ជប៉ុនគ្រោងផ្ដល់ថវិកាជាង១ពាន់លានដុល្លារសម្រាប់បោសសម្អាតមីននៅកម្ពុជា
ដោយ សាវយុត
2009-10-06
មន្ត្រីការបរទេសជប៉ុនបានឲ្យដឹងថា រាជរដ្ឋាភិបាលជប៉ុនមានគម្រោងនឹងផ្តល់ប្រាក់ចំនួនប្រមាណជាង១ពាន់លានដុល្លារសហរដ្ឋអាមេរិកមកឲ្យប្រទេសកម្ពុជានាពេលខាងមុខសម្រាប់យកទៅប្រើប្រាស់លើសកម្មភាពមនុស្សធម៌បោសសម្អាតមីននៅក្នុងប្រទេសនេះ។
អ្នកដោះមីនរបស់ស៊ីម៉ាក (CMAC) រៀបចំកម្ទេចគ្រាប់មីន កាលពីថ្ងៃ២៩ កញ្ញា ២០០៦។
លោក កាស៊ូអុ កូដាម៉ា (Kazuo Kodama) ជាលេខាធិការព័ត៌មានរបស់មន្ត្រីការបរទេសជប៉ុន បានមានប្រសាសន៍ក្នុងសន្និសីទកាសែតចុងក្រោយនៃការបញ្ចប់កិច្ចប្រជុំក្រុមរដ្ឋមន្ត្រីការបរទេសមេគង្គ-ជប៉ុន កាលពីល្ងាចថ្ងៃសៅរ៍ ទី៣ ខែតុលា ថា តាមរដ្ឋមន្ត្រីការបរទេសជប៉ុន លោក កាត់ស៊ូយ៉ា អូកាដា (Katsuya Okada) បានថ្លែងក្នុងជំនួបរវាងរដ្ឋមន្ត្រីការបរទេសជប៉ុននិងរដ្ឋមន្ត្រីការបរទេសខ្មែរ គឺជប៉ុនមានគម្រោងផ្តល់ជំនួយជាទឹកប្រាក់ប្រមាណជាង១ពាន់លានដុល្លារសហរដ្ឋអាមេរិកទៅឲ្យប្រទេសខ្មែរសម្រាប់ជួយដល់សកម្មភាពបោសសម្អាតមីន។
លោក កាស៊ូអុ កូដាម៉ា បានមានប្រសាសន៍ថា ៖ "ប្រទេសជប៉ុនមានគម្រោងផ្ដល់ប្រាក់ជាង១ពាន់លានដុល្លារសម្រាប់សកម្មភាពបោសសម្អាតមីននៅកម្ពុជា ប៉ុន្តែពេលវេលានៃការផ្ដល់ជំនួយ លោកពុំទាន់ដឹងច្បាស់នៅឡើយទេ"។
មន្រ្តីមជ្ឈមណ្ឌលកម្ចាត់មីនកម្ពុជាបានមានប្រសាសន៍ថា រយៈពេលជាង១០ឆ្នាំកន្លងមកនេះ ជំនួយប្រទេសជប៉ុនដែលផ្តល់សម្រាប់សកម្មភាពបោសសម្អាតមីន គឺផ្តល់តាមរយៈទេ្វភាគីជួយទៅខាងកងឯកភាពកម្ចាត់មីនទី៤នៅឯខេត្តសៀមរាបមួយកន្លែង និងកងឯកភាពកម្ចាត់មីនទី២នៅខេត្តបាត់ដំបងមួយកន្លែងទៀត ដែលក្នុងមួយឆ្នាំៗគិតជាទឹកប្រាក់ប្រមាណជាង១លានដុល្លារអាមេរិក ហើយក្រៅពីជំនួយទឹកប្រាក់គឺនៅមានជំនួយសម្ភារៈដូចជាឧបករណ៍រាវមីន គ្រឿងចក្រ រថយន្តនិងឧបករណ៍គ្រប់មុខ គិតជាប្រាក់ក្នុងមួយដំណាក់កាលៗចាប់ពី៥លានដុល្លារឡើងទៅ។
ប្រធានក្រុមប្រឹក្សាភិបាលមជ្ឈមណ្ឌលកម្ចាត់មីនកម្ពុជា ស៊ីម៉ាក (CMAC) លោក ខឹម សោភ័ណ បានមានប្រសាសន៍ថា ជំនួយទឹកប្រាក់ប្រមាណជាង១ពាន់លានដុល្លារសហរដ្ឋអាមេរិកនោះ គឺស្រុកខ្មែរអាចយកទៅប្រើប្រាស់សម្រាប់សកម្មភាពបោសសម្អាតមីនបានប្រហែល២០ឆ្នាំតទៅមុខទៀត ហើយរំពឹងថា អត្រាគ្រោះថ្នាក់នៃអ្នករងគ្រោះដោយសារគ្រាប់មីនពេលនោះអាចនឹងថយចុះទាប។
លោក ខឹម សោភ័ណ បានបញ្ជាក់ថា ៖ «១ពាន់លានជាង យើងអាចនឹងប្រើបានប្រហែលជាង២០ឆ្នាំទៅមុខទៀត។ អាចគ្រប់គ្រាន់ហើយ ពីព្រោះបច្ចុប្បន្ននេះយើងឃើញថា ចម្ការមីនក៏នៅតែចម្ការតូចៗ ហើយនិងអត្រាគ្រោះថ្នាក់របស់ប្រជាពលរដ្ឋយើងក៏បានធ្លាក់ចុះ»។
មន្ត្រីមជ្ឈមណ្ឌលសកម្មភាពកម្ចាត់មីននៅកម្ពុជា ស៊ីម៉ាក បានមានប្រសាសន៍ថា ពេលបច្ចុប្បន្ននេះចំនួនអ្នករងគ្រោះដោយសារគ្រាប់មីននៅតែមានក្នុងទឹកដីខេត្តមួយចំនួននៅភាគពាយព្យ គឺខេត្តបាត់ដំបងមានចំនួនអ្នករងគ្រោះច្រើនជាងគេ បន្ទាប់មកនៅប៉ៃលិន ខេត្តឧត្តរមានជ័យនិងខេត្តព្រះវិហារនៅជាប់តំបន់ព្រំដែនខ្មែរ-ថៃ។ ក៏ប៉ុន្តែទោះជាយ៉ាងណា ចំនួនអ្នករងគ្រោះដោយសារគ្រាប់មីនក្នុង៨ខែឆ្នាំនេះមានចំនួនតែ១៨៥នាក់ប៉ុណ្ណោះ គឺមានការថយចុះច្រើនបើប្រៀបធៀបទៅនឹងឆ្នាំ២០០០ដល់ឆ្នាំ២០០៥ យ៉ាងហោចណាស់ចំនួនអ្នករងគ្រោះដោយសារមីនគឺរហូតដល់ទៅ៨០០នាក់ក្នុងមួយឆ្នាំៗ៕
អត្ថបទដែលទាក់ទង
ប៉ូលិសនៅតាកែវរងការចោទថាបង្កឲ្យស្រ្តីមានផ្ទៃពោះមួយរូបមានគ្រោះថ្នាក់
ប៉ូលិសចរាចរណ៍ក្រុងពោធិ៍សាត់វាយយុវជនម្នាក់ឲ្យរងរបួស
គ្រូបង្រៀននៅកំពង់ចាមទាមទារឲ្យក្រសួងអប់រំដោះស្រាយប្រាក់អតីតភាព
អង្គការសេដាក់គ្រោងនាំអង្ករសរីរាង្គទៅទីផ្សារអឺរ៉ុបនិងអាមេរិក
អាជ្ញាធរស្វែងរកការបិទមន្ទីរព្យាបាលជំងឺមួយនៅរតនគិរី
អតីតប្រធានាធិបតីអាមេរិកសម្ពោធផ្ទះសម្រាប់ជនក្រីក្រនៅខែត្រកណ្ដាល
ទីតាំងផលិតប្រេងម្រះព្រៅភ្នំ២កន្លែងនៅពោធិ៍សាត់ត្រូវបានកម្ទេច
គណៈកម្មការខ្មែរម្ចាស់ស្រុកនឹងរៀបចំកិច្ចប្រជុំស្ដីពីបញ្ហានៅកម្ពុជា
អាជ្ញាធរខេត្តឧត្ដរមានជ័យរារាំងរថយន្តដឹកព្រះពុទ្ធបដិមារបស់ម៉មសូណង់ដូ
