ការប្តឹងទៅសាលាឧទ្ធរណ៍នេះ បានធ្វើឡើងបន្ទាប់ពីតុលាការខេត្តកំពង់ស្ពឺ ពន្យារពេលបើកសវនាការកាត់ក្តីប្រជាជន៥នាក់ ពីបទបំផ្លាញទ្រព្យសម្បត្តិក្រុមហ៊ុនវិនិយោគដី Golden Land នៅភូមិតានកថ្មី។
ប្រធានអង្គការសិទ្ធិមនុស្សដើម្បីតម្លាភាពនិងសន្តិភាព អ្នកស្រី ម៉ម ស៊ីថា អះអាងថា ចៅក្រមស៊ើបអង្កេត មិនបានចុះស៊ើបដល់ទីតាំងជម្លោះដីទេ និងមិនស្គាល់តំបន់ដីជម្លោះច្បាស់លាស់ មិនតែប៉ុណ្ណោះបន្តឃុំខ្លួនប្រជាជនម្ចាស់ដីជាង១ខែក្នុងពន្ធនាគារ មិនកាត់ក្តី ហើយបង្ខំជនជាប់ឃុំក្នុងពន្ធនាគារ ឲ្យផ្តិតមេដៃព្រមរុះរើផ្ទះចេញពីដី ដែលមិនទាន់ដោះស្រាយច្បាស់លាស់នោះ។ ទើបអ្នកស្រីដាក់ពាក្យប្តឹងទៅសាលាឧទ្ធរណ៍ ឲ្យជួយពិនិត្យរឿងក្តីនេះ។
អ្នកស្រី ម៉ម ស៊ីថា មានប្រសាសន៍ដូច្នេះថា ៖ «ការចាត់ការមិនប្រក្រតីរបស់ចៅក្រម អ៊ន សំណាង ក្នុងសំណុំរឿងហ្នឹង។ ឃុំលើកទី២ ទាល់តែមានកំហុសធ្ងន់ធ្ងរបំពានទៅនឹងក្ដីសម្រេចលើកមុន គេអត់បានធ្វើអីបំពានផង»។
ក្រុមគ្រួសារជនជាប់ឃុំក្នុងជម្លោះដីធ្លីជាមួយក្រុមហ៊ុន Golden Landឲ្យដឹងថា ក្រោយពីចាប់ប្តីប្រពន្ធពួកគាត់ ៥នាក់ដាក់គុកចាប់ពីថ្ងៃ១៧ ខែកញ្ញាមក តុលាការខេត្តកំពង់ស្ពឺ មិនបានជំនុំជម្រះក្តីឡើយ។ ហើយក្រុមអ្នកយាមដីឲ្យក្រុមហ៊ុន Golden Land បានមករុះផ្ទះអ្នកស្រុកអស់ ១ខ្នង និងដើរឈ្លបរាល់ថ្ងៃ ប្រដាប់ដោយអាវុធ កាំបិត ពូថៅ មកគំរាមអ្នកស្រុកឲ្យរុះរើផ្ទះចេញពីដី ៖ «ម្សិលមិញ វាបានប្រើទាហាននិងប៉ូលិស ដើរគ្រប់ផ្ទះ ប្រាប់ប្រជាពលរដ្ឋថា នៅ ៣ខែទៀត គេឈូសឆាយ»។
ស្រ្តីឈ្មោះរឿន ជាជនពិការនៅភូមិតានកថ្មី បានឲ្យដឹងថា ៖ «ដល់ថ្ងៃទី២០ ទាហានកន្លែងក្រុមហ៊ុនគាត់មករុះខ្លួនឯងតែម្ដង គាត់មករុះផ្ទះខ្ញុំចោល និងដំណាំខ្ញុំពេញផ្ទះ គាត់ជាន់ចោលខ្ទេច»។
ចៅក្រម អ៊ន សំណាង ធ្លាប់ប្រាប់វិទ្យុអាស៊ីសេរីថា ការឃុំខ្លួនមនុស្ស៥នាក់ ឈ្មោះ លោក ម៉ែន ជឿន លោក គង់ ភ័ស្ត លោក ម៉ែន ខ្នួច លោក ជា រ៉ុម និងអ្នកស្រី ជេត ណាំ កាលពីថ្ងៃ១៧ ខែកញ្ញា ឆ្នាំ២០០៨នោះ មកពីពួកគេជាមេខ្លោង បំផុសប្រជាជនជាង ២០០គ្រួសារ តវ៉ារឿងដីធ្លីនិងមកចូលសង់ផ្ទះក្នុងដីជម្លោះ ជាមួយក្រុមហ៊ុន Golden Land ។ ហើយបុរសឈ្មោះ ម៉ែន ជឿន និង គង់ ភ័ស្ត ធ្លាប់ជាប់ឃុំម្តង កាលពីខែ១១ ឆ្នាំ២០០៧ និងក្រោយមក ត្រូវបានដោះលែង។ ប៉ុន្តែមិនគោរពតាមមាត្រា២៣០ ទើបចាប់មកឃុំវិញ ៖ «ចាំយើងដោះស្រាយចរចាជាមួយគាត់ បើគាត់ព្រមព្រៀងរើសិនទៅ ហើយសឹមយើងឲ្យគាត់នៅក្រៅឃុំដដែលវិញទេ»។
ក្រុមគ្រួសារបុរសទាំងពីរឈ្មោះ ម៉ែន ជឿន និង គង់ ភ័ស្ត អះអាងថា បានដាក់ប្រាក់ធានាម្នាក់ ២.៨០០ដុល្លារ ទើបតុលាការដោះលែងឲ្យប្តីនៅក្រៅឃុំ។ នៅថ្ងៃ ១៧ កញ្ញា តុលាការ បានកោះហៅទៅសាកសួរ បែរជាចាប់ឃុំខ្លួន ដោយចោទថា ប្តីគាត់និងអ្នកផ្សេងទៀត បានរំលោភមាត្រា២៣០ និងបំផ្លាញទ្រព្យសម្បត្តិក្រុមហ៊ុន រួចបានចាប់ឃុំខ្លួនវិញ ដោយមិនបានផ្តល់ប្រាក់ធានានោះ មកឲ្យពួកគាត់វិញឡើយ។ ឯចៅក្រម អ៊ន សំណាង ធ្លាប់បដិសេធថា មិនបានទទួលប្រាក់ពីគ្រួសារជនជាប់ចោទឡើយ៕