លោក សរ យស់ថាវរៈ ព្រះរាជអាជ្ញាតុលាការខេត្តបាត់ដំបងបានថ្លែងថា បុរសទាំងបីនាក់នោះមានឈ្មោះ ឈុត ម៉ៅ ឈ្មោះ ធិន សុផាត និងឈ្មោះ ចាប អឿន ត្រូវជាប់ចោទជាជនសង្ស័យក្នុងរឿងយកថ្នាំបាញ់សម្លាប់ដំណាំស្រូវ ។
លោក សរ យស់ថាវរៈ បានឲ្យដឹងថា ៖ «ហ្នឹងគេប្តឹងពីគាត់បំផ្លិចបំផ្លាញដំណាំស្រូវ ។ ទាក់ទងនឹងការបំផ្លិចបំផ្លាញយើងកោះហៅសួរ ហើយឲ្យគាត់ទៅវិញហើយ» ។
លោក សរ យសថវារៈ បានបញ្ជាក់ថាតាមការសាកសួរពីដំណើររឿងបំផ្លិចបំផ្លាញដំណាំស្រូវនោះ គឺពិតជាកើតមានឡើងពិតប្រាកដមែន ប៉ុន្តែតុលាការនឹងបើកការស៊ើបអង្កេតករណីនេះជាបន្តទៀត ដើម្បីបញ្ជាក់ថារវាងភាគីចុងចោទនិងដើមបណ្ដឹង តើភាគីណាមួយបានចូលកាន់កាប់ដីនោះមុន ៖ «តើអ្នកណាបានកាន់កាប់យូរឆ្នាំ ហើយអ្នកណាបានទៅធ្វើតាមក្រោយ» ។
យោងតាមដីកាកោះរបស់តុលាការខេត្តបាត់ដំបង ចុះថ្ងៃទី១៤ ខែសីហា លោកស្រី ផេត ថារី បានប្តឹង លោក ឈុត ម៉ៅ ឈ្មោះ ធិន សុផាត និងឈ្មោះ ចាប អឿន ពីករណីយកថ្នាំបាញ់សម្លាប់ដំណាំស្រូវនៅភូមិតានី ឃុំល្វា ស្រុកបវេល ខេត្តបាត់ដំបង កាលពីថ្ងៃទី៣ សីហា ឆ្នាំ២០០៨ ។
លោក ឈុត ម៉ៅ និងអ្នកភូមិ២នាក់ផ្សេងទៀតបានបដិសេធថា ការចោទប្រកាន់ពីការបំផិ្លចបំផ្លាញដំណាំស្រូវរបស់លោកស្រី ផេត ថារី នោះ ពុំមែនជាការពិតឡើយ ហើយបានបញ្ជាក់ថានៅថ្ងៃកើតហេតុនោះ លោក ធិន សុផាត គ្រាន់តែស្ពាយធុងបាញ់ថ្នាំដើរកាត់តាមភ្លឺស្រែមិនបាញ់ថ្នាំបំផ្លាញដូចការចោទប្រកាន់ទេ ។
លោក ឈុត ម៉ៅ បានឲ្យដឹងថា ៖ «បើសិនឈ្មោះ ផាតហ្នឹង គឺថាសុំឲ្យរាជរដ្ឋាភិបាលថ្កោលទោសតាមផ្លូវច្បាប់ តែបើអត់មានសូមរាជរដ្ឋាភិបាលជួយដោះស្រាយរាស្ត្រ កុំឲ្យគេចោទប្រកាន់រកលេសដើម្បីបង្កាច់» ។
មិនអាចទំនាក់ទំនងសុំការបញ្ជាក់បន្ថែមពីលោកស្រី ផេត ថារី ជាដើមបណ្តឹងជុំវិញការអះអាងពីរឿងរ៉ាវខាងលើនេះដើម្បីបញ្ជាក់បន្ថែមបានទេ នៅថ្ងៃច័ន្ទ ទី២៥ សីហានេះ ។
លោក យិន ម៉េងលី មន្ត្រីអង្គការអាហុកប្រចាំខេត្តបាត់ដំបង បានថ្លែងថាករណីខាងលើនេះវាជាសិទ្ធិរបស់ព្រះរាជអាជ្ញាក្នុងការបើកការស៊ើបអង្កេតរកការពិតក្នុងករណីនេះ ៖ «ព្រះរាជអាជ្ញាគាត់អាចមានសិទ្ធិក្នុងការសម្រេច ថាតើរឿងរ៉ាវនេះព្រះរាជអាជ្ញាគាត់តម្កល់រឿងទុកអត់ចាត់ការ ឬក៏សម្រេចការចោទប្រកាន់ដើម្បីបញ្ជូនទៅចៅក្រមស៊ើបអង្កេតនៅក្នុងករណីនេះ» ។
ចំណែកក្រុមអ្នកភូមិ៥០នាក់ដែលបានធ្វើដំណើរមកជាមួយអ្នកភូមិទាំងបីនាក់ ក៏បានបដិសេធការចោទប្រកាន់ដោយអះអាងថា ប្រជាពលរដ្ឋ ១០២គ្រួសារ បានចូលទៅរស់នៅលើដីទំហំ២១០ហិកតារនៅភូមិតានី ឃុំល្វា ស្រុកបវេល ខេត្តបាត់ដំបងនោះ តាំងពីឆ្នាំ២០០៤ និង ២០០៥ ហើយកាប់ឆ្ការព្រៃឫស្សីយកដីធ្វើផ្ទះ និងបង្កបង្កើនផល ហើយបានចោទប្រកាន់វិញថា ការចោទប្រកាន់ជុំវិញការបំផ្លិចបំផ្លាញដំណាំស្រូវនោះ វាគ្រាន់តែជាលេសដើម្បីបណ្តេញក្រុមអ្នកភូមិចេញពីតំបន់នោះតែប៉ុណ្ណោះ ៕