ប្រសាសន៍អំពាវនាវរបស់លោកឯកអគ្គរដ្ឋទូត ស៊ីចាន់ ស៊ីវ បានធ្វើឡើងកាលពីថ្ងៃព្រហស្បតិ៍នៅក្នុងកិច្ចជួបប្រជុំមួយឯទីស្នាក់ការអង្គការក្រៅរដ្ឋាភិបាល ឈ្មោះ Heritage Foundation ដែលមានមនុស្សជាក្រុមសិក្សាស្រាវជ្រាវប្រមាណ៥០នាក់បានចូលរួម។
កិច្ចប្រជុំជាមួយនឹងអ្នកសិក្សាស្រាវជ្រាវឯរដ្ឋធានីវ៉ាស៊ីនតុនឌីស៊ីកាលពីថ្ងៃព្រហស្បតិ៍នោះ គឺនៅស្របពេលដែលលោកបានបង្ហាញសៀវភៅមួយដែលលោកបាននិពន្ធផ្ទាល់រំឭកអំពីជីវិតរបស់លោកដែលព្យាយាមគេចខ្លួនចេញពីរបបខ្មែរក្រហមភៀសមករស់នៅក្នុងសហរដ្ឋអាមេរិក។
សៀវភៅដែលលោកបាននិពន្ធនោះមានឈ្មោះថា ឆ្អឹងមាស Golden Bone ដែលលោកពណ៌នាថា គឺជាប្រសាសន៍របស់អ្នកភូមិ អ្នកស្រុក ដែលបានហៅចំពោះរូបលោក បន្ទាប់ពីលោកអាចគេចរួចជីវិតពីរបបកាប់សម្លាប់ខ្មែរក្រហម ហើយបានមកធ្វើការឲ្យប្រធានាធិបតីសហរដ្ឋអាមេរិកថែមទៀត។
លោក ស៊ីចាន់ ស៊ីវ បានមានប្រសាសន៍ថា ប៉ុល ពត មេដឹកនាំកំពូលរបស់ខ្មែរក្រហមបានស្លាប់កាលពីខែមេសា ឆ្នាំ១៩៩៨ទៅហើយ ហើយការស្លាប់នោះបានធ្វើឲ្យមេខ្មែរក្រហមរូបនោះបានរួចពីការកាត់ទោស។
លោកអំពាវនាវឲ្យមានកិច្ចជំរុញការកាត់ទោសអតីតមេខ្មែរក្រហម៥នាក់ទៀតដែលកំពុងតែជាប់ឃុំឃាំង ៖ "គេគួរតែជំរុញការកាត់ទោសឲ្យបានឆាប់បន្តិច ពីព្រោះថា បើទោះជាប្រជាជនកម្ពុជាជាមនុស្សដែលឆាប់ងាយអត់ឱនទោសក៏ដោយ ប៉ុន្តែក៏មិនអាចបំភ្លេចចំពោះអតីតកាលដែលខ្មែរក្រហមបានធ្វើចំពោះពួកគេនោះទេ"។
លោក ស៊ីចាន់ ស៊ីវ បានថ្លែងថា លោកបានជាប់នៅជាមួយនឹងខ្មែរក្រហមប្រមាណមួយឆ្នាំដែរ ហើយលោកបានរត់ភៀសខ្លួនកាលពីខែកុម្ភៈ ឆ្នាំ១៩៧៦ ដោយបានធ្វើដំណើរ៣ថ្ងៃទើបបានភៀសខ្លួនមកដល់ប្រទេសថៃ។ នៅខែមិថុនា ឆ្នាំដដែល លោកក៏បានមកដល់សហរដ្ឋអាមរិក។
ពីកម្ពុជាឯណោះវិញ មន្រ្តីអ្នកនាំពាក្យសាលាក្ដីខ្មែរក្រហម លោក រាជ សម្បត្តិ បានថ្លែងថា គេកំពុងតែជំរុញកិច្ចការកាត់ទោសនោះយ៉ាងក្រៃលែង។
លោក រាជ សម្បត្តិ បានមានប្រសាសន៍ថា ៖ «ការកាត់ទោសដំបូងហ្នឹង គឺតុលាការគ្រោងធ្វើទៅលើលោក កាំង ហ្កិចអ៊ាវ ហៅ ឌុច ដែលគាត់ជាអតីតប្រធានមន្ទីរឃុំឃាំង ស២១ ឬក៏ហៅថា គុកទួលស្លែង ហើយការធ្វើនេះគឺគ្រោងធ្វើនៅក្នុងឆ្នាំ២០០៩ហ្នឹង គឺនៅក្នុងខែមករា»។
លោក រាជ សម្បត្តិ បានឲ្យដឹងទៀតថា ថ្ងៃកាត់ទោសនៅមិនទាន់បានកំណត់ពិតប្រាកដទេ ប៉ុន្តែលោកថាក្រុមមន្រ្តីដែលរៀបចំនឹងធ្វើកិច្ចប្រជុំគ្នាមួយនៅពេលខាងមុខនេះដើម្បីសម្រេចថ្ងៃកាត់ទោសរបស់ឌុច នៅក្នុងខែមករា ឆ្នាំ២០០៩នោះ៕