រដ្ឋមន្ត្រីក្រសួងការបរទេសខ្មែរ លោក ហោ ណាំហុង មានប្រសាសន៍នារសៀលថ្ងៃទី៨ វិច្ឆិកា បន្ទាប់ពីវិលត្រឡប់ពីកិច្ចប្រជុំកំពូលមេគង្គ-ជប៉ុន នាថ្ងៃ៦-៧ វិច្ឆិកាថ្មីៗកន្លងទៅនេះថា ការប្រកាសនេះបានធ្វើឡើងក្នុងជំនួបទេ្វភាគីរវាងនាយករដ្ឋមន្ត្រីជប៉ុនជាមួយលោកនាយករដ្ឋមន្ត្រី ហ៊ុន សែន។
លោក ហោ ណាំហុង បានមានប្រសាសន៍ថា ៖ «ខ្ញុំសូមបញ្ជាក់ថា វេទិកាមេគង្គជប៉ុននេះជាវេទិកាថ្មី ហើយមានសារសំខាន់បំផុត។ អស់លោកឃើញស្រាប់ហើយជាង៥ពាន់លានដុល្លារឲ្យប្រទេសតាមតំបន់មេគង្គនេះ ក្នុង៥ប្រទេសនេះ គឺកម្ពុជា លាវ មីយ៉ាន់ម៉ា ថៃនិងវៀតណាមនេះ ប្រហែលជាកម្ពុជា លាវ វៀតណាម បានទទួលច្រើនជាងគេ តាមព័ត៌មានយើងបានមក។ ដូច្នេះយើងមានវិសាលភាពដូចខ្ញុំបាននិយាយកន្លងមកហើយ វាមានវិសាលភាពធំធេងណាស់ក្នុងការកសាងប្រទេសយើងទៅថ្ងៃមុខទៀត»។
ក្នុងកិច្ចប្រជុំកំពូលនេះប្រទេសជប៉ុនបានសន្យាផ្តល់ជំនួយ៥០០ពាន់លានយេន ដែលគិតជាដុល្លារអាមេរិកគឺជាង៥ពាន់លានដុល្លារ ចំពោះបណ្តាប្រទេសដែលនៅជាប់អាងទន្លេមេគង្គក្នុងគោលដៅដើម្បីអភិវឌ្ឍដោយប្តេជ្ញាបង្កើតទសវត្សរ៍មេគង្គបៃតងមួយនៅតំបន់នេះចាប់ពីឆ្នាំ២០១០នេះទៅ។
ជាមួយសេចក្តីប្រកាសរួមដែលមានចំណងជើងថា “ភាពជាដៃគូថ្មីដើម្បីអនាគតរួមគ្នាដ៏រុងរឿង” ប្រទេសជប៉ុនក៏បានសន្យាទទួលនិស្សិតនិងសិក្ខាកាមនៃប្រទេសទាំង៥នៃតំបន់ទន្លេមេគង្គ គឺកម្ពុជា វៀតណាម លាវ មីយ៉ាន់ម៉ានិងថៃ ក្នុងមួយឆ្នាំ ២០០០នាក់ ឲ្យមកសិក្សានិងស្វែងយល់ពីបច្ចេកវិទ្យានិងចំណេះដឹងផ្សេងៗក្រោមជំនួយរបស់ជប៉ុន។
ក្នុងជំនួបទេ្វភាគីនេះដែរ នាយករដ្ឋមន្ត្រីជប៉ុន លោក ហាតូយ៉ាម៉ា យូក្យូ ក៏បានសុំយាងព្រះមហាក្សត្រខ្មែរ ព្រះបាទបរមនាថ នរោត្តម សីហមុនី ធ្វើទស្សនកិច្ចជាផ្លូវរដ្ឋនៅប្រទេសជប៉ុនក្នុងឱកាសខួបលើកទី៥៥ស្តីពីសន្ធិសញ្ញាមិត្តភាពកម្ពុជា-ជប៉ុនផងដែរ៕