លោក កឹម សុខា មានសង្ឃឹមលើការច្របាច់បញ្ចូលបក្សប្រជាធិបតេយ្យទាំងពីរ

គណបក្ស សិទ្ធិមនុស្ស និងគណបក្ស សម រង្ស៊ី បានកំណត់ថ្ងៃជួបគ្នាដើម្បីជជែកពីការច្របាច់បញ្ចូលគ្នារវាងគណបក្សប្រជាធិបតេយ្យទាំងពីរ។ ជំនួបនេះត្រូវធ្វើឡើងនៅថ្ងៃទី១៦-១៧ កក្កដា ឆ្នាំ២០១២។

ដោយ វិជ័យ អានន្ទ
2012-06-27

h062612cp.mp3

៣០-កក្កដា-២០១១៖ ប្រធានគណបក្សសិទ្ធិមនុស្ស លោក កឹម សុខា ថ្លែងនៅក្នុងការបើកសន្និបាតក្រុមប្រឹក្សាជាតិលើកទី២ នៅទីស្នាក់ការគណបក្ស នារាជធានីភ្នំពេញ។

RFA/Den Ayuthyea

បើទោះបីថ្ងៃជជែកគ្នាមិនទាន់ចូលមកដល់ក៏ដោយ ប្រធានគណបក្ស សិទ្ធិមនុស្ស លោក កឹម សុខ បានសម្ដែងជំនឿយ៉ាងមុតមាំនាថ្ងៃទី២៦ មិថុនា ថា គណបក្សប្រជាធិបតេយ្យទាំងពីរនឹងរកចំណុចរួមគ្នាមួយឃើញ ហើយឈានដល់ការបង្រួបបង្រួមគ្នាបានដោយជោគជ័យ។ លោកបានលើកឡើងនូវចំណុចវិជ្ជមានមួយចំនួន ដែលបញ្ជាក់ថា គណបក្សទាំងពីរអាចបង្រួបបង្រួមគ្នា។

ម្យ៉ាងទៀត លោក កឹម សុខា បញ្ជាក់ពីមូលហេតុដែលនាំឲ្យលោកមានជំនឿថា គណបក្សទាំងពីរអាចរួបរួមគ្នានោះថា ទិសដៅគណបក្សទាំងពីរដូចគ្នា គឺចង់ឲ្យមានការផ្លាស់ប្ដូរ ហើយគិតពីប្រយោជន៍ជាតិជាធំ។

ទោះយ៉ាងណាក៏ដោយ លោកបញ្ជាក់បន្ថែមថា ប្រសិនគណបក្សទាំងពីរបរាជ័យក្នុងការបង្រួបបង្រួមម្ដងទៀត លោកនៅតែសង្ឃឹមថា ថ្ងៃណាមួយគណបក្សទាំងពីរនឹងអាចច្របាច់បញ្ចូលគ្នាបាន ហើយលោកព្យាយាមធ្វើយ៉ាងណាឲ្យគណបក្សប្រជាធិបតេយ្យទាំងពីររកចំណុចត្រូវគ្នាមួយ ដើម្បីឈានដល់ការច្របាច់បញ្ចូលគ្នាឲ្យខាងតែបាន។ លោកថ្លែងបែបនេះ ក្នុងឱកាសនៃការបើកវគ្គបណ្ដុះបណ្ដាលមេឃុំគណបក្ស សិទ្ធិមនុស្ស ដែលមកពីឃុំទាំង១៨។

ក្នុងវគ្គបណ្ដុះបណ្ដាលនេះដែរ លោកឲ្យដឹងថា គណបក្ស សិទ្ធិមនុស្ស ផ្ដល់មុខវិជ្ជាសិក្សាមួយចំនួនដល់មេឃុំទាំងនោះ រួមមានច្បាប់ស្ដីពីការគ្រប់គ្រង ការកសាងផែនការអភិវឌ្ឍន៍ឃុំ-សង្កាត់ ការគ្រប់គ្រងហិរញ្ញវត្ថុក្នុងឃុំ-សង្កាត់ និងកិច្ចការរដ្ឋបាលជាដើម។

ទាក់ទងទៅនឹងរឿងបង្រួបបង្រួមគ្នានេះដែរ អ្នកនាំពាក្យគណបក្ស សម រង្ស៊ី លោក យឹម សុវណ្ណ អះអាងថា គណបក្សទាំងពីរអាចនឹងបង្រួបបង្រួមបាន បើសិនអ្នកប្រជាធិបតេយ្យទាំងអស់ឈរលើផលប្រយោជន៍របស់ប្រជាពលរដ្ឋ។ លោកថ្លែងបន្តថា គណបក្ស សម រង្ស៊ី ស្វាគមន៍ជានិច្ចចំពោះអ្នកប្រជាធិបតេយ្យទាំងអស់ដែលប្រាថ្នាបំពេញឆន្ទៈរបស់ប្រជាពលរដ្ឋ និងផលប្រយោជន៍ជាតិជាធំ។

ទោះយ៉ាងនេះក្ដី អ្នកវិភាគឯករាជ្យ និងជាសកលវិទ្យាធិការនៃសាកលវិទ្យាល័យ ខេមរៈ លោកបណ្ឌិត សុខ ទូច មានប្រសាសន៍ថា គណបក្សប្រជាធិបតេយ្យទាំងពីរអាចបង្រួបបង្រួមគ្នាបាន បើសិនឈរលើគោលការណ៍បី។ ទីមួយ អ្នកនយោបាយនៃបក្សទាំងពីរគិតពីការធ្វើឲ្យលទ្ធិប្រជាធិបតេយ្យបោះជំហានទៅមុខ។ ទីពីរ អ្នកនយោបាយមិនគិតពីផលប្រយោជន៍ផ្ទាល់ខ្លួន និងទីបី បក្សទាំងពីរគឺជាបក្សឯករាជ្យ មានន័យថា មិនមែនជាបក្សដែលគេបង្កើតមកដើម្បីកំដរឆាកនយោបាយ។

ម្យ៉ាងទៀត លោកបន្តថា ប្រសិនគណបក្សទាំងពីរមិនអាចច្របាច់បញ្ចូលគ្នាបានទេ លោកសុំឲ្យគណបក្សទាំងពីរឈប់ឃោសនារកសំឡេងឆ្នោត ដើម្បីបោករាស្ត្រជាបន្តទៀត។ លោកពន្យល់ថា សូម្បីអ្នកនយោបាយពីរបីនាក់ យើងមិនអាចបង្រួបបង្រួមបានផង ចុះយើងរំពឹងអ្វីថានឹងអាចបង្រួបបង្រួមជាតិនោះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

អត្ថបទដែលទាក់ទង

មតិ (5)

ចុចត្រង់នេះដើម្បីបន្ថែមយោបល់របស់អ្នក

អ្នកអានអនាមិក

Please, I beg you both, make an integration. Only this way, you will be able to move to power;then you can share your power. let's say, you both take turn to be PM, NAT, Senate,.... so on

Jun 28, 2012 03:17 PM