជាក់ថា លោកនឹងធ្វើលិខិតអំពាវនាវមួយទៀតជូនមន្រ្តីស្ថាប័នពាក់ព័ន្ធនានាក្នុងខេត្តអំពីយុទ្ធនាការខាងលើ ហើយថាតើពួកគេនឹងចួលរួមឬបដិសេធ៕