ប្រជាពលរដ្ឋខ្មែរជាច្រើនពាន់គ្រួសារនៅក្នុងភូមិចំនួន១២ ក្នុងឃុំអមលាំង ស្រុកថ្ពង ខេត្តកំពង់ស្ពឺ ត្រូវបានអាជ្ញាធរស្រុកថ្ពង បានកោះហៅជាបន្ទាន់មកជួបជុំគ្នានៅសាលាស្រុក ដើម្បីដោះស្រាយវិវាទដីធ្លីជាមួយនឹងក្រុមហ៊ុនស៊ូហ្គើរ កំពង់ស្ពឺ របស់លោក លី យ៉ុងផាត់ ក្រោយពីមានជម្លោះហិង្សាកាលពីថ្ងៃព្រហស្បតិ៍ ទី១៨ មីនានេះ បានញ៉ាំងឲ្យប្រជាពលរដ្ឋខឹងសម្បា ដុតខ្នមតូចៗចំនួន៦ខ្នងជាជម្រកស្នាក់នៅបណ្តោះអាសន្នរបស់បុគ្គលិកក្រុមហ៊ុន។
គ្រឿងចក្ររាប់សិបគ្រឿងដែលបានចាប់ផ្តើមឈូសឆាយដីធ្លីដែលពលរដ្ឋអះអាងថា បះពាល់និងបំពានដីធ្លីរបស់ប្រជាពលរដ្ឋកំពុងតែបញ្ឈប់សកម្មភាពនៅថៃ្ងសុក្រ ទី១៩ មីនានេះ នៅគ្រាដែលមានការបើកកិច្ចប្រជុំធំមួយស្វែងរកដំណោះស្រាយ។
ប្រជាពលរដ្ឋនានាកំពុងតែមានការព្រួយបារម្ភអំពីសុវត្ថិភាពផ្ទាល់ខ្លួន ក្រោយពីតុលាការខេត្តកំពង់ស្ពឺ បានចេញដីកាភ្លាមៗកាលពីថៃ្ងព្រហស្បតិ៍ ទី១៨ មីនា ស្វែងរកចាប់ខ្លួនប្រជាពលរដ្ឋចំនួន ១៦នាក់ដែលគេសង្ស័យថា មានការពាក់ព័ន្ធក្នុងការដុតខ្ទមរបស់ក្រុមហ៊ុន។
ប្រជាពលរដ្ឋនៅក្នុងឃុំអមលាំង ស្រុកថ្ពង ខេត្តកំពង់ស្ពឺ នៅក្នុងចំណោមគ្រួសារជាច្រើនពាន់គ្រួសារដែលបានចូលរួមក្នុងកិច្ចប្រជុំនៅថៃ្ងសុក្រ ទី១៩ មីនានេះ បានថែ្លងថា ៖ «ឥឡូវនេះប្រជាពលរដ្ឋមិនចង់បានសំណងអ្វីទេ ចង់បានតែដីរបស់ប្រជាពលរដ្ឋកន្លែងណានៅកន្លែងនេះ គ្មានការផ្លាស់ប្ដូរហើយសុំឲ្យក្រុមហ៊ុនដកគ្រឿងចក្រចេញពីក្នុងឃុំអមលាំងតែម្ដង»។
ប្រជាពលរដ្ឋម្នាក់ទៀតបានថែ្លងថា អ្វីដែលគ្រួសារប្រជាពលរដ្ឋចង់បាននោះ គឺដីធ្លីកសិកម្មដើម្បីបង្កបង្កើនផលចិញ្ចឹមជីវិត ៖ «ប្រជាពលរដ្ឋសំណូមពរថា បើគ្មានការដោះស្រាយឲ្យចេញនៅថ្ងៃនេះទេ គាត់សំណូមពរទៅឲ្យខាងក្រុមហ៊ុនហ្នឹងផ្អាកគ្រឿងចក្រត្រឹមណេះសិន រង់ចាំការដោះស្រាយ ហើយចំណុចនេះខាងអាជ្ញាធរក៏បានបកស្រាយដែរ គាត់ថា ឲ្យរង់ចាំមួយអាទិត្យទៀត»។
ប្រភពបានឲ្យបញ្ជាក់ថា គ្រួសារប្រជាពលរដ្ឋជាច្រើនពាន់គ្រួសារនោះ បានកាន់កាប់ដីធ្លីនិងធ្វើកសិកម្មតាំងពីឆ្នាំ១៩៧៩មក ប៉ុន្តែគ្មានប័ណ្ណ ឬឯកសារកម្មសិទ្ធិស្របច្បាប់ទេ។
អភិបាលស្រុកថ្ពង ខេត្តកំពង់ស្ពឺ លោក ទួន សុង មិនបានពន្យល់ជាពិស្តារទេអំពីកិច្ចប្រជុំនិងដំណោះស្រាយ នៅពេលដែលវិទ្យុអាស៊ីសេរី បានទាក់ទងសុំការពន្យល់។
វិទ្យុអាស៊ីសេរី នៅមិនទាន់បានទទួលការបំភ្លឺនៅទ្បើយទេ ពីតំណាងក្រុមហ៊ុនស៊ូហ្គើរ កំពង់ស្ពឺ របស់លោក លី យ៉ុងផាត់ អំពីការអភិវឌ្ឍដែលបង្កឲ្យមានរឿងចម្រូងចម្រាសនេះ។
លោក ជា ហ៊ាន ប្រធានអង្គការប្រឆាំងអំពើពុករលួយ ទប់ស្កាត់ធនធាន ការបំផ្លាញធនធានធម្មជាតិ និងការពារសិទ្ធិប្រជាពលរដ្ឋដែលកំពុងតែតាមដានស្ថានការណ៍នេះ បានមានប្រសាសន៍ប្រតិកម្មថា ៖ «ខ្ញុំយល់ឃើញថា បើសិនជាក្រុមហ៊ុនវិនិយោគ គឺវិនិយោគបានអាស្រ័យទៅលើប្រជាពលរដ្ឋចូលរួម ហើយបើសិនជាវិនិយោគហើយប៉ះពាល់ទៅដល់ដីស្រែ ដល់ដីចម្ការទៅដល់ទ្រព្យសម្បត្តិរបស់ប្រជាពលរដ្ឋ គឺធ្វើឲ្យប្រជាពលរដ្ឋមានការខកចិត្ត ហើយនិងរាជរដ្ឋាភិបាលមិនគួរធ្វើបែបនេះទេ។ បើឲ្យក្រុមហ៊ុនធ្វើការវិនិយោគគួរតែដោះស្រាយឲ្យប្រជាពលរដ្ឋឲ្យសមស្រប»។
អភិបាលខេត្តកំពង់ស្ពឺ លោក កង ហ៊ាង បានមានប្រសាសន៍ថា ដីធ្លីចំនួន ៨,០០០ហិកតារ ត្រូវបានផ្ដល់សម្បទានឲ្យទៅក្រុមហ៊ុនស៊ូហ្គើរ កំពង់ស្ពឺ ក្នុងឆ្នាំ២០១០នេះ។
លោក កង ហ៊ាង មានប្រសាសន៍ដូច្នេះ ៖ «ការដោះស្រាយ យើងកំពុងធ្វើកំពុងដោះហើយ អត់មានប៉ះពាល់ដីធ្លីរបស់គាត់បន្តិចបន្តួចឯណាក្នុងការធ្វើវិនិយោគហ្នឹង»។
ប្រជាពលរដ្ឋជាច្រើនពាន់គ្រួសារបានទទូចឲ្យក្រុមហ៊ុនផ្អាករាល់ការឈូសឆាយដីធ្លីរហូតដល់មានដំណោះស្រាយ និងសុំឲ្យមានការកំណត់ព្រំដីច្បាស់លាស់រវាងក្រុមហ៊ុននិងប្រជាពលរដ្ឋដែលមានការពាក់ព័ន្ធឲ្យចប់សព្វគ្រប់សិន។
ប្រជាពលរដ្ឋបានរំសាយការប្រជុំនៅល្ងាចថ្ងៃសុក្រ ទី១៩ មីនា នៅគ្រាដែលមិនមានការចុះសម្រុងគ្នារកដំណោះស្រាយបាននៅឡើយរវាងប្រជាពលរដ្ឋនិងអាជ្ញាធរ៕