លោក កឹម សុខា បានមានប្រសាសន៍ឲ្យដឹងថា ក្រុមជំនួយការរបស់លោកបានទៅសុំការអនុញ្ញាតជាមុន ប៉ុន្តែ លោក ស្រី ឌឹក មេបញ្ជាការកងពលអន្តរាគមន៍លេខ១២ ប្រចាំតំបន់ប្រាសាទព្រះវិហារនោះមិនអនុញ្ញាតឡើយ ដោយយកលេសថា មិនអាចធានាសុវត្ថិភាពបាន។
លោក កឹម សុខា មានប្រសាសន៍ដូច្នេះថា ៖ «ខ្ញុំមានការសោកស្ដាយដែរ ដោយសារខ្ញុំជាខ្មែរដែរ ហើយកងទ័ពជាកងទ័ពខ្មែរយើងដែរ ហើយខ្ញុំក្នុងនាមជាតំណាងរាស្ត្រទៀត ហើយខ្ញុំទៅជាបេសកកម្មស្របច្បាប់ទៀត ហើយមេបញ្ជាការកងទ័ពយើងហ្នឹងគាត់មិនអាចធានាសុវត្ថិភាពដល់ខ្ញុំដែលជាតំណាងរាស្ត្រដើម្បីទៅសួរសុខទុក្ខបងប្អូនកងទ័ពនៅទីនោះ ដូច្នេះគាត់បង្ហាញថា គាត់អត់មានសមត្ថភាពដើម្បីធានាសន្តិសុខដល់តំណាងរាស្ត្រ។ ហើយចំពោះការដែលយើងខ្ញុំទៅនេះ ក៏មិនមែនទៅជារឿងនយោបាយដែរ គឺយើងដឹងហើយថា ក្នុងនាមយើងខ្ញុំជាតំណាងរាស្ត្រ ហើយមានប្រធានរដ្ឋសភាអនុញ្ញាតឲ្យទៀត»។
នៅមិនទាន់មានប្រតិកម្មណាមួយនៅឡើយពីលោក ស្រី ឌឹក មេបញ្ជាការកងពលអន្តរាគមន៍លេខ១២ ប្រចាំតំបន់ប្រាសាទព្រះវិហារនោះ ទាក់ទងនឹងការចោទប្រកាន់នេះ។
លោក កឹម សុខា មានប្រសាសន៍ទៀតថា គោលបំណងនៃការឡើងទៅនោះគឺដើម្បីចុះសួរសុខទុក្ខប្រជាពលរដ្ឋនិងកងទ័ពដែលឈរជើងប្រចាំការនៅទីនោះផង និងយកអំណោយមួយចំនួនដែលសប្បុរសជននៅសហរដ្ឋអាមេរិក បានផ្ញើមកតាមរយៈរូបលោកទៅចែកជូនកងទ័ពនៅទីនោះផង។
លោកមានប្រសាសន៍ទៀតថា អំណោយទាំងនោះរួមមានថ្នាំពេទ្យមួយចំនួន ប្រេងកូឡា និងម្ហូបអាហារ មានត្រីខកំប៉ុង ត្រីងៀត និងទឹកដោះគោកំប៉ុង ជាដើម ដែលសរុបទឹកប្រាក់ប្រមាណជាង ៥.០០០ដុល្លារអាមេរិក៕