ក្នុងលិខិតផ្ញើជូនលោក បាន គីមូន (Ban Ki-moon) អគ្គលេខាធិការអង្គការសហប្រជាជាតិ លោក ឡូរ៉ង់ កាស្ពែរ បានផ្តល់ហេតុផលថា លោកមិនអាចបំពេញការងាររបស់ខ្លួនដោយត្រឹមត្រូវ និងសេរីបានទៀតឡើយ នៅក្នុងសាលាក្ដីខ្មែរក្រហម។
ទាក់ទងនឹងការលាលែងរបស់សហចៅក្រមស៊ើបអង្កេតអន្តរជាតិបម្រុងរូបនេះ លោក ប្រែត អាដាម (Brad Adams) នាយកប្រតិបត្តិនៃអង្គការសិទ្ធិមនុស្សអន្តរជាតិ Human Rights Watch ទទួលបន្ទុកតំបន់អាស៊ី មានប្រសាសន៍ថា វាជារឿងមួយគួរអោយសោកស្តាយណាស់សំរាប់ប្រជាពលរដ្ឋខ្មែរ។
លោក ប្រែត អាដាម៖ «ខ្ញុំគិតថា លោក កាស្ពែរ បានព្យាយាមប្រឹងប្រែងអស់ពីសមត្ថភាពរបស់គាត់ក្នុងការស៊ើបអង្កេត ក្នុងការប្រមូលភស្តុតាងឧក្រិដ្ឋកម្ម ទាក់ទងនឹងមនុស្សដែលមានឈ្មោះនៅក្នុងសំណុំរឿង ០០៣ និង ០០៤ ដែលជាអ្នកទទួលខុសត្រូវក្នុងបទឧក្រិដ្ឋនៅក្នុងរបបខ្មែរក្រហម។ ខុសគ្នាពីលោក ប្លុង ដែលមិនបានព្យាយាម ស៊ើបអង្កេតនោះ។ លោក កាស្ពែរ ព្យាយាមស៊ើបអង្កេតបញ្ហានេះ ប៉ុន្តែត្រូវបានរារាំងដោយលោក យូ ប៊ុនឡេង សហចៅក្រមស៊ើបអង្កេតពីខាងភាគីកម្ពុជា ពីព្រោះលោក យូ ប៊ុនលេង ជាអ្នកធ្វើតាមការបញ្ជា និងការណែនាំរបស់រដ្ឋាភិបាល។ ប្រមុខរដ្ឋាភិបាលកម្ពុជា បានប្រកាសជាសាធារណៈថា នឹងជំទាស់មិនឲ្យមានការស៊ើបអង្កេតករណី ០០៣ និង ០០៤ បន្តទៅមុខទៀតឡើយ។ ដូច្នេះហើយលោក ហ៊ុន សែន បានរារាំងការស៊ើបអង្កេតនោះយ៉ាងមានប្រសិទ្ធភាព ដូច្នេះលោក កាស្ពែរ សម្រេចចិត្តថា ការស៊ើបអង្កេតនោះនឹងមិនអាចបន្តទៅមុខបានទៀតឡើយ ទើបគាត់លាលែង»។
នេះជាសហចៅក្រមស៊ើបអង្កេតអន្តរជាតិទី២ហើយ ដែលបានលាលែងពីតំណែងនៅសាលាក្ដីខ្មែរក្រហម។ សហចៅក្រមស៊ើបអង្កេតអន្តរជាតិលើកទី១ គឺលោក ស៊ីកហ្វ្រីក ប្លាំង (Siegfried Blunk) បានលាលែងកាលពីឆ្នាំទៅ ដោយហេតុផលថា រដ្ឋាភិបាលបានជ្រៀតជ្រែកកិច្ចការរបស់សាលាក្តីខ្មែរក្រហម ដែលនាំអោយគាតមិនអាចបំពេញការងារបាន។
អ្នកស្រី ម៉ៅ សុធានី បានសាកសួរទៅលោក នេត្រ ភក្ត្រា អ្នកនាំពាក្យសាលាក្ដីខ្មែរក្រហម ទាក់ទងនឹងការលាលែងនេះ៖
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។