ពាក្យបណ្តឹងរបស់ពលរដ្ឋបានដាក់ទៅខុទ្ទកាល័យនាយករដ្ឋមន្រ្តី និងស្ថាប័នពាក់ព័ន្ធ ៥ផ្សេងទៀត។
ពាក្យបណ្តឹងរបស់ពលរដ្ឋ ចុះថ្ងៃ ទី៣១ ខែមករា ឆ្នាំ២០១២ បានដាក់ទៅកាន់ខុទ្ទកាល័យលោកនាយករដ្ឋមន្រ្តី ហ៊ុន សែន និងស្ថាប័នសំខាន់ៗចំនួន ៥ទៀត គឺព្រឹទ្ធសភា រដ្ឋសភា ក្រសួងទំនាក់ទំនងព្រឹទ្ធសភា និងអធិការកិច្ច ក្រសួងមហាផ្ទៃ និងក្រសួងធនធានទឹក និងឧតុនិយម។
ពលរដ្ឋបានទាមទារអោយកាយដីចេញពីបឹងទួលគោក ឬបឹងឈូក ដែលបានលុបដោយលោកឧកញ៉ា ឈួន គឹមសាន ដែលឃុបឃិតជាមួយមន្រ្តីខេត្ត បានចាក់ដីលុប។
តំណាងប្រជាពលរដ្ឋបានអះអាងប្រហាក់ប្រហែលនៅថ្ងៃអង្គារ ទី៧ ខែកុម្ភៈ ថា បឹងឈូកជាអាងស្តុកទឹកដែលអាចបញ្ជៀសមិនអោយទឹកជន់លិចក្រុងច្បារមន។
ពួកគេបន្តថា ពលរដ្ឋចំនួនភូមិនៅក្នុងសង្កាត់រកាធំ ប្រឈមនឹងផលប៉ះពាល់ធ្ងន់ធ្ងរ ដែលកើតមានដោយសារការលុបបឹងនេះ៖ «គាត់ចាក់អ៊ីចឹងវាលុបផ្លូវទឹកសម្រាប់ហូរចុះពីស្ពាន ឥឡូវគាត់លុបជាង ៥០ភាគរយទៅហើយ អ៊ីចឹងប្រជាពលរដ្ឋត្រូវរងគ្រោះប្រសិនណាបើមានទឹកជំនន់។ លិចលើម្តុំភូមិបើសិនជាទឹកធំ បើលុបអាហ្នឹងលិចច្រាលទៅលើ។ និយាយរួមលិចភូមិប្រជាជនខាងជើងផ្សាកំពង់ស្ពឺ និងលិចស្រែ និយាយរួមផលដំណាំមួយចំនួនធំ។ សំណូមពរប្រសិនបើមានលទ្ធភាពអោយរដ្ឋាភិបាលកាយដី ឈួន គឹមសាន ហ្នឹងចេញរឹតតែអរទៀត ព្រោះអីលុបបឹងប៉ះពាល់ដល់ប្រជាជនច្រើន»។
នៅក្នុងពាក្យបណ្តឹងដដែលបានបញ្ជាក់ថា ការលុបបឹងនេះស្ថិតក្នុងគម្រោងវិនិយោគរបស់លោកឧកញ៉ា ឈួន គឹមសាន និងលោកស្រី លៀង ម៉ាច ភរិយាប្រធានក្រុមប្រឹក្សាខេត្ត លោក យឹម សុខុម។ ក្នុងការកសាងចំណតឡានថ្មីជំនួសអោយទីតាំងចាស់ដែលនៅជាប់នឹងផ្សារកំពង់ស្ពឺ។ បើតាមប្រជាពលរដ្ឋ ចំណតឡានចាស់ដែលជាដីរដ្ឋ នឹងត្រូវអភិវឌ្ឍជាសំណង់ផ្ទះល្វែង។ ចំណែកភាគខ្លះនៃដីដែលបានពីការលុបបឹងនឹងបង្កើតជាចំណតឡានថ្មីជំនួសអោយទីតាំងចាស់ដែលនៅជាប់នឹងផ្សារកំពង់ស្ពឺ។
វិទ្យុអាស៊ីសេរី នៅមិនទាន់អាចសុំការអធិប្បាយពីលោកឧកញ៉ា ឈួន គឹមសាន បាននៅឡើយទេ។
ប្រធានក្រុមប្រឹក្សាខេត្តកំពង់ស្ពឺ លោក យឹម សុខុម មានប្រសាសន៍ថា គម្រោងអភិវឌ្ឍន៍ចំណតឡានថ្មីនេះគឺមានច្បាប់អនុញ្ញាតត្រឹមត្រូវ៖ «អញ្ជើញទៅជួបអភិបាលរងខេត្តទៅដឹងហើយ ថា វាពាក់ព័ន្ធនរណាខ្លះ ហើយត្រូវ ឬខុស ឬមួយក៏យ៉ាងម៉េច។ បើតាមខ្ញុំដឹងវាមានច្បាប់អនុញ្ញាតត្រឹមត្រូវតាំងពីប្រមុខរដ្ឋាភិបាលមករហូត»។
ពាក្យបណ្ដឹងពលរដ្ឋក៏បានចោទប្រកាន់អភិបាលខេត្តកំពង់ស្ពឺ ថា ព្រងើយកន្តើយមិនបានចាត់វិធានការទប់ស្កាត់បញ្ហានេះ។
ឆ្លើយតបនឹងការចោទប្រកាន់ លោក កង ហ៊ាង អភិបាលខេត្តកំពង់ស្ពឺ បញ្ជាក់ថា គម្រោងអភិវឌ្ឍន៍នេះ មានការវិភាគពីផលប៉ះពាល់ និងជំនួយបច្ចេកទេសពីក្រសួងធនធានទឹក និងឧតុនិយម៖ «បញ្ហាចាក់ដីហ្នឹងជារឿងធ្វើទៅតាមច្បាប់របស់គេទេ ដីគេមានប័ណ្ណកម្មសិទ្ធិ។ ការចាក់ដីហ្នឹងបើកាលណាប៉ះពាល់ផ្លូវទឹក គេសុំយោបល់ពីធនធានទឹក។ គេអោយយោបល់មកថា មិនអីទេការចាក់ប៉ុណ្ណឹងៗ ហើយគេប្រាប់រូបមន្តក្នុងការចាក់ ចាក់ហើយអ្នកឯងត្រូវធ្វើអាកន្លែងច្រាំងចាក់អីយ៉ាងម៉េច គេប្រាប់ទាំងអស់ ដើម្បីធានានិយាមកាទឹកនៅរដូវទឹកជំនន់។ គោលបំណងអ្នកតវ៉ាហ្នឹងមិនមែនជារឿងចាក់ទេ គេមិនចង់អោយមានវិនិយោគបេនឡានថ្មី ដែលរដ្ឋាភិបាលបានអោយវិនិយោគហើយ»។
ពលរដ្ឋបានប្តឹងពីការលុបបឹងឈូក ក្នុងក្រុងច្បារមននេះទៅគណៈរដ្ឋមន្រ្តីម្តងរួចមកហើយ កាលពីចុងឆ្នាំ២០១១ ប៉ុន្តែពុំមានដំណោះស្រាយ។ បឹងឈូកជាបឹងធម្មជាតិមានទំហំជាង ៤ហិកតារ ស្ថិតនៅខាងជើងផ្លូវជាតិលេខ៤ ខាងមុខឆៀងខាងកើតផ្សារកំពង់ស្ពឺ។ ពលរដ្ឋចាត់ទុកថា នេះជាគំរូអាក្រក់មួយទៀតចំពោះការលុបបឹងធម្មជាតិ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។