ចេត្រូ គឺជាឈ្មោះអង្គការរបស់ប្រទេសជប៉ុនមានតួនាទីសម្របសម្រួលដំណើរការពាណិជ្ជកម្មរបស់ប្រទេសជប៉ុន ជាមួយនឹងប្រទេសជាដៃគូ ដូចជាការកំណត់មុខទំនិញ លក់ចេញទិញចូលទំនិញរវាងប្រទេសជាដៃគូ និងសម្របសម្រួលទំនាក់ទំនងពាណិជ្ជកម្មជាមួយនឹងប្រទេសដៃគូផងដែរ។
លោក យ៉ាស៊ូ ហាយ៉ាស៊ី (Yasuo Hayashi) ប្រធានអង្គការចេត្រូ មានប្រសាសន៍នៅក្នុងសន្និសីទកាសែតនៅថ្ងៃទី១០ មីនានេះ នៅឯសណ្ឋាគារ ឡឺរ៉ូយ៉ាល់ (Le Royal) ថា អង្គការចេត្រូដែលបានសម្រេចចិត្តបើកការិយាល័យរបស់ខ្លួននៅទីក្រុងភ្នំពេញនៃប្រទេសកម្ពុជានៅពេលនេះ ជាឱកាសល្អសម្រាប់អង្គការនេះ។
លោក យ៉ាស៊ូ ហាយ៉ាស៊ី បានមានប្រសាសន៍ថា ៖ «ប្រទេសកម្ពុជានៅពេលនេះមានស្ថិរភាពនយោបាយល្អ និងយូរអង្វែងហើយមានឆន្ទៈល្អមែនទែន។ ប្រទេសទាំងពីរមានទំនាក់ទំនងរវាងគ្នានិងគ្នាល្អជាយូរអង្វែងមកហើយ។ ប្រទេសកម្ពុជាមានកម្លាំងពលកម្មច្រើន មានធនធានធម្មជាតិច្រើន មានធនធានមនុស្ស ដែលធ្វើឲ្យគេចាប់អារម្មណ៍យ៉ាងខ្លាំងចំពោះលក្ខណៈពិសេសនេះ»។
លោក យ៉ាស៊ូ ហាយ៉ាស៊ី បានឲ្យដឹងផងដែរថា ការិយាល័យរបស់អង្គការចេត្រូក៏បានបើកនៅក្នុងទីក្រុងហូជីមិញ ប្រទេសវៀតណាម និងទីក្រុងបាងកក ប្រទេសថៃផងដែរ។
របាយការណ៍របស់អង្គការចេត្រូដែលចេញផ្សាយនៅថ្ងៃទី១០ មីនានេះ បានឲ្យដឹងថា ការនាំទំនិញចេញចូលនៃប្រទេសទាំងពីរ ជប៉ុន-កម្ពុជា កាលពីឆ្នាំ២០០០ មានចំនួនទឹកប្រាក់ ១០២លានដុល្លារ ហើយរហូតមកដល់ឆ្នាំ២០០៩ បានកើនឡើងដល់ ២៥៥លានដុល្លារអាមេរិក។
លោក ចម ប្រសិទ្ធ រដ្ឋមន្ត្រីក្រសួងពាណិជ្ជកម្ម ដែលបានចូលរួមក្នុងពិធីបើកសម្ពោធនោះ បានស្វាគមន៍នូវការបើកការិយាល័យរបស់អង្គការចេត្រូរបស់ជប៉ុននេះ ហើយលោកបានរំពឹងថា ទំនាក់ទំនងពាណិជ្ជកម្មនៃប្រទេសទាំងពីរ កម្ពុជា-ជប៉ុន នឹងអាចរីកចម្រើនឡើងដូចក្ដីសង្ឃឹមនៅពេលនេះ។
លោក ចម ប្រសិទ្ធ បានមានប្រសាសន៍ថា ៖ «ខ្ញុំមានសង្ឃឹមច្រើនណាស់នៅលើវត្តមានរបស់ការិយាល័យនេះ។ ការបង្កើតការិយាល័យនេះនឹងជួយ ជាពិសេសគឺសិប្បករយើង ឧស្សាហករយើង និងពាណិជ្ជករយើង ក្នុងការអភិវឌ្ឍនូវផលិតផលដែលអាចនាំចេញបាន។ ជាពិសេសគឺនឹងជំរុញឲ្យទំហំពាណិជ្ជកម្មរបស់កម្ពុជាជាមួយពិភពលោក ឬពាណិជ្ជកម្មជាមួយនឹងប្រទេសជប៉ុនកាន់តែកើនថែមទៀត»។
បើតាមសេចក្តីរាយការណ៍ព័ត៌មានរបស់អង្គការចេត្រូ ការិយាល័យចេត្រូ គ្រោងនឹងបើកទ្វារនៅថ្ងៃទី១ ខែមេសា គឺខែក្រោយនេះ ដែលមានអាសយដ្ឋាននៅមជ្ឈមណ្ឌលពាណិជ្ជកម្ម ATWOOD ស្ថិតលើដងវិថីសហព័ន្ធរុស៊្សី ក្នុងសង្កាត់ទឹកថ្លា ខណ្ឌសែនសុខ ទីក្រុងភ្នំពេញ៕