ពិធីបុណ្យអុំទូកនេះគឺបានចាប់ផ្តើមធ្វើឡើងតាំងពីឆ្នាំ១៩៩៧មក។
អ្នកស្រី មឿង ទុម បានសាកសួរព័ត៌មានពីលោក សាយ័ន្ត សឿន ប្រធានគណៈកម្មការបុណ្យអុំទូកស្តីពីពិធីបុណ្យនៅទីក្រុងឡូវែលនោះ៖
មឿង ទុម ៖ គណៈកម្មការលោករៀបចំបុណ្យអុំទូកហ្នឹងធ្វើឡើងប៉ុន្មានថ្ងៃ? សាយ័ន្ត សឿន ៖ កម្មវិធីបុណ្យអុំទូកហ្នឹងគឺមាន២ថ្ងៃ ចាប់ផ្ដើមពីថ្ងៃសុក្ររហូតដល់ថ្ងៃសៅរ៍។
មឿង ទុម ៖ បានន័យថា ថ្ងៃសៅរ៍ ទី១៥ ខែសីហា ឆ្នាំ២០០៩នេះ? សាយ័ន្ត សឿន ៖ បាទៗ។
មឿង ទុម ៖ តើទូកមានចំនួនប៉ុន្មានដែរដែលចូលរួមក្នុងកម្មវិធីហ្នឹង?
សាយ័ន្ត សឿន ៖ ទូកចូលរួមក្នុងកម្មវិធីឆ្នាំនេះមាន១០ក្រុម។ មានក្រុមខ្មែរក្រោម មានក្រុមខាងថៃ លាវ ក្រុមអាមេរិកាំងស្បែកស។ ទូកទាំងអស់មានតែទូក២ទេ ម្ល៉ោះហើយយើងប្រណាំងម្ដង២ក្រុម ប៉ុន្តែក្រុមចូលប្រឡងហ្នឹងមាន១០ក្រុម។
មឿង ទុម ៖ ក្រៅពីអុំទូក តើមានអ្វីបន្ថែមលម្អដល់កម្មវិធីបុណ្យនោះទេ?
សាយ័ន្ត សឿន ៖ យើងមានកីឡាមួយ គេហៅខាងទាត់សី... ខ្មែរយើងទាត់សីធ្វើពីឫស្សី ប្រើជើងនិងក្បាល។ ក្រៅពីហ្នឹងទៀតយើងមានក្រុមសម្ដែងដូចរបាំរាំជូនពរមកពីគ្រប់សាសន៍ សាសន៍ខ្មែរយើង សាសន៍ថៃ សាសន៍លាវ ហើយក្នុងក្រុមជាមួយគ្នានោះដែរ យើងមានយុវវ័យមកសម្ដែងជាការរាំរែកនៅក្នុងសម័យនេះ ហើយក៏មានភ្លេងបុរាណយើងលេងដែរ។ ជាមួយគ្នាហ្នឹងដែរ យើងមានខាងប្រឡងបវរកញ្ញាបុណ្យអុំទូកជាឆ្នាំទី២ហើយដែលយើងធ្វើហ្នឹង។
មឿង ទុម ៖ តើបវរកញ្ញាបេក្ខជនប៉ុន្មានរូបដែរ? សាយ័ន្ត សឿន ៖ គឺមាន១០ បេក្ខជនមកពីឡូវែលយើង មកពីប្រទេសកាណាដា ហើយនិងមកពីរដ្ឋផ្សេងៗទៀតនៅសហរដ្ឋអាមេរិកនេះ។
មឿង ទុម ៖ តើកម្មវិធីបុណ្យអុំទូកនេះមានសារសំខាន់អ្វីសម្រាប់ពលរដ្ឋខ្មែរដែលរស់នៅសហរដ្ឋអាមេរិកនោះ?
សាយ័ន្ត សឿន ៖ សារសំខាន់ហ្នឹង គឺយើងធ្វើដើម្បីឲ្យបងប្អូនយើងមកជួបជុំគ្នាក្នុងមួយឆ្នាំម្ដង ជួបជុំក្រុមគ្រួសារ។ ប្រជាជនដែលមកចូលរួមបុណ្យអុំទូកហ្នឹង មិនមែនតែមកត្រឹមតែពីសហរដ្ឋអាមេរិកទេ មានមកពីបារាំង កាណាដា ខ្មែរយើងមកពីខាងអូស្រ្ដាលី ហើយនិងពីប្រទេសផ្សេងៗទៀត ក្នុងមួយឆ្នាំៗប្រជាជនដែលមកលេងនៅក្នុងបុណ្យអុំទូកហ្នឹងមានប្រហែលជា៤ទៅ៥ម៉ឺននាក់។ ឆ្នាំនេះខ្ញុំប៉ាន់ស្មានមើលប្រហែលជាមាន៤ម៉ឺននាក់៕