ការអំពាវនាវរបស់លោក ខៀវ កាញារីទ្ធ ដូច្នេះ បានធ្វើឡើងនៅឯក្លឹបអ្នកកាសែតកម្ពុជា (CCJ) ក្នុងឱកាសបិទវគ្គចែកវិញ្ញាបនបត្រដល់សិក្ខាកាមអ្នកសារព័ត៌មានចំនួន ៥៥រូបដែលបានបញ្ចប់វគ្គមូលដ្ឋានគ្រឹះសារព័ត៌មាន ច្បាប់ និងក្រមសីលធម៌សារព័ត៌មាន នៅព្រឹកថ្ងៃទី១៨ ខែមីនា ឆ្នាំ២០១០។
នៅក្នុងឱកាសចែកវិញ្ញាបនបត្រនេះដែរ លោករដ្ឋមន្រ្តីក្រសួងព័ត៌មាន ខៀវ កាញារីទ្ធ បានកត់សម្គាល់និងលើកឡើងអំពីបញ្ហាខុសវិជ្ជាជីវៈរបស់អ្នកសារព័ត៌មានដូច្នេះ ៖ «ជារៀងរាល់ពេលយើងបានឮអំពីអ្នកកាសែតទៅជំរិតលុយ ទៅកាងឈើ ទៅរត់ពន្ធនេះ រត់ពន្ធនោះ ហើយក៏ឮអំពីអ្នកកាសែតក៏ត្រូវគេចាប់ខ្លួនដែរ។ ប៉ុន្តែបើយើងសង្កេតឲ្យមែនទែនទៅយើងឃើញថា អ្នកកាសែតដែលប្រព្រឹត្តខុសនោះ ភាគច្រើនមិនដែលសរសេរបានមួយអត្ថបទណាទេ ហើយក៏មិនសូវដែលបានឆ្លងកាត់សាលារៀនសាលាអីទេ គឺមកយកតែប័ណ្ណកាសែត បើកកាសែតទៅ ហើយយកវិជ្ជាជីវៈនេះទៅរកស៊ីផ្ដេសផ្ដាស»។
ចំពោះសំណួរលើកឡើងថា នៅពេលដែលសារព័ត៌មានខ្លះបានប្រព្រឹត្តខុសដូច្នេះ តើហេតុដូចម្តេចបានជាក្រសួងព័ត៌មាននៅតែចេញប័ណ្ណអនុញ្ញាតឲ្យអ្នកកាសែតទាំងនោះ?
លោក ខៀវ កាញារីទ្ធ មានប្រសាសន៍ពន្យល់ថា ការបើកធ្វើកាសែត គឺជាផ្នែកមួយនៃសេរីភាពខាងសារព័ត៌មាន និងជាផ្នែកមួយនៃសេរីភាពបញ្ចេញមតិ។ ដូច្នេះដរាបណាចាងហ្វាងកាសែតមិនបានប្រព្រឹត្តកំហុសព្រហ្មទណ្ឌណាមួយទេ គេមិនអាចឃាត់ឃាំងសេរីភាពនេះបានឡើយ។
ប្រសាសន៍របស់លោក ខៀវ កាញារីទ្ធ ត្រូវបានប្រធានសមាគមមិត្តអ្នកសារព័ត៌មានខ្មែរ លោក ឱម ច័ន្ទតារា ថ្លែងថា អ្នកសារព័ត៌មានទាំងឡាយណាដែលប្រព្រឹត្តខុសវិជ្ជាជីវៈ និងក្រមសីលធម៌សារព័ត៌មាន នឹងត្រូវប្រឈមមុខចំពោះមុខច្បាប់។
លោក ឱម ច័ន្ទតារា បន្តថា ៖ «យើងទទួលស្គាល់ថា មានអ៊ីចឹងខ្លះដែរ តែក៏មានអ្នកដែលគេគោរពវិជ្ជាជីវៈដែរ។ បញ្ហាដែលខ្ញុំចង់សំណូមពរគឺជាមួយនឹងបញ្ហាដែលសំខាន់ គឺទាមទារឲ្យមានតម្លាភាពទាំងអស់គ្នា។ អ្នកកាសែតក៏ត្រូវគោរពវិជ្ជាជីវៈ ហើយមន្ត្រីជំនាញផ្សេងៗក៏ត្រូវគោរពវិជ្ជាជីវៈដែរ កុំប្រព្រឹត្តខុសច្បាប់ទាំងអស់គ្នា»។
ទន្ទឹមគ្នានេះដែរ ដើម្បីពង្រឹងវិជ្ជាជីវៈ និងលើកតម្កើងតួនាទីរបស់អ្នកសារព័ត៌មាននៅកម្ពុជា លោក ខៀវ កាញារីទ្ធ មានប្រសាសន៍អំពាវនាវថា ៖ «ក្លឹបអ្នកកាសែតកម្ពុជា ក៏ដូចសមាគមអ្នកកាសែតកម្ពុជា ជាពិសេសរបស់ខុនរ៉ាដ... ក្នុងការបណ្ដុះបណ្ដាលនេះ ជាជំហានៗវានឹងធ្វើឲ្យតួនាទីរបស់អ្នកកាសែតនៅក្នុងសង្គមកម្ពុជាយើងមានតួនាទីកាន់តែល្អឡើង ដែលជាការមួយលើកតម្កើងតួនាទីរបស់យើងនេះ»។
លោករដ្ឋមន្រ្តីក្រសួងព័ត៌មាន ខៀវ កាញារីទ្ធ បានថ្លែងឲ្យដឹងផងដែរថា នៅក្នុងប្រទេសកម្ពុជា មានសមាគមអ្នកកាសែតចំនួន២២ ហើយលោក ប៉ែន សមិទ្ធិ ប្រធានក្លឹបអ្នកកាសែតកម្ពុជា មានប្រសាសន៍បន្ថែមថា មានសារព័ត៌មាននិងអង្គការព័ត៌មានប្រមាណ៤០០ ដែលកំពុងប្រតិបត្តិការសព្វថ្ងៃនេះ៕