ក្រុមកម្មករ ដែលដឹកនាំដោយលោក រ៉ុង ឈុន ប្រធានសហភាពសហជីពកម្ពុជា គ្រោងដង្ហែក្បួនចេញពីរោងចក្រនៅក្នុងសង្កាត់ទឹកថ្លា ខណ្ឌសែនសុខ ឆ្ពោះទៅកាន់ទីលានសេរីភាព ដើម្បីសម្ដែងការតវ៉ាឲ្យរដ្ឋាភិបាលអន្តរាគមន៍ទៅថៅកែរោងចក្រ ឲ្យគោរពតាមច្បាប់ស្ដីពីការងារ៥ចំណុច និងសុំឲ្យភាគីរោងចក្រផ្ដល់នូវប្រាក់អត្ថប្រយោជន៍យ៉ាងតិច១០០ដុល្លារក្នុងមួយឆ្នាំ។
អ្នកស្រី ឯម សុវណ្ណារី កម្មការិនីរោងចក្រមិថុនា បានថ្លែងថា ពួកគាត់ទាមទារឲ្យថៅកែបង់ប្រាក់អតីតភាពការងារមកដល់កម្មករដូចច្បាប់ស្ដីពីការងាររបស់ប្រទេសកម្ពុជា ៖ "សុំឲ្យជួយគិតប្រាំចំណុចមកឲ្យពួកខ្ញុំបានលុយសមរម្យថាយកទៅប្រកបមុខរបរកន្លែងណាព្រោះអីទៅធ្វើការអីក៏មានផលពិបាកដែរសុំឲ្យលោកជួយមើលដោះស្រាយ។ កុំពួកខ្ញុំគ្រាន់តែពួកខ្ញុំមកឡើងអត់មានទៅឈកណ្ដាលថ្នល់ឲ្យខូចសណ្ដាប់ធ្នាប់ផងយកពួកបង្ក្រាបមកទាំងឡានៗ។ ពួកខ្ញុំខ្លាចណាស់មិនចង់មកប្រឈមមុខឲ្យគេវាយដំទេពូ"។
ក្នុងពេលដែលក្រុមកម្មករធ្វើបាតុកម្មនេះ ក្រុមសន្តិសុខរបស់សង្កាត់ទឹកថ្លា បានមកវាយលោក រ៉ុង ឈុន ហើយដណ្ដើមយកឧបករណ៍បំពងសំឡេងដែលលោក រ៉ុង ឈុន កំពុងនិយាយទៅកាន់ក្រុមកម្មករ។
ក្រុមកម្មករបានបំបែកគ្នាត្រឡប់ទៅផ្ទះវិញក្រោយពេលជួបប្រជុំគ្នារយៈពេលជាង២ម៉ោង ដោយបោះបង់ចោលគម្រោងដង្ហែក្បួនទៅកាន់ទីលានសេរីភាព។ ស្របពេលគ្នានោះក្រុមសមត្ថកិច្ចចម្រុះបានបន្ថែមកម្លាំងសរុបប្រមាណ២០០នាក់ រួមទាំងសមត្ថកិច្ចស្លៀកពាក់ឯកសណ្ឋាន និងស្លៀកពាក់ស៊ីវិល។
លោក រ៉ុង ឈុន ប្រធានសហភាពសហជីពកម្ពុជា បានថ្លែងថា ថៅកែបានព្យាយាមគេចវេះពីការទទួលខុសត្រូវចំពោះប្រាក់សំណងមកដល់កម្មករ។ លោកបន្តថា ករណីភ្លើងឆេះរោងចក្រនេះ គឺមិនមែនជាករណីប្រធានសក្ដិដូចគ្រោះធម្មជាតិ ឬសង្គ្រាមទេ លោកសង្ឃឹមថា រដ្ឋាភិបាលនឹងរកវិធានការជួយដល់ក្រុមកម្មករទាំងនេះ ៖ "គម្រោងដែលយើងគ្រោងដង្ហែឆ្ពោះទៅសួនសេរីភាព បន្ទាប់ពីសម្ដែងមតិនៅសួនសេរីភាព យើងឆ្ពោះទៅដាក់ញត្តិនៅស្ថានទូតអាមេរិក នៅស្ថានទូតសហគមន៍អឺរ៉ុប ដាក់ញត្តិទៅរដ្ឋសភា ដាក់ទៅខុទ្ទកាល័យលោកនាយករដ្ឋមន្ត្រី។ ប៉ុន្តែឥឡូវនេះយើងគិតថា នឹងមានការលំបាកក្នុងការដង្ហែក្បួនអ៊ីចឹងយើងនឹងធ្វើការផ្លាស់ប្ដូរបាទ"។
ក្រុមកម្មកររោងចក្រជូនតិចស្ថាយ (June Textiles) ហៅរោងចក្រមិថុនា នេះបានបាត់បង់ការងាររបស់ខ្លួនរយៈពេលជិត២ខែ ហើយដោយសារតែរោងចក្រត្រូវភ្លើងឆេះ ហើយថៅកែបានបញ្ឈប់កម្មករទាំងអស់ដោយយល់ព្រមបង់ប្រាក់អតីតភាព ២០ដុល្លារ ក្នុងកម្មករម្នាក់ក្នុងមួយឆ្នាំ តែក្រុមកម្មករមិនយល់ព្រម ដោយទាមទារប្រាក់អតីតភាពក្នុងម្នាក់ ១០០ដុល្លារក្នុង១ឆ្នាំ។ ដោយសារថៅកែមិនព្រមបង់តាមការទាមទារ ទើបបានកម្មករសម្រេចនាំគ្នាធ្វើបាតុកម្ម៕