លោក ឆាយ ធី មន្ត្រីស៊ើបអង្កេតនៃសមាគមសិទ្ធិមនុស្ស អាដហុក បានផ្តល់សម្ភាសន៍កាលពីព្រឹកថ្ងៃទី៩ វិច្ឆិកា ថា ចាប់ពីដើមខែសីហាមកទល់ពេលនេះ លោកបានរកទៅឃើញថាមាន៣ករណីហើយដែលច្បាប់មិនបានផ្តល់ភាពយុត្តិធម៌ដល់ប្រជាពលរដ្ឋក្នុងតំបន់។
លោក ឆាយ ធី បានបញ្ជាក់ថា ៖ «ចៅក្រមតុលាការខេត្តមណ្ឌលគិរីនេះ ការហៅនិងការចាប់ខ្លួនកន្លងមកពុំមានភាពប្រក្រតីទៅលើរឿងហេតុដែលធ្វើការចោទប្រកាន់នោះទេ។ កោះហៅមកធ្វើការចាប់ខ្លួន ហើយធ្វើការដោះលែងជាថ្នូរនឹងការបង់ប្រាក់។ នេះជាអំពើអយុត្តិធម៌មួយដែរសម្រាប់ប្រជាពលរដ្ឋក្រីក្រទន់ខ្សោយ»។
អ្នកស្រី ហេង ស្រីពៅ នៅភូមិអូរបួនក្នុងស្រុកកោះញែក បានឲ្យដឹងថា អ្នកស្រីត្រូវបានតុលាការកោះអញ្ជើញឲ្យចូលបំភ្លឺពីបទថាបានរំលោភលើសេចក្តីទុកចិត្តដោយក្នុងការសាកសួរនោះ អ្នកស្រីថា តុលាការបែរជាបង្ខំឲ្យបង់ប្រាក់ជាថ្នូរទៅនឹងការមិនឃុំខ្លួនក្នុងការមកបំភ្លឺនោះទៅវិញ។
អ្នកស្រី ហេង ស្រីពៅ បានឲ្យដឹងថា ៖ «តុលាការហ្នឹងគាត់ហៅខ្ញុំ ចោទខ្ញុំពីបទរំលោភការទុកចិត្តអ៊ីចឹង ហើយគាត់ដាក់កំណត់ឲ្យខ្ញុំហ្នឹងរកលុយ២ពាន់ដុល្លារឲ្យគាត់។ គាត់ថាបើមិនមានលុយឲ្យ គេចាប់ខ្ញុំដាក់គុកពី៦ខែទៅ១ឆ្នាំ ធ្វើកិច្ចសន្យាខែកក្កដា ខែ៧ ថ្ងៃទី១៧ ដល់ពេលខ្ញុំចេញមកគេនៅតែគំរាមខ្ញុំអ៊ីចឹង ខ្ញុំទៅអង្គការអាដហុកទៅ ហើយគាត់ធ្វើអន្តរាគមន៍ទៅជួបមេតុលាការហ្នឹង។ តាំងពីហ្នឹងមកខ្ញុំអត់ដែលបានជួបគាត់ផង ខ្ញុំរវល់តែមកស៊ីឈ្នួលគេទៅយកអង្ករ»។
អ្នកស្រី ពៅ បានឲ្យដឹងបន្ថែមថា រឿងរ៉ាវកើតឡើងដោយសារមានអ្នកទិញដីអ្នកស្រី ហើយកក់ប្រាក់ចំនួន១ពាន់ដុល្លារដោយធ្វើកិច្ចសន្យាកំណត់ថ្ងៃខែត្រូវសងឲ្យគ្រប់ តែដល់ថ្ងៃខែកំណត់បែរជាមិនយក ហើយទារប្រាក់កក់ចំនួន២៥០០ដុល្លារវិញ តែអ្នកស្រីបានសងគ្រប់ដោយចង់យកដីនោះទៅលក់ឲ្យអ្នកផ្សេងទៀត ហើយក៏ត្រូវតុលាការអញ្ជើញទៅសាកសួរ ហើយក៏មានការបង្គាប់ឲ្យបង់ប្រាក់ធានានោះឡើង។
ចៅក្រមស៊ើបអង្កេតពាក់ព័ន្ធក្នុងរឿងនេះគឺលោក មេង តូនី បានពន្យល់ដោយខ្លីពីករណីចោទប្រកាន់នេះថា ពុំមែនជាការកំណត់ដោយបុគ្គលខ្លួនលោកនោះទេ គឺជាច្បាប់។
លោក មេង តូនី បានបញ្ជាក់ថា ៖ «ដាក់ធានាតាមផ្លូវតុលាការ ដូច២២៣អ៊ីចឹងហើយ ទៅមើលច្បាប់មាត្រាហ្នឹងទៅ គេនិយាយថាម៉េច?»។
លោក ឆាយ ធី មន្ត្រីនៃសមាគមអាដហុក បានឲ្យដឹងបន្ថែមថា បុរសម្នាក់ទៀតនៅភូមិអូរបួន ស្រុកកោះញែក ក៏ត្រូវបានតុលាការគំរាមឃុំខ្លួន ដោយទាមទារប្រាក់តថ្លៃគ្នាពី៨០០ដុល្លារនៅត្រឹម៥០០ដុល្លារទើបរួចខ្លួនពីបទចោទថាបានប្លន់មាស ដែលលោកបញ្ជាក់ថា នឹងលើកយកករណីនេះទៅដាក់ជូនគណៈកម្មការស្រាវជ្រាវរបស់ឧត្តមក្រុមប្រឹក្សានៃអង្គចៅក្រមដើម្បីត្រួតពិនិត្យអំពីដំណើរការរបស់ចៅក្រមឲ្យមានយុត្តិធម៌និងប្រសិទ្ធភាព៕