«សំឡេងម៉ាស៊ីនថត»៖ សំឡេងម៉ាស៊ីនថតរូបលាន់សូរដូចកាំភ្លើងយន្តក្នុងសមរភូមិ។ អ្នកកាសែតជិត ២០០នាក់ឈរប្រជ្រៀតគ្នាថតរូបក្នុងបន្ទប់ប្រជុំរបស់មេដឹកនាំកំពូលៗ ជាពិសេសពួកគេព្យាយាមថតយករូបភាពលោកប្រធានាធិបតីសហរដ្ឋអាមេរិក បារ៉ាក់ អូបាម៉ា (Barack Obama) ដែលគេកម្រឃើញមុខនៅប្រទេសកម្ពុជា ដ៏តូចនេះ។
អ្នកកាសែតម្នាក់ៗប្រឹងធ្វើការយ៉ាងឆក់កណ្ដៀត ព្រោះពួកគេដឹងថា ក្រុមអង្គរក្សនឹងនាំខ្លួនពួកគេចេញពីទីនេះនៅពេលឥឡូវនេះហើយ។
ក្រុមអ្នកកាសែតជាតិ និងអន្តរជាតិខ្លះបានរអ៊ូរទាំចំពោះវិធានការរឹតបន្តឹងសន្តិសុខនេះ ព្រោះនាំឲ្យប៉ះពាល់ដល់ការងារអ្នកសារព័ត៌មាន។
លោក តាំង ឈិនសុទ្ធី អ្នកថតរូបទីភ្នាក់ងារបារាំង អា.អេហ្វ.ប៉េ (AFP) បានរអ៊ូថា លោកមិនពេញចិត្តការបន្តឹងសន្តិសុខនៅអាកាសយានដ្ឋានអន្តរជាតិភ្នំពេញ ពេលលោក បារ៉ាក់ អូបាម៉ា មកដល់ និងត្រឡប់ទៅវិញទេ ដោយគេហាមអ្នកកាសែតចូលជិតប្រលាន។
ទោះយ៉ាងណា លោកកោតសរសើរចំពោះវិធានការរដ្ឋាភិបាលការពារសន្តិសុខថ្នាក់ដឹកនាំអាស៊ាននៅវិមានសន្តិភាព។
អ្នកកាសែតដទៃទៀត ក៏មិនពេញចិត្តចំពោះវិធានការរឹតបន្តឹងសន្តិសុខនេះដែរ។ ក៏ប៉ុន្តែក្រុមអង្គរក្សបានឆ្លើយថា តួនាទីរបស់ពួកគេគឺការពារសន្តិសុខ និងអាយុជីវិតថ្នាក់ដឹកនាំសំខាន់ជាងការងារកាសែត។
ក្រៅពីបញ្ហាសន្តិសុខ ក្រុមអ្នកកាសែតខ្លះក៏ជួបបញ្ហាមួយទៀតដែរ គឺខ្វះប័ណ្ណអនុញ្ញាតសម្រាប់ចូលទៅយកព័ត៌មានក្នុងកិច្ចប្រជុំប្រធានបទខុសៗ និងទីកន្លែងខុសៗគ្នា នៅវិមានសន្តិភាពក្រោមការយាមកាមពីក្រុមអង្គរក្សជាច្រើននាក់យ៉ាងតឹងរ៉ឹង។
អ្នកយកព័ត៌មានកាសែតភ្នំពេញ ប៉ុស្ដិ៍ (Phnom Penh Post) មិនយល់ទាស់អំពីវិធានការការពារសន្តិសុខទេ តែបែរជាមិនពេញចិត្តរឿងចែកចាយប័ណ្ណអនុញ្ញាតឲ្យអ្នកកាសែតចូលបន្ទប់ប្រជុំយកព័ត៌មានទៅវិញ។
ប្រទេសកម្ពុជា បានទទួលធ្វើជាម្ចាស់ផ្ទះប្រធានកិច្ចប្រជុំកំបូលអាស៊ានលើកទី២១ ដែលប្រព្រឹត្តទៅចាប់ពីថ្ងៃទី១៨ ដល់ថ្ងៃទី២០ វិច្ឆិកា ឆ្នាំ២០១២។
មន្ត្រីក្រសួងព័ត៌មានឲ្យដឹងថា ព្រឹត្តិការណ៍ដ៏ធំនេះមានអ្នកកាសែតជាតិ អន្តរជាតិ សរុបចំនួនជាង ២.៣០០នាក់ មកយកព័ត៌មានកិច្ចប្រជុំកំពូលនេះ។
ទាក់ទងទៅនឹងបញ្ហាខ្វះខាតប័ណ្ណអនុញ្ញាតចែកឲ្យអ្នកកាសែតនេះ លោក ព្រំ សាន ប្រធានការិយាល័យមជ្ឈមណ្ឌលព័ត៌មាននៃក្រសួងព័ត៌មាន។ លោកបានទទួលស្គាល់ថា មានបញ្ហាដូច្នេះមែន។ លោកថា ធម្មតាព្រឹត្តិការណ៍ធំៗដូច្នេះ តែងតែមានបញ្ហាបន្តិចបន្តួចដូច្នេះចៀសមិនរួច ក៏ប៉ុន្តែត្រូវបានមន្ត្រីរបស់លោកជួយសម្រួលបានទាន់ពេលវេលាដែរ។
ទន្ទឹមនឹងមានបញ្ហាខ្លះៗដូច្នេះ លោក ប៊ុត បូវុត អគ្គនាយក អគ្គនាយកដ្ឋាននៃក្រសួងព័ត៌មាន បានរៀបរាប់ពីកិច្ចប្រឹងប្រែងរបស់ក្រសួងព័ត៌មាន ក្នុងការរៀបចំមជ្ឈមណ្ឌល និងប្រព័ន្ធការងារសម្រាប់អ្នកកាសែតដូចផ្ដល់កុំព្យូទ័រ ៣០០គ្រឿង ភ្ជាប់សេវាអ៊ិនធឺណិត វ៉ាយហ្វាយ (Wifi) និងផ្ដល់សេវាអ៊ិនធឺណិត វ៉ាយហ្វាយ ២០០ខ្សែទៀត សម្រាប់អ្នកកាសែតប្រើប្រាស់កុំព្យូទ័រផ្ទាល់ខ្លួន។ តែលោកថា ទោះយ៉ាងណា ការផ្ដល់សេវាអ្នកកាសែតនៅតែជួបបញ្ហាម្ដងៗដែរ។
ទោះយ៉ាងណា លោករដ្ឋមន្ត្រីក្រសួងព័ត៌មាន ខៀវ កាញារីទ្ធ បានថ្លែងប្រាប់អ្នកសែតថា ការរៀបចំមណ្ឌលបម្រើសេវាព័ត៌មានដែលមាននិស្សិតស្ម័គ្រចិត្តជាង ១០០នាក់ ចូលរួមក្នុងព្រឹត្តិការកិច្ចប្រជុំកំពូលអាស៊ាននេះ ដំណើរការបានជោគជ័យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។