ស្នងការប៉ូលិសរាជធានីភ្នំពេញ លោកឧត្តមសេនីយ៍ ទូច ណារ៉ុថ បានមានប្រសាសន៍ថា លោកក៏សោកស្តាយដែរដោយសារតែមិនអាចបន្តសាកសួរព័ត៌មានពីក្រុមគ្រួសារជនរងគ្រោះ ប៉ុន្តែលោកបញ្ជាក់ថា កិច្ចសហការរវាងអាជ្ញាធរខ្មែរជាមួយនឹងអេហ្វប៊ីអាយក្នុងការតាមចាប់ជនសង្ស័យនៅតែបន្តទេ។
លោកឧត្តមសេនីយ៍ ទូច ណារ៉ុថ បានមានប្រសាសន៍ថា ៖ «យើងត្រូវការព័ត៌មានច្រើនពីក្រុមគ្រួសារ ជាពិសេសថ្មីៗនេះ យើងបានសហការជាមួយ FBI លើកសំណួរមួយចំនួនដើម្បីសួរទៅក្រុមគ្រួសារហ្នឹង ក៏ប៉ុន្តែបើក្រុមគ្រួសារទៅ វាត្រូវបាត់ចំណុចមួយចំនួនដែលយើងចង់បាន។ ក៏ប៉ុន្តែវាមិនធ្វើឲ្យអាក់ខានរបស់យើងទេ យើងនៅតែធ្វើអ៊ីចឹង»។
មិនមានសេចក្តីរាយការណ៍បញ្ជាក់ថា តើក្រុមគ្រួសាររបស់លោក ឃឹម សម្បូរណ៍ ដែលបានភៀសខ្លួនចាកចេញនោះ កំពុងតែស្ថិតនៅប្រទេសណាមួយនោះទេ ប៉ុន្តែក្រុមសិទ្ធិមនុស្សបានបង្ហើបថា ក្រុមគ្រួសារ លោក ឃឹម សម្បូរណ៍ បានចាកចេញទៅក្រៅប្រទេសអស់រយៈពេល៣សប្តាហ៍មកហើយ។
មន្ត្រីអង្គការសិទ្ធិមនុស្សអាដហុក លោក ច័ន្ទ សាវ៉េត បានថ្លែងថាក្រុមគ្រួសារ លោក ឃឹម សម្បូរណ៍ បានថ្លែងថា គេមានការបារម្ភនឹងសុវត្ថិភាពទើបបាននាំគ្នាចាកចេញទៅនោះ។
លោក ច័ន្ទ សាវ៉េត បានមានប្រសាសន៍ថា ៖ «គាត់មានការព្រួយបារម្ភ ដោយសារថាការស្រាវជ្រាវរបស់អាជ្ញាធរមានសមត្ថកិច្ច មានភាពយឺតយ៉ាវ ដោយសារថាសុវត្ថិភាពសន្តិសុខរបស់គាត់ ហាក់បីដូចជាមិនធានាសោះ។ ព្រោះថា ចាប់តាំងពីក្រុមគ្រួសារគាត់ត្រូវបានគេសម្លាប់មក គាត់ថាមានមនុស្សតាមឃ្លាំមើលគាត់ជាប់ជានិច្ច តាមពិនិត្យមើលស្ថានភាពរបស់គាត់ ហើយមានអាជ្ញាធរខ្លះបានសាកសួរគាត់ជារឿយៗទៀត។ អ៊ីចឹងវាជាហេតុផលធ្វើឲ្យគាត់ពិបាកក្នុងការរស់នៅ»។
ប៉ូលិសបាននិយាយថា តាមពិតគេបានរកឃើញតម្រុយខ្លះដែលគេបានសង្ស័យថា ជាប់ពាក់ព័ន្ធនឹងករណីឃាតកម្ម កាលពីខែល្ងាចថ្ងៃទី១១ កក្កដាកន្លងមកនោះ ហើយការដែលបានសង្ស័យនោះគឺបណ្តាលមកពីមានការយល់ឃើញយ៉ាងនេះ។
ប៉ូលិសដដែលបានឲ្យដឹងថា ៖ «ជនល្មើសវាមកទន្ទឹម បាញ់។ បាញ់ហើយ ទៅហួស ហួសទៅហើយបកមកវិញ។ ធម្មតាជនល្មើសបើវាបាញ់ត្រូវគោលដៅដែលវាចង់បានហើយ វាគេចខ្លួនភ្លាមហើយ ក៏ប៉ុន្តែនេះបកមកវិញ បាញ់កូន១គ្រាប់ចំទ្រូងពីមុខ ហើយបានជិះត្រឡប់ក្រោយទៅ។ ខ្ញុំបានរាយការណ៍ជូន FBI គេក៏ឯកភាពដែរ យើងអាចថាជនល្មើសហ្នឹងបាញ់មិនត្រូវគោលដៅទេ ព្រោះវាងងឹត។ ដូច្នេះពេលមកដល់ឃើញថា បាញ់មិនត្រូវគោលដៅជិះហួសហើយ បកមកវិញបាញ់ជនរងគ្រោះជាកូន១គ្រាប់។ ដូច្នេះបានយើងមានតម្លៃថា វាអាចពាក់ព័ន្ធគំនុំនឹងជនរងគ្រោះជាកូន។ ដល់ពេលដែលត្រូវគ្រាប់ហើយ កូនបានទូរស័ព្ទទៅមន្ទីរពេទ្យនោះដែលស្គាល់ហ្នឹងថា ឲ្យយកសាមុយមកយកផង ខ្លួនត្រូវគេបាញ់ដោយសារគំនុំ នេះដែលយើងចាប់អារម្មណ៍។ បញ្ហានេះយើងបានព័ត៌មានតាំងពីយប់ហ្នុងម្ល៉េះ»៕