[ ទាញយកសារាចរណែនាំរបស់ក្រសួងប្រៃសណីយ៍ និងទូរគមនាគមន៍Opens in new window ]
សារាចរដែលចេញផ្សាយដោយក្រសួងប្រៃសណីយ៍ និងទូរគមនាគមន៍ នៅថ្ងៃទី១២ ខែវិច្ឆិកា ឆ្នាំ២០១២ ក៏បានរឹតបន្តឹងថែមទៀតផងដែរ ដោយមិនកំណត់ត្រឹមតំបន់ដែលប៉ះពាល់ដល់សាលារៀនឡើយ រាល់អាជីវកម្មសាលអ៊ីនធឺណិតកាហ្វេ ត្រូវតម្រូវឲ្យមានការហាមប្រាមនូវការលេង "រាល់ល្បែងហ្គេមគ្រប់ប្រភេទ"។
ទាក់ទងនឹងសារាចរនេះ ទីប្រឹក្សាក្រុមយុវជនឯករាជផ្តល់យោបល់ទាក់ទងសិទ្ធិកុមារ លោក អ៊ុល សុភ័គ្រ សម្ដែងនូវការគាំទ្រថានឹងជួយកាត់បន្ថយបញ្ហាសិស្សានុសិស្សពីការគេចសាលាទៅលេងល្បែងហ្គេម៖ «បាទ ខ្ញុំយល់ថាល្អ សម្រាប់រដ្ឋាភិបាលដែលចេញសារាចរណែនាំទៅដល់អ៊ីនធឺណិតនៅតាមរបងសាលាត្រូវតែបិទនោះ ព្រោះជាក់ស្តែងនៅក្នុងសង្គមយើងបច្ចុប្បន្ន ភាគច្រើនក្មេងចាប់អារម្មណ៍ច្រើនទៅលើហ្គេមអនឡាញ (Game online) ដោយក្មេងៗមួយចំនួនគេចសាលាទៅលេង ដែលបណ្ដាលឱ្យមាតាបិតាអាណាព្យាបាលជាច្រើន មានការព្រួយបារម្ភជាខ្លាំងចំពោះការសិក្សារបស់ក្មេង»។
ប៉ុន្តែក្រុមអង្គការសង្គមស៊ីវិលសម្ដែងនូវក្តីបារម្ភថា សារាចរនេះដែលអាចស្ទើរតែហាមឃាត់ការធ្វើអាជីវកម្មជាច្រើន នៅកណ្ដាលរាជធានីភ្នំពេញ នឹងប៉ះពាល់ទៅលើសិទ្ធិសេរីភាពទទួលព័ត៌មានរបស់ពលរដ្ឋ។ ប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ គូសបញ្ជាក់ថា រដ្ឋាភិបាលគួរត្រួតពិនិត្យរឹតបន្តឹងការគ្រប់គ្រងសិស្សានុសិស្ស និងនិស្សិតនៅតាមសាលារៀនវិញប្រសើរជាង៖ «យើងដឹង ទទួលស្គាល់ថា និស្សិត ជាពិសេសសិស្សសាលាក្មេងៗប្រើប្រាស់អ៊ីនធឺណិតច្រើនសម្រាប់លេងហ្គេមផង សម្រាប់ប្រើហ្វេសប៊ុក (Facebooks) ផង ប៉ុន្តែការឆ្លើយតបនេះហាក់ដូចជាការប្រើកណ្ដាប់ដៃដែកខ្លាំងពេក។ បញ្ហាត្រង់ថា ប្រព័ន្ធអប់រំរបស់យើងមិនបានអប់រំក្មេង ជាពិសេសនៅម៉ោងរៀនសូត្រ គឺជាកំហុសប្រព័ន្ធអប់រំ ជាកំហុសសាលាទេ ដែលក្មេងអាចចេញមកលេងហ្គេមបាននោះ ដូច្នេះការបិទអ៊ីនធឺណិតនេះ គឺធ្វើឱ្យប៉ះពាល់ដល់សិទ្ធិពលរដ្ឋ»។
ចំណែកអង្គការសិទ្ធិមនុស្សលីកាដូ (Licadho) បានចេញសេចក្តីថ្លែងការណ៍មួយនៅថ្ងៃព្រហស្បតិ៍ នេះគូសបញ្ជាក់ថា កិច្ចខិតខំប្រឹងប្រែងយ៉ាងខ្លាំងក្លាដើម្បីបិទនូវកន្លែងដែលមានផ្តល់នូវសេវាអ៊ីនធឺណិតថោកសមរម្យ និងងាយស្រួលរកបានសម្រាប់ការប្រើប្រាស់អ៊ីនធឺណិតនៅក្នុងប្រទេសកម្ពុជា មិនត្រឹមតែគ្មានមូលហេតុផ្លូវច្បាប់ប៉ុណ្ណោះទេ ថែមទាំងជាបំណងយ៉ាងច្បាស់ក្នុងការបិទនូវផ្នែកខ្លះនៃការទទួលបានប្រភពព័ត៌មាន ដែលមានឯករាជរបស់ប្រជាពលរដ្ឋពីគេហទំព័រថ្មីៗ និងប្រព័ន្ធផ្សព្វផ្សាយព័ត៌មានសង្គម ដូចជាហ្វេសប៊ុកជាដើម។
ទាក់ទងនឹងទោសបញ្ញត្តិសម្រាប់ការបំពានសារាចរ គឺជាការបង្ក្រាប ការរឹបអូសយកនូវសម្ភារៈ និងការឃាត់ខ្លួន ប្រសិនបើបទល្មើសព្រហ្មទណ្ឌត្រូវបានប្រព្រឹត្តនោះ។
សេចក្តីថ្លែងការណ៍របស់អង្គការសិទ្ធិមនុស្សលីកាដូ គូសបញ្ជាក់ថា គ្មានមូលដ្ឋានផ្លូវច្បាប់ណាមួយសម្រាប់កំណត់ទោសបញ្ញត្តិដោយផ្អែកទៅលើទីតាំងហាង ឬក៏ការលេងល្បែងហ្គេមនៅលើកុំព្យូទ័រឡើយ។ យោងតាមមាត្រា១ នៃច្បាប់ព្រហ្មទណ្ឌនៃព្រះរាជាណាចក្រកម្ពុជា ចែងថា លិខិតគតិយុត្តិដែលបានចេញដោយស្ថាប័ននីតិប្រតិបត្តិ គឺគ្រាន់តែអាចកំណត់នូវបទល្មើសលហុ ដែលអាចពិន័យបានដោយការផាកពិន័យប៉ុណ្ណោះ (ដោយមិនមានឃុំខ្លួន ឬរឹបអូសយកទ្រព្យសម្បត្តិឯកជនឡើយ)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។