ប្រធានក្រុមសាខាគយខេត្តកណ្ដាលរងការចោទថាយកទំនិញក្រុមហ៊ុនលក់

ដោយ ហ្សាការីយ៉ា

2009-09-28

តំណាងក្រុមហ៊ុនឡាក់គី ហ្វាម៉ា បានថ្លែងឲ្យដឹងថ្ងៃទី ២៧ កញ្ញា ដោយចោទប្រកាន់ប្រធានក្រុមសាខាគយខេត្តកណ្ដាល ថាបានយកទំនិញរបស់ពួកគេចំនួន ៩ឡាន លក់ឡាយឡុងអស់ បន្ទាប់ពីទំនិញទាំងនេះពួកគេមិនបានបង់លុយសូកប៉ាន់ឲ្យគយតាមចំនួនដែលគេចង់បានទេនោះ។

លោក ចាន់ ប៊ុនលាង បានឲ្យដឹងថា ទំនិញរបស់ពួកលោកត្រូវបានប្រធានក្រុមសាខាគយខេត្តកណ្ដាល គឺលោក កូវ វិបុល បានឃាត់ទុកចំនួន ៩ឡាន អស់រយៈពេលជាង ១០ថ្ងៃកន្លងមក ដែលទំនិញទាំងនោះពួកលោកបានបង់ពន្ធជូនគយព្រំដែនខ្មែរ-វៀតណាម ច្រកជ្រៃធំ ក្នុងមួយឡានចំណុះ ៥តោន ចំនួន ១៨ម៉ឺនរៀលរួចហើយនោះ។

លោក ចាន់ ប៊ុនលាង មានប្រសាសន៍ថា ពេលឡានដឹកទំនិញមកដល់ទីរួមខេត្តកណ្ដាល គយបានជំរិតទារប្រាក់ពីពួកលោកក្នុងមួយឡានជាង ១០ម៉ឺនរៀលទៀត ខាងក្រុមហ៊ុនមិនយល់ព្រមនោះទេ។ លុះដល់ថ្ងៃទី ១៧ កញ្ញា លោក កូវ វិបុល បានយកទំនិញទាំងនោះលក់ឡាយឡុងអស់ដោយគ្មានជូនដំណឹងឲ្យក្រុមហ៊ុនដែលជាម្ចាស់ទំនិញដឹងនោះទេ។

លោក ចាន់ ប៊ុនលាង បានឲ្យដឹងទៀតថា ក្រុមហ៊ុនឡាក់គី ហ្វាម៉ា ពុំមែនជាក្រុមហ៊ុនដឹកជញ្ជូនទំនិញទ្រង់ទ្រាយធំនោះទេ ក្រុមហ៊ុននេះបង្កើតឡើងដោយអាជីវករដូចគ្នា ដោយមានគ្នាជាង ២០នាក់ ដឹកទំនិញផ្ទាល់ខ្លួន ដែលជាបន្លែគ្រប់មុខពីវៀតណាម ថៃ និងទំនិញក្នុងស្រុកមួយចំនួន យកមកចែកចាយលក់បន្តឲ្យអាជីវករផ្សារដើមគ ក្នុងរាជធានីភ្នំពេញ។

វិទ្យុអាស៊ីសេរីមិនអាចទាក់ទងសុំការបំភ្លឺពីប្រធានក្រុមសាខាគយខេត្តកណ្ដាល គឺលោក កូវ វិបុល ជុំវិញនឹងការចោទប្រកាន់ខាងលើបានទេ នៅថ្ងៃទី ២៧ កញ្ញា។

អនុប្រធានគយច្រកព្រំដែនជ្រៃធំ ខេត្តកណ្ដាល ឈ្មោះ មុនី បានឲ្យដឹងកាលពីពេលថ្មីៗនេះថា គយព្រំដែនបានអនុគ្រោះពន្ធខ្លះដល់ពួកអាជីវករខាងលើ ដូចជាក្នុងមួយឡាយដឹកទំនិញចំណុះ ៥តោន គឺតម្រូវឲ្យបង់ពន្ធតែ ១តោនកន្លះ ស្មើនឹង ១៨ម៉ឺនរៀលតែប៉ុណ្ណោះ ដោយយល់ថា អាជីវករដឹកទំនិញផ្ទាល់ខ្លួនពុំមែនជាក្រុមហ៊ុនទ្រង់ទ្រាយធំនោះទេ។

សូមជម្រាបថា តំណាងក្រុមហ៊ុនខាងលើបានឲ្យដឹងថា មន្រ្តីគយបានយកទំនិញពួកគេលក់ ដូច្នេះគឺជាការគាបសង្កត់មួយទៅលើពួកគេដែលជាអាជីវករដឹកទំនិញផ្ទាល់ខ្លួន ដែលធ្វើឲ្យខាតបង់ថវិកាសរុបជាង ៥ម៉ឺនដុល្លារ ដោយគិតក្នុងម្នាក់ជាង ១ម៉ឺន៤ពាន់ដុល្លារ។ បច្ចុប្បន្នក្រុមអាជីវករខាងលើកំពុងរៀបចំដាក់ពាក្យបណ្ដឹងទៅលោកនាយករដ្ឋមន្រ្តី ហ៊ុន សែន ដើម្បីសុំឲ្យជួយអន្តរាគមន៍អំពីបញ្ហានេះ៕

បោះពុម្ព អ៊ីម៉េល