ចន្ទពិសី បានធ្វើសំណូមពរទៅលោកនាយករដ្ឋមន្ត្រី ហ៊ុន សែន ជួយស្នើទៅព្រះមហាក្សត្រដើម្បីលើកលែងទោសឪពុករបស់នាងដែលកំពុងមានជំងឺធ្ងន់។ ចន្ទពិសី មានប្រសាសន៍ឲ្យវិទ្យុអាស៊ីសេរីដឹងថា នាងមានការព្រួយបារម្ភខ្លាចឪពុករបស់នាងស្លាប់ក្នុងពន្ធនាគារ ព្រោះមិនមានពេទ្យព្យាបាលជំងឺឲ្យបានដិតដល់។
កូនស្រីលោក ហង្ស ចក្រា ឈ្មោះ ហង្ស ចន្ទពិសី បានឲ្យដឹងដូច្នេះ ៖ «គាត់មានជំងឺរលាកក្រពះនិងរលាកសួតរបស់គាត់រើឡើងមកវិញ ព្រោះពីមុនគាត់មានជំងឺហ្នឹងស្រាប់ ហើយឥឡូវទទួលរងនូវជំងឺគ្រុនផ្ដាសាយមួយទៀត។ ខ្ញុំសូមឲ្យសម្ដេចតេជោ ហ៊ុន សែន ស្នើសុំទៅព្រះមហាក្សត្រឲ្យលើកលែងទោសឲ្យប៉ាខ្ញុំ»។
លោក ហង្ស ចក្រា ចាងហ្វាងកាសែតខ្មែរម្ចាស់ស្រុក ត្រូវបានតុលាការរាជធានីភ្នំពេញ កាត់ទោសឲ្យជាប់ពន្ធនាគារព្រៃសចំនួនមួយឆ្នាំ និងពិន័យជាប្រាក់ចំនួន៩លានរៀលកាលពីខែមិថុនាកន្លងទៅ ក្រោមបទផ្សាយព័ត៌មានមិនពិតនិងពីបទបរិហារកេរ្តិ៍ទាក់ទងទៅនឹងពាក្យបណ្ដឹងមួយដែលប៉ះពាល់កិត្តិយសលោកឧបនាយករដ្ឋមន្ត្រី សុខ អាន រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី។
ប្រធានប្រចាំតំបន់អាស៊ីប៉ាស៊ីហ្វិករបស់អង្គការការពារអ្នកកាសែត មានមូលដ្ឋានធំនៅប្រទេសបារាំង លោក វាំងសង់ ប្រ៊ូស្សែល (Vincent Brossel) មានប្រសាសន៍ថា ការចាប់លោក ហង្ស ចក្រា ដាក់ពន្ធនាគារ គឺជាការដើរថយក្រោយនូវសេចក្តីសន្យារបស់លោកនាយករដ្ឋមន្ត្រី ហ៊ុន សែន កាលពីប៉ុន្មានឆ្នាំមុនដែលមានប្រសាសន៍ថា លោកមិនចង់ឃើញអ្នកកាសែតជាប់ពន្ធនាគារឡើយ។
លោកមានប្រសាសន៍បែបនេះ កាលពីយប់ថ្ងៃសៅទី១៩ ខែធ្នូ បន្ទាប់ពីបានធ្វើដំណើរទស្សនកិច្ចរយៈពេល៥ថ្ងៃនៅកម្ពុជា ដើម្បីស្វែងយល់ពីស្ថានការណ៍សេរីភាពសារព័ត៌មាននៅកម្ពុជា ហើយដែលបានចូលជួបលោក ហង្ស ចក្រា នៅពន្ធនាគារព្រៃស។
លោក ប្រ៊ូស្សែល គូសបញ្ជាក់ថា លោក ហង្ស ចក្រា មិនបានប្រព្រឹត្តិល្មើសដូចការចោទប្រកាន់នោះទេ ដូច្នេះគួរទទួលបានការដោះលែងឲ្យមានសេរីភាពឡើងវិញ។
ទាក់ទងករណីលោក ហង្ស ចក្រា កាលពីថ្ងៃទី១៨ ខែធ្នូ គណៈកម្មាធិការប្រព្រឹត្តិកម្មដែលមានអង្គការសមាគមចំនួន២១ជាសមាជិក បានចេញសេចក្តីថ្លែងការណ៍ឲ្យដឹងថា ការអនុវត្តសិទ្ធិសេរីភាពសម្តែងមតិធ្វើឡើងដោយលោក ហង្ស ចក្រា មិនបានបង្កឲ្យខូចខាតដល់សណ្តាប់ធ្នាប់និងសន្តិសុខសង្គមធំដុំទេ។
លោក វ៉ា សុផល អ្នកយកព័ត៌មានឲ្យកាសែតប្រឆាំងក្នុងប្រទេសកម្ពុជា មានប្រសាសន៍ថា ៖ «បើគិតតាម២ភាគ៣ វាលើសពី២ភាគ៣ផង ដែលសម្ដេចគាត់មានប្រសាសន៍ហ្នឹង។ ទី២ បើប្រៀបធៀបជាមួយនឹងចារកម្មថៃ ទោសគាត់មិនមែនជាទោសក្បត់ជាតិ មានទោសអន្តរាយដល់ជាតិដូចចារកម្មសៀមហ្នឹងទេ»។
លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន ធ្លាប់មានប្រសាសន៍ថា ជាទូទៅការលើកលែងទោសទណ្ឌិតណាម្នាក់ ទាល់តែមានសំណើចេញពីនាយករដ្ឋមន្ត្រីទើបព្រះមហាក្សត្រអាចឡាយព្រះហស្ដលេខាលើកលែងទោស ឬក៏បន្ទូរបន្ថយទោសបាន។ លោកបញ្ជាក់ថា ករណីលោក ហង្ស ចក្រា លោកនឹងអន្តរាគមន៍ដោះស្រាយ៕