លោក អ៊ុំ យូរ៉ាន់ បន្តថា ភាពមិនប្រក្រតីនៃការបោះឆ្នោតកាលពីថ្ងៃទី៣១ ខែធ្នូ លោកបានធ្វើរបាយការណ៍ជូនរដ្ឋមន្ត្រីក្រសួងអប់រំ ក្រសួងទេសចរណ៍និងលោកនាយករដ្ឋមន្ត្រី ហ៊ុន សែន ជួយអន្តរាគមន៍និងចាត់វិធានការ បើមិនដូច្នេះទេវិស័យកីឡានៅកម្ពុជានឹងមិនមានរីកចម្រើននោះទេ។
លោក អ៊ុំ យូរ៉ាន់ បានរៀបរាប់ឈ្មោះសមាជិកសហព័ន្ធកីឡាជាប់ឆ្នោតថ្មីរៀបគម្រោងទម្លាក់លោកចេញពីប្រធានសហព័ន្ធកីឡាប្រដាល់ដូច្នេះ ៖ «មេធំគឺ តែម ម៉ឺន បន្ទាប់មក ម៉ិល កាដូ បន្ទាប់មកមានពីរបីនាក់ទៀត មានដុកទ័រ ឆឹង យ៉ាវយ៉េន ខាង មាស សុខគ្រី។ ខាងអាស៊ីសេរីដាក់ឲ្យចំៗឲ្យខ្ញុំចុះ ខ្ញុំទទួលខុសត្រូវ»។
វិទ្យុអាស៊ីសេរីមិនអាចទំនាក់ទំនងលោក តែម ម៉ឺន ប្រធានសហព័ន្ធកីឡាប្រដាល់កម្ពុជាទើបជាប់ឆ្នោតថ្មីដើម្បីបំភ្លឺជុំវិញការចោទប្រកាន់បានទេតាមទូរស័ព្ទ។ ប៉ុន្តែអនុប្រធានសហព័ន្ធកីឡាកម្ពុជា លោក ឆឹង យ៉ាវយ៉េន មានប្រសាសន៍ថា ការបោះឆ្នោតរើសមេដឹកនាំសហព័ន្ធកីឡាអាណត្តិទី៣ បានប្រព្រឹត្តទៅមានភាពយុត្តិធម៌និងមានការត្រួតពិនិត្យពីមន្ត្រីក្រសួងពាក់ព័ន្ធ ដូចជាមន្ត្រីក្រសួងអប់រំនិងគណៈកម្មការកីឡាអូឡាំពិកមកវាយតម្លៃការបោះឆ្នោតក្រោមក្រសែភ្នែកអ្នកកាសែតប្រកបដោយប្រជាធិបតេយ្យ។
លោក ឆឹង យ៉ាវយ៉េន មានប្រសាសន៍ដូច្នេះ ៖ «តំណាងឲ្យក្រសួងអប់រំយុវជននិងកីឡាបានធ្វើសេចក្ដីថ្លែងការណ៍ថា ការបោះឆ្នោតនេះមានភាពត្រឹមត្រូវយុត្តិធម៌ហើយប្រជាធិបតេយ្យ»។
អតីតប្រធានសហព័ន្ធកីឡាប្រដាល់ លោក អ៊ុំ យូរ៉ាន់ បានចោទប្រកាន់ថា ការរៀបចំគម្រោងបណ្តេញលោកចេញពីតួនាទីជាប្រធានសហព័ន្ធកីឡា គឺដោយសារកន្លងមកលោកបានចាត់វិធានការក្តៅទៅលើអំពើពុករលួយនៃការចាប់គូកីឡាប្រកួតលើសង្វៀន ផ្តើមចេញគណៈកម្មាធិការចាប់គូប្រកួតស្ថិតក្នុងចង្កោមសមាជិកសហព័ន្ធប្រដាល់អាណត្តិថ្មីនេះ។
លោក យ៉ាវយ៉េន អនុប្រធានសហព័ន្ធកីឡាទើបជាប់ឆ្នោតថ្មី បានសន្យាថា លុបបំបាត់ភាពមិនប្រក្រតីកើតចេញពីការចាប់គូកីឡាចូលរួមប្រកួតលើសង្វៀននេះឲ្យបានជាស្ថាពរ។
ប្រធានក្លឹបនិងជាគ្រូបង្វឹក លោក ឡុង សាលវ័ន្ត រំពឹងទុកថា ថ្នាក់ដឹកនាំសហព័ន្ធអាណត្តិថ្មីនឹងលុបបំបាត់អំពើពុករលួយលើវិស័យកីឡា ជាពិសេសអំពើពុករលួយនៃការចាប់គូប្រកួតនៅលើសង្វៀន។
លោក ឡុង សាលវ័ន្ត បានឲ្យដឹងដូច្នេះ ៖ «មេដឹកនាំនេះប្រហែលជាមានភាពយុត្តិធម៌ជាងមេដឹកនាំមុន។ មេដឹកនាំមុនដូចជាមិនស៊ីចង្វាក់នឹងកូនចៅ»។
គ្រូបង្វឹកកីឡាប្រដាល់ក្លឹបបក្សីស្លាបដែក លោក សួរ ប៊ុនសូត្រ មិនទាន់មានជំនឿថា ថ្នាក់ដឹកនាំសហព័ន្ធអាណត្តិថ្មីអាចទប់ស្កាត់បានអំពើពុករលួយក្នុងការចាប់គូប្រដាល់នេះទេ ព្រោះសមាសភាពថ្នាក់ដឹកនាំសហព័ន្ធកីឡាអាណត្តិថ្មីគឺសុទ្ធតែជាបុគ្គលដែលធ្លាប់ប្រព្រឹត្តអំពើពុករលួយកន្លងមក។
លោក អ៊ុំ យូរ៉ាន់ បានមានប្រសាសន៍ថា លោកកំពុងរៀបចំពាក្យបណ្តឹងដើម្បីរំលាយសមាសភាពសហព័ន្ធកីឡាដែលទើបជាប់ឆ្នោតថ្មីនេះ។ លោកបញ្ជាក់ថា ប្រសិនបើការប្តឹងផ្តល់របស់គាត់មិនបានសម្រេចបានជោគជ័យ លោកនឹងបង្កើតសហព័ន្ធថ្មីមួយទៀត៕