Amnesty International រិះគន់ការកាត់ទោសដាក់គុកចាងហ្វាងកាសែត

ដោយ សុខ សេរី

2009-07-01

អង្គការអន្តរជាតិមួយឈ្មោះ Amnesty International បានថែ្លងរិះគន់ថា ការផ្តន្ទាទោសដាក់គុកចាងហ្វាងកាសែត«ខែ្មរម្ចាស់ស្រុក» កន្លងទៅនេះ ថាជាការដើរថយក្រោយនូវសិទ្ធិសេរីភាពនៅក្នុងការបញ្ចេញមតិនៅកម្ពុជា ហើយបានទទូចសុំឲ្យតុលាការក្រុងភ្នំពេញបើកការជំនុំជម្រះសំណុំរឿងនេះជាថ្មី។

RFA Photo/Zakariya

លោក ហង្ស ចក្រា ចាងហ្វាងកាសែត«ខ្មែរម្ចាស់ស្រុក»។

យោងតាមសេចក្តីថែ្លងការណ៍របស់អង្គការលើកលែងទោសអន្តរជាតិ ដែលវិទ្យុអាស៊ីសេរីទទួលបាននៅថៃ្ងពុធ ទី១ កក្កដានេះ បាននិយាយថា វាជាការអវត្តមាននៃភាពឯករាជរបស់តុលាការនៅក្នុងប្រទេសកម្ពុជា ហើយវាជាការកើនទ្បើងនូវភាពមិនចេះអត់ធ្មត់ចំពោះការរិះគន់នៅក្នុងចំណោមមន្រ្តីជាន់ខ្ពស់នៅក្នុងរដ្ឋាភិបាលកម្ពុជា។

Brittis Edman ជាអ្នកស្រាវជា្រវរបស់អង្គការលើកលែងទោសអន្តរជាតិ បានមានប្រសាសន៍នៅក្នុងសេចក្តីថែ្លងការណ៍នោះទៀតថា ការកាត់ទោសកន្លងមកនេះមិនបានស្របតាមបទដ្ឋាននិងច្បាប់ស្តីពីសិទ្ធិមនុស្សអន្តរជាតិទេ ហើយការចោទប្រកាន់ក្រោមបទផ្សាយព័ត៌មានមិនពិតនិងបទបរិហារកេរ្តិ៍ប្រឆាំងនឹងការរិះគន់ដោយសន្តិវិធីនោះគឺជាការរំលោភសិទ្ធិក្នុងការបញ្ចេញមតិដោយសេរី។

មិនទាន់អាចទាក់ទងលោក ខៀវ កាញារីទ្ធ មន្រ្តីអ្នកនាំពាក្យរបស់រដ្ឋាភិបាលកម្ពុជាបានទេនៅថៃ្ងពុធនេះ ជុំវិញសេចក្តីថែ្លងការណ៍ខាងលើ។

លោក សួង ចាន់ថន ជាមេធាវីរបស់រដ្ឋាភិបាលកម្ពុជាដែលការពារក្តីនេះ បានមានប្រសាសន៍ថា ៖ «ស្រុកដែលមានច្បាប់ ការយល់ដឹងអំពីច្បាប់និងការអនុវត្តច្បាប់»។

រីឯលោក ជូង ជូងី ជាមេធាវីរបស់លោក ហង្ស ចក្រា បានថែ្លងប្រតិកម្មថា លោកគាំទ្រសេចក្តីថែ្លងការណ៍នោះ ពីព្រោះតុលាការក្រុងភ្នំពេញមិនបានទុកឱកាសឲ្យកូនក្តីរបស់លោកការពារខ្លួននៅក្នុងសវនាការនោះទេ ហើយបានបិទផ្លូវមិនឲ្យប្តឹងទាស់ ប៉ុន្តែបានបើកផ្លូវឲ្យប្ដឹងឧទ្ធរណ៍។

លោក ជូង ជូងី ថ្លែងយ៉ាងដូច្នេះ ៖ «រឿងនេះជារឿងនយោបាយ ប៉ុន្តែបែរជាយកតុលាការធ្វើជាឧបករណ៍ដើម្បីដាក់ទោសអ្នកសារព័ត៌មានទៅវិញ»។

លោកបានស្នើសុំទៅតុលាការក្រុងភ្នំពេញនៅថៃ្ងពុធនេះ សុំឲ្យដោះលែងកូនក្តីរបស់លោកឲ្យមានសេរីភាពវិញ និងបានសុំសាលក្រមជាផ្លូវការពីតុលាការក្រុងភ្នំពេញដើម្បីជាសំអាងក្នុងការប្តឹងទៅតុលាការសាលាឧទ្ធរណ៍ក្នុងពេលឆាប់ៗនេះ ប៉ុន្តែលោកនៅមិនទាន់ទទួលបានចម្លើយនៅទ្បើយទេ។

ចាងហ្វាងកាសែត«ខែ្មរម្ចាស់ស្រុក» គឺលោក ហង្ស ចក្រា ត្រូវបានតុលាការក្រុងភ្នំពេញកាត់ទោសកំបាំងមុខជាបន្ទាន់កាលពីថៃ្ងទី២៦ ខែមិថុនា ឲ្យជាប់គុក១២ខែ និងផាកពិន័យជាប្រាក់៩លានរៀលក្រោមបទចោទប្រកាន់ថាផ្សាយព័ត៌មានមិនពិតនិងបរិហារកេរ្តិ៍ ក្រោមមាត្រាទី៦២និង៦៣នៃច្បាប់ព្រហ្មទណ្ឌអន្តរកាលសម័យ UNTAC។

មេធាវីរបស់លោកមិនបានចូលរួមការពារក្តីនៅក្នុងការកាត់ទោសនោះទេ នៅគ្រាដែលការស្នើសុំពន្យារពេលសវនាការនោះត្រូវបានតុលាការបដិសេធភ្លាមៗ។

លោក ហង្ស ចក្រា ត្រូវបានរដ្ឋាភិបាលកម្ពុជាប្តឹងកាលពីខែឧសភាកន្លងទៅ ក្រោមបទបរិហារកេរ្តិ៍ និងផ្សាយព័ត៌មានមិនពិត ហើយត្រូវបានសមត្ថកិច្ចនគរបាលនៅក្នុងខេត្តបាត់ដំបងចាប់ខ្លួនជាបន្ទាន់ក្នុងពេលតែប៉ុន្មានម៉ោងប៉ុណ្ណោះ ក្រោយពីតុលាការក្រុងភ្នំពេញបានប្រកាសសាលក្រមកាលពីព្រឹកថៃ្ងទី២៦ ខែមិថុនា ហើយគេបាននាំខ្លួនលោកមកឃុំនៅក្នុងគុកព្រៃស នៅទិសខាងលិចក្រុងភ្នំពេញ។

ប្រភពបានឲ្យដឹងថា លោក ហង្ស ចក្រា ត្រូវបានគេកំពុងតែដាក់ឃុំខ្លួនជាមួយនឹងពិរុទ្ធជនដទៃទៀតនៅក្នុងបន្ទប់តូចចង្អៀតមួយដែលមានមនុស្សចំនួនជាង ៤០នាក់ឯណោះ៕

បោះពុម្ព អ៊ីម៉េល

មតិ

អ្នកអាចបញ្ចេញមតិដោយបំពេញទម្រង់ខាងក្រោមនេះក្នុងទម្រង់ជាអក្សរសុទ្ធ។. មតិត្រូវតែអនុញ្ញាតដោយអ្នកសម្របសម្រួលនិងមិនបង្ហាញភ្លាមៗនៅលើទំព័រនេះទេ។ សូមអញ្ជើញត្រឡប់មកបើកទំព័រនេះម្ដងទៀតដើម្បីមើលថាតើមតិរបស់អ្នកត្រូវបានចុះផ្សាយឬអត់។