រដ្ឋមន្ត្រីក្រសួងការបរទេសកម្ពុជា លោក ហោ ណាំហុង និងឯកអគ្គរាជទូតប្រទេសជប៉ុន ប្រចាំនៅកម្ពុជាលោក ម៉ាសាហ៊្វូមី គូរ៉ូគី (Masafumi Kuroki) នៅថ្ងៃទី ១៥ ខែសីហា ឆ្នាំ ២០១១ បានចុះហត្ថលេខាទ្វេភាគី ដើម្បីទទួលជំនួយឥតសំណង ចំនួនប្រមាណ ៥៤ លានដុល្លារអាមេរិកពីប្រទេសជប៉ុន ដើម្បីអនុវត្តន៍គម្រោងសំខាន់ចំនួន ២ គឺស្ដារប្រព័ន្ធធារាសាស្ត្រ និងបង្កើនគុណភាពបរិក្ខារអប់រំផ្នែកធនធានរ៉ែ។
ការចុះហត្ថលេខា បានធ្វើឡើងក្រោមអធិបតីរបស់លោកនាយករដ្ឋមន្ត្រី ហ៊ុន សែន នៅឯក្រសួងការបរទេសកម្ពុជា។
រដ្ឋមន្ត្រីក្រសួងការបរទេសកម្ពុជា លោក ហោ ណាំហុង និងជាឧបនាយករដ្ឋមន្ត្រី មានប្រសាសន៍ក្រោយពីការចុះហត្ថលេខានោះថា ជំនួយនេះ មានសារៈសំខាន់ខ្លាំង ដល់វិស័យកសិកម្មនៅកម្ពុជា៖ «អស់លោកជ្រាបស្រាប់ហើយ ការអភិវឌ្ឍធារាសាស្ត្រជាមូលដ្ឋានសំខាន់បំផុតសម្រាប់ការផលិតស្បៀងអាហារឲ្យបានកាន់តែច្រើនឡើងៗ។ អស់លោកជ្រាបស្រាប់ហើយនៅឆ្នាំ ២០០៨ យើងសល់ (ស្រូវ) ជាង ២ លានតោន, ២០០៩ សល់ស្រូវ ៣ លានតោន និងឆ្នាំ ២០១០ យើងសល់ជាង ៣ លានតោន ជិត ៤ លានតោន ស្រូវនាំចេញ។ នៅឆ្នាំនេះ យើងសង្ឃឹមថា បានល្អទៀត។ ការអភិវឌ្ឍធនធានធារាសាស្ត្រនេះ នឹងនាំកសិកម្មយើងប្រែក្លាយជាកសិកម្មទំនើប។ យុទ្ធសាស្ត្រ របស់រាជរដ្ឋាភិបាល គឺចាត់ទុកកសិកម្មជាវិស័យអាទិភាពទី ១»។
ឯកអគ្គរាជទូតជប៉ុន ប្រចាំនៅកម្ពុជា លោក ម៉ាសាហ៊្វូមី គូរូគី មានប្រសាសន៍ថា ជំនួយសម្រាប់គម្រោងទាំងនោះ នឹងជួយបង្កើនផលិតផលកសិកម្ម និងធ្វើឲ្យប្រសើរឡើងនូវជីវភាពរស់នៅរបស់កសិករខ្មែរ។
ប្រជាពលរដ្ឋនៅឃុំទំនប់ ស្រុកបាធាយ ខេត្តកំពង់ចាម លោក ឈិន ឈូយ ថ្លែងថា កសិករខ្មែរនៅប្រើបច្ចេកទេសបូរាណនៅឡើយ ក្នុងការធ្វើកសិកម្ម និងប្រើពូជស្រូវមិនសូវល្អ ៖ «មុខរបស់ប្រជាកសិករហ្នឹង ៩៥% ដែលប្រកបជារបរកសិកម្មហ្នឹង ជាពិសេស គឺដំណាំស្រូវយើងហ្នឹង។ ការខ្វះខាត ទី១ គឺប្រជាពលរដ្ឋយើង គឺមិនទាន់ប្ដូរផ្នត់គំនិត យើងប្រើប្រាស់ពូជ និងបច្ចេកវិទ្យាថ្មីហ្នឹង គាត់នៅមានការប្រើប្រាស់ដែរ នៅមានកម្រិត។ ហើយមួយទៀត គឺខ្វះខាតប្រភពទឹកស្រោចស្រពនៅខ្វះខាតនៅឡើយ គឺមិនទាន់មានគ្រប់គ្រាន់ទេ»។
ជំនួយរបស់ប្រទេសជប៉ុន ដែលផ្ដោតលើវិស័យកសិកម្មនៅកម្ពុជា គឺនៅគ្រាដែលប្រទេសកម្ពុជា មានផែនការនាំចេញស្រូវទៅទីផ្សារបរទេសឲ្យបានចំនួនជាង ១ លានតោន នៅឆ្នាំ ២០១៥ ខាងមុខ។
ផ្អែកតាមសេចក្ដីប្រកាសព័ត៌មានរបស់ក្រសួងការបរទេសកម្ពុជា បានឲ្យដឹងថា ជំនួយជាង ៥៣ លានដុល្លារអាមេរិក គឺសម្រាប់គម្រោងកែលំអ និងស្ដារប្រព័ន្ធធារាសាស្ត្រ និងប្រព័ន្ធដោះទឹកខាងលិចបឹងទន្លេសាប។ ជំនួយ ៧ សែនដុល្លារអាមេរិក គឺសម្រាប់ធ្វើឲ្យប្រសើរឡើង នៃបរិក្ខារអប់រំសម្រាប់ផ្នែកធនធានរ៉ែនៃវិទ្យាស្ថានបច្ចេកទេសកម្ពុជា។
កាលពីខែកក្កដា ឆ្នាំ ២០១១ កន្លងទៅនេះ ប្រទេសជប៉ុន បានប្រកាសផ្ដល់ជំនួយឥតសំណងចំនួន ៣,៥៨ លានដុល្លារអាមេរិក មកឲ្យប្រទេសកម្ពុជា ដើម្បីទិញជីកសិកម្ម ដែលមានគុណភាពខ្ពស់ សម្រាប់លក់ក្នុងតម្លៃថោកឲ្យគ្រួសារកសិករខ្មែរ ចំនួន ១៦០.០០០នាក់ នៅខេត្តចំនួន ១៣។ ជីដែលមានគុណភាពខ្ពស់នោះ គឺជួយឲ្យកសិករខ្មែរទទួលបានផលស្រូវច្រើន៕