ពិធីចុះហត្ថលេខានោះបានធ្វើទ្បើងនៅឯក្រសួងការបរទេសកម្ពុជា រវាងលោក ហោ ណាំហុង ឧបនាយករដ្ឋមន្រ្តីនិងជារដ្ឋមន្រ្តីក្រសួងការបរទេសកម្ពុជា ជាមួយនិងលោក Katsuhiro Shinohara ជាឯកអគ្គរាជទូតប្រទេសជប៉ុនប្រចាំនៅក្នុងប្រទេសកម្ពុជា ក្រោមអធិបតីភាពរបស់លោកនាយករដ្ឋមន្រ្តី ហ៊ុន សែន និងមន្រ្តីពាក់ព័ន្ធជាច្រើនរូបទៀត។
លោក ហោ ណាំហុង ជាឧបនាយករដ្ឋមន្រ្តីនិងជារដ្ឋមន្រ្តីក្រសួងការបរទេសកម្ពុជា បានមានប្រសាសន៍ក្រោយពីការចុះហត្ថលេខានោះថា ជំនួយនឹងប្រាក់កម្ចីនេះមានសារសំខាន់សម្រាប់គម្រោងការអភិវឌ្ឍន៍នៅក្នុងប្រទេសកម្ពុជា។
លោក ហោ ណាំហុង បានមានប្រសាសន៍ថា ៖ «សម្រាប់អភិវឌ្ឍកំពង់ផែទីក្រុងព្រះសីហនុ ដើម្បីកសាងចំណតទទួលទំនិញអត់វេចខ្ចប់។ មានន័យថា ទំនិញដឹកមកទាំងកប៉ាល់មកតែម្ដង អត់មានវេចខ្ចប់អី យើងមានលទ្ធភាពទទួលបានទៅអនាគត ព្រមទាំងទីតាំងផ្គត់ផ្គង់ប្រេងនៅកំពង់ផែទីក្រុងព្រះសីហនុនេះ ព្រមទាំងហេដ្ឋារចនាសម្ព័ន្ធនៅកំពង់ផែនេះ»។
លោក Katsuhiro Shinohara ជាឯកអគ្គរាជទូតនៃប្រទេសជប៉ុនប្រចាំនៅក្នុងប្រទេសកម្ពុជា បានមានប្រសាសន៍ក្រោយពីការចុះហត្ថលេខានោះថា ជំនួយនិងប្រាក់កម្ចីនេះនឹងជួយពន្លឿនការអភិវឌ្ឍនៅក្នុងប្រទេសកម្ពុជា ហើយប្រទេសជប៉ុននៅតែជាប្រទេសផ្តល់ជំនួយធំជាងគេសម្រាប់ប្រទេសកម្ពុជា។
លោក សុន ឆ័យ តំណាងរាស្រ្តខាងគណបក្សសមរង្ស៊ី បានមានប្រសាសន៍អត្ថាធិប្បាយថា ជំនួយនានារបស់ប្រទេសជប៉ុននេះ ប្រទេសកម្ពុជាគប្បីប្រើប្រាស់ឲ្យមានប្រសិទ្ធភាពនិងតម្លាភាព។
លោក សុន ឆ័យ បានបញ្ជាក់ថា ៖ «ការបែងចែកឲ្យច្បាស់ ជំនួយដែលមិនត្រូវសង ហើយអ្វីដែលជាប្រាក់ដែលត្រូវសងវិញ។ នៅប្រទេសកម្ពុជាយើង ដូចយើងដឹងហើយក្នុងប្រាក់ដែលជំពាក់គេហ្នឹង វាជិតប្រហែលជា៣ពាន់លានដុល្លារសហរដ្ឋអាមេរិកហើយ អានេះមិនទាន់គិតការជំពាក់ពីរុស្ស៊ីហើយនិងសហរដ្ឋអាមេរិកផង។ ដូច្នេះខ្ញុំថា ត្រូវឲ្យមានការប្រុងប្រយ័ត្នត្បិតត្បៀតការចាំបាច់»។
ប្រភពពីប្រមុខការទូតនៃប្រទេសកម្ពុជា គឺលោក ហោ ណាំហុង ជាឧបនាយករដ្ឋមន្រ្តីនិងជារដ្ឋមន្រ្តីក្រសួងការបរទេសកម្ពុជានោះ បានបញ្ជាក់ថា ជំនួយនិងប្រាក់កម្ចីខាងលើនេះជាលើកទី១៣ហើយ ចាប់តាំងពីឆ្នាំ១៩៩៣មក ដែលមានចំនួនទឹកប្រាក់ប្រមាណ២០.៥០០លានយ៉េន ស្មើនឹងប្រមាណ១៨៧លានដុល្លារអាមេរិក សម្រាប់ការអភិវឌ្ឍសេដ្ឋកិច្ចសង្កមនិងសម្រាលការលំបាកនិងបំណុលនានារបស់កម្ពុជា។
មតិសាធារណៈមួយចំនួនបានកត់សម្គាល់ឃើញថា ប្រទេសកម្ពុជាពឹងផែ្អកសំខាន់ទៅលើជំនួយពីប្រទេសសហគមន៍ម្ចាស់ជំនួយអន្តរជាតិនានា សម្រាប់អភិវឌ្ឍសង្គមនិងលិទ្ធិប្រជាធិបតេយ្យនៅក្នុងប្រទេសកម្ពុជា ហើយជាមួយគ្នានោះប្រទេសផ្តល់ជំនួយបានទាមទារឲ្យអនុម័តច្បាប់ប្រឆាំងអំពើពុករលួយ៕