លោក សុខ សុវណ្ណ ប្រធានសមាគមអ្នកសារព័ត៌មានខ្មែរប្រជាធិបតេយ្យ មានប្រសាសន៍ថា សមាគមលោកមានការព្រួយបារម្ភជាខ្លាំងចំពោះច្បាប់ព្រហ្មទណ្ឌថ្មី ដែលរដ្ឋាភិបាលបានអនុម័តរួចហើយនេះបានដាក់សម្ពាធកាន់តែធ្ងន់ធ្ងរទៅលើអ្នកសារព័ត៌មាននៅកម្ពុជា។
លោកមានប្រសាសន៍ដូច្នេះក្នុងសន្និបាតលើកទី២របស់ក្រុមប្រឹក្សាសារព័ត៌មានកម្ពុជា កាលពីថ្ងៃទី២២ ខែធ្នូ នារាជធានីភ្នំពេញ ក្រោមប្រធានបទស្តីអំពី "អតីតកាល បច្ចុប្បន្នភាពនិងអនាគត" ស្តីពីនយោបាយប្រព័ន្ធផ្សព្វផ្សាយនៅកម្ពុជា ដែលមានតំណាងសមាគមកាសែតចំនួន១៤ចូលរួម។
លោក សុខ សុវណ្ណ មានប្រសាសន៍ដូច្នេះ ៖ «យើងមានការព្រួយបារម្ភពីច្បាប់ព្រហ្មទណ្ឌថ្មីដែលធ្វើឲ្យអ្នកកាសែតកំពុងតែវិលវល់ ហើយបើសិនជាច្បាប់ហ្នឹងចេញជាផ្លូវការយើងមានបញ្ហាពាក់ព័ន្ធនឹងការថតសំឡេង ពាក់ព័ន្ធនឹងការសុំព័ត៌មាននិងចុះផ្សាយ គឺយើងមានទោសកំហុសច្រើន។ ខ្ញុំជឿថា បើសិនជាច្បាប់ហ្នឹងយកអនុវត្តសម្រាប់អ្នកកាសែត គឺគ្រោះថ្នាក់បំផុត ហើយអ្នកកាសែតនឹងមានកំហិតក្នុងការសរសេរ ក្នុងការបញ្ចេញមតិ»។
លោក សុខ សុវណ្ណ គូសបញ្ជាក់ថា នៅកម្ពុជាបើទោះបីជាមានច្បាប់ស្តីពីរបបសារព័ត៌មានបែបណាក៏ដោយ ក៏ប៉ុន្តែច្បាប់នេះមិនបានបម្រើ ឬក៏អាចជួយការពារដល់អ្នកកាសែតនៅពេលមានបញ្ហាខុសឆ្គងម្តងម្កាលក្នុងការបោះពុម្ភផ្សាយរបស់ខ្លួននោះទេ ព្រោះពេលមានបញ្ហាប្រឈមផ្លូវច្បាប់ តុលាការមិនបានយកច្បាប់ស្តីពីរបបសារព័ត៌មានយកមកធ្វើការជំនុំជម្រះក្តីឡើយ ផ្ទុយទៅវិញតែងយកច្បាប់ព្រហ្មទណ្ឌអន្តរកាលសម័យអ៊ុនតាក់យកមកដាក់ទោសទណ្ឌអ្នកកាសែតទៅវិញ។
លោក សេក បរិសុទ្ធ នាយកកម្មវិធីប្រព័ន្ធផ្សព្វផ្សាយអង្គការ DANIDA និងជាអ្នកកាសែតជើងចាស់មួយរូបផងនោះ ដែលបានចូលរួមជាវាគ្មិនក្នុងសន្និបាត ក៏បានសម្តែងការព្រួយបារម្ភផងដែរចំពោះច្បាប់ព្រហ្មទណ្ឌថ្មីដែលរដ្ឋាភិបាលបានអនុម័តរួចហើយ ហើយដែលនឹងចូលជាធរមាននៅពេលដ៏ឆាប់ខាងមុខថា អាចប៉ះពាល់ខ្លះដល់អ្នកសារព័ត៌មានក្នុងការប្រកបវិជ្ជាជីវៈរបស់ខ្លួន។
លោក សេក បរិសុទ្ធ បានថ្លែងដូច្នេះ ៖ «ការវិវត្តន៍ថ្មីមួយទៀតគឺច្បាប់ព្រហ្មទណ្ឌ ហើយបើទោះបីជាមិនទាន់បានចូលជាធរមាន ក៏វានឹងចូលជាធរមានឆាប់ៗនេះដែរ ហើយច្បាប់សារព័ត៌មាននេះក៏ជាឧបករណ៍មួយដ៏សំខាន់ណាស់ដែរ ដែលវាអាចប៉ះពាល់ដល់អ្នកកាសែត បទបរិហារកេរ្ដិ៍បទផ្សាយព័ត៌មានមិនពិត បទញុះញង់ បទប្រមាថជាដើម។ ទាំងអស់នេះហើយគឺជាការប្រឈមសម្រាប់អ្នកកាសែតក្នុងការបំពេញតួនាទីរបស់ខ្លួនទៅមុខទៀតនេះ»។
ក្តីព្រួយបារម្ភនេះត្រូវបានលោក ថាច់ ផែន អនុរដ្ឋលេខាធិការក្រសួងព័ត៌មានពន្យល់ថា អ្នកសារព័ត៌មានមិនគួរមានការព្រួយបារម្ភខ្លាំងពេកទេជុំវិញច្បាប់ព្រហ្មទណ្ឌថ្មីនេះ ព្រោះថា ឲ្យតែអ្នកកាសែតគោរពបាននូវក្រមសីលធម៌វិជ្ជាជីវៈជាអ្នកសារព័ត៌មានបានត្រឹមត្រូវនោះ គឺមិនប៉ះពាល់អ្វីដល់សេរីភាពសារព័ត៌មាន ឬក៏អាជីពជាអ្នកកាសែតឡើយ។
លោក ថាច់ ផែន មានប្រសាសន៍ថា ៖ «ប្រតិបត្តិតាមក្រមសីលធម៌ វិជ្ជាជីវៈរបស់យើង ដូច្នេះមុននឹងមានបញ្ហាអីមួយក៏យើងមានមូលដ្ឋានច្បាស់លាស់»។
នៅក្រោយមានកិច្ចព្រមព្រៀងទីក្រុងប៉ារីស ២៣ តុលា អ្នកកាសែតកម្ពុជាបានប្រឈមមុខនូវការគំរាមកំហែង និងបានស្លាប់បាត់បង់ជីវិតអស់ជាច្រើននាក់ចំពោះការបំពេញកាតព្ធកិច្ចរបស់ខ្លួន ជាពិសេសចាប់ពីឆ្នាំ១៩៩៤ ដល់១៩៩៩ ដែលរហូតមកដល់ពេលនេះ សមត្ថកិច្ចពុំទាន់រកឃើញឃាតករ ឬអ្នកនៅពីក្រោយការសម្លាប់យកមកផ្តន្ទាទោសនៅឡើយ ហើយពេលថ្មីៗនេះ អ្នកកាសែតចំនួនពីរនាក់កំពុងជាប់ក្នុងពន្ធនាគារនៅឡើយ ក្រោមបទចោទប្រកាន់ផ្សាយព័ត៌មានមិនពិតនិងបរិហារកេរ្តិ៍៕