សមត្ថកិច្ចខែត្រកំពង់ធំចាប់ខ្លួនពលរដ្ឋ៣នាក់ក្នុងរឿងជម្លោះដី
ដោយ មុំ សុផុន
2009-11-18
ពលរដ្ឋ៣រូបត្រូវបានសមត្ថកិច្ចខែត្រកំពង់ធំចាប់ខ្លួនកាលពីល្ងាចថ្ងៃ១៧ វិច្ឆិកា បន្ទាប់ពីមានការតតាំងជាមួយកងកម្លាំងប៉េអឹម ទាហាន និងនគរបាលខែត្រនិងស្រុក អំពីការបណ្តេញចេញពីដីរបស់ខ្លួននៅចំណុចបន្ទាយរវាង ឃុំក្រយា ស្រុកសន្ទុក។
លោក អំ សំអាត មន្រ្តីស៊ើបអង្កេតនៃអង្គការសិទ្ធិមនុស្សលីកាដូ បានឲ្យដឹងនៅថ្ងៃទី១៨ វិច្ឆិកាថា ក្រៅពីប្រជាពលរដ្ឋរងរបួសចំនួន៩នាក់ ដោយការប្រើអំពើហិង្សាបង្ខំឲ្យចាកចេញពីដីចម្ការដែលខ្លួនកាន់កាប់ជាច្រើនឆ្នាំមកហើយនោះ គឺមានប្រជាពលរដ្ឋចំនួន៣នាក់ទៀតត្រូវបានសមត្ថកិច្ចចាប់បញ្ជួនដាក់ពន្ធនាគារខែត្រកំពង់ធំ ក្រោមបទចោទប្រកាន់ថា បំផ្លិចបំផ្លាញទ្រព្យសម្បត្តិរបស់ក្រុមហ៊ុនវៀតណាមឈ្មោះតាន់បៀន។
លោក អំ សំអាត បានឲ្យដឹងដូច្នេះ ៖ «សំខាន់បំផុតពួកគាត់ឥឡូវហ្នឹងរស់នៅក្នុងភាពភ័យខ្លាច ដោយសារមានព័ត៌មានពីការចាប់ខ្លួន ហើយនិងដោយសារមានមនុស្ស៣នាក់ត្រូវបានចាប់ខ្លួនហើយ អ៊ីចឹងគឺមនុស្សមួយចំនួន ដែលខាងយើងទទួលបាន កំពុងតែគេចខ្លួនដើម្បីរកកន្លែងសុវត្ថិភាព និងមួយចំនួនទៀតកំពុងតែមានការបារម្ភអំពីសុវត្ថិភាព។ ពួកគាត់ទាំងអស់ហ្នឹងបារម្ភបំផុត គឺខ្លាចនឹងមានការបណ្ដេញចេញបន្តទៀត ហើយអ្វីដែលខ្លាចបំផុត គឺអំពើហិង្សានិងការចាប់ខ្លួនហ្នឹងតែម្ដង»។
លោក អំ សំអាត បានមានប្រសាសន៍បន្តថា ដោយការបង្ខំឲ្យចាកចេញពីដីជម្លោះ និងការប្រើអំពើហិង្សាមកលើប្រជាពលរដ្ឋនិងយោធិនពិការ ដោយវាយដំនឹងកាំភ្លើង និងបាញ់គំរាមផងនោះ គឺប្រជាពលរដ្ឋជាង១.០០០គ្រួសារបានលើកគ្នាតទល់រហូតដល់ដុតគ្រឿងចក្ររបស់ក្រុមហ៊ុនដែលកំពុងឈូសឆាយដីរបស់ពួកគេ។
តាមប្រភពបានឲ្យដឹងទៀតថា ប្រជាពលរដ្ឋទាំងនោះត្រូវបានកងកម្លាំងសមត្ថកិច្ចទាំងនោះកំពុងឡោមព័ទ្ធមិនឲ្យចេញទៅណាទេ ហើយតំណាងរបស់គេកំពុងតែរត់គេចខ្លួន។
លោក អំ សំអាត បានលើកឡើងទៀតថា បើសិនជាភាគីក្រុមហ៊ុន ក៏ដូចជាអាជ្ញាធរខែត្រមានដំណោះស្រាយសមស្របណាមួយនោះ គឺមិនមានបញ្ហាកើតឡើងទេ។
អភិបាលខែត្រកំពង់ធំ លោក ឈុន ឈាន់ បានឲ្យដឹងថា ប្រជាពលរដ្ឋទាំងនោះរស់នៅលើដីដែលរដ្ឋាភិបាលសម្បទានសេដ្ឋកិច្ចឲ្យក្រុមហ៊ុនវៀតណាមឈ្មោះតាន់បៀន ដាំកៅស៊ូលើដីនោះចំនួនជាង៨.០០០ហិកតារ។
ទោះបីជាយ៉ាងក៏ដោយ លោក អំ សំអាត បានឲ្យដឹងថា សមាគមយោធិនពិការ និងប្រជាពលរដ្ឋទាំងនោះបានរស់នៅលើដីទំនាស់នោះ និងមានលិខិតទទួលស្គាល់ពីទីស្តីការគណៈរដ្ឋមន្រ្តីមុនក្រុមហ៊ុនតាន់បៀន ហើយថា ពីមុនក៏មានការទទួលស្គាល់ពីអាជ្ញាធរខែត្រផងដែរ៕
អត្ថបទដែលទាក់ទង
អាជ្ញាធរខេត្តកំពង់ស្ពឺរកដំណោះស្រាយជុំវិញជម្លោះដីនៅស្រុកថ្ពង
ផ្ទះយោធិនពិការនៅកំពង់ស្ពឺ៣ខ្នងត្រូវដុតបំផ្លាញ
អ្នកភូមិនិងប៉ូលិសប៉ះទង្គិចគ្នាក្នុងរឿងជម្លោះដីនៅកំពង់ស្ពឺ
អ្នកភូមិដុតខ្ទមរបស់ក្រុមហ៊ុនលីយ៉ុងផាត់ក្នុងជម្លោះដីនៅកំពង់ស្ពឺ
អ្នកភូមិនៅកំពង់ស្ពឺតវ៉ាទាមទារឲ្យក្រុមហ៊ុនបញ្ឈប់ការឈូសឆាយដី
មេភូមិនៅកំពង់ឆ្នាំងរងការចោទថាយកដីរួមធ្វើជាសម្បត្តិឯកជន
ពលរដ្ឋបាត់បង់ដីធ្លីបួងសួងសុំឲ្យបារមីព្រះអង្គដងកើជួយ
អាជ្ញាធរខែត្រកំពង់ធំតាមចាប់អ្នកភូមិដែលចូលរួមក្នុងការសុំដី
ប្រធានសភាចេញលិខិតអន្តរាគមន៍ក្នុងរឿងទំនាស់ដីនៅបន្ទាយមានជ័យ
អ្នកភូមិ៨៨គ្រួសារតវ៉ាប្រឆាំងនឹងផែនការឈូសឆាយដីរបស់ក្រុមហ៊ុន
មតិ
បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួលនិងអាចចុះផ្សាយបានយោងតាមលក្ខខណ្ឌនៃការប្រើប្រាស់របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរីមិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។
មើលមតិទាំងអស់.