បុរសម្នាក់ឈ្មោះ នី ពៅ រស់នៅឃុំបាគូ ស្រុកកណ្តាលស្ទឹង បានឲ្យដឹងថា សំណូមពរចំនួន២ចំណុចរបស់អ្នកតវ៉ា គឺសុំឲ្យបញ្ចុះថ្លៃភ្លើងដែលពួកគាត់កំពុងប្រើប្រាស់ពីតម្លៃ ១.៧០០រៀលមកនៅត្រឹម ១.១០០រៀលក្នុងមួយគីឡូវ៉ាត់ម៉ោងនិងបញ្ហាកុងទ័រភ្លើងដើរលឿនខុសប្រក្រតី។
នៅក្នុងការជួបចរចានោះបានទទួលការឆ្លើយតបពីលោក ឆាយ ណេង អ្នកគ្រប់គ្រងអគ្គិសនីឯកជននៅស្រុកកណ្តាលស្ទឹងថា លោកនឹងផ្លាស់ប្តូរកុងទ័រថ្មីឲ្យដែលបានថ្លឹងដោយអាជ្ញាធរអគ្គិសនីកម្ពុជា រីឯការឆ្លើយតបអំពីតម្លៃភ្លើងនឹងផ្តល់ដំណឹងនៅក្រោយការពិភាក្សាជាមួយអាជ្ញាធរអគ្គិសនីកម្ពុជា។
លោក នី ពៅ មានប្រសាសន៍ឲ្យដឹងដូច្នេះ ៖ «គេឲ្យចាំព័ត៌មានពីថ្នាក់ជាតិមក ខាងអគ្គិសនីគេដាក់តម្លៃឲ្យ។ លោក ឆាយ ណេង អត់មានយោបល់អីទេ ប៉ុន្តែគ្រាន់តែថា កុងទ័រដែលតលើសតម្លៃរដ្ឋបានដាក់ឲ្យហ្នឹងគេសងវិញ។ អ្នកខ្លះដែលដាក់ធំហ្នឹងគេយក១៧០-១៩០ ខ្លះ២០០ឯណោះ។ ការកំណត់របស់អគ្គិសនីគេអត់យកដល់ប៉ុណ្ណឹងទេ ហើយចំពោះ៥២០ហ្នឹង ក៏អត់យកដល់៥៥ដុល្លារដែរ ត្រឹម១០ម៉ឺន ២៥ដុល្លារអីទេ គាត់យកលើស អ៊ីចឹងទេគេទាមទារឲ្យសងលុយវិញ ឲ្យគាត់កត់ឈ្មោះប្រជាជនដែលមានពាក់ព័ន្ធជាមួយកុងទ័រដែលគាត់ដាក់ឲ្យថ្មីក្រោយហ្នឹង ឲ្យឈ្មោះឲ្យគាត់ គាត់សង»។
បើទោះបីជាមានការអះអាងយ៉ាងនេះក្តី ក្រុមប្រជាពលរដ្ឋបានប្រកាន់ជំហរថា ទាល់តម្លៃ ១.១០០រៀលក្នុង១គីឡូវ៉ាត់ម៉ោងទើបព្រម បើមិនដូច្នោះទេពួកគាត់នឹងឡើងតវ៉ាដល់លោកនាយករដ្ឋមន្រ្តី ហ៊ុន សែន ទៀត៕