គណៈកម្មាធិការព្រំដែនកម្ពុជា ដែលមានទីស្នាក់ការនៅប្រទេសបារាំង បានចេញសេចក្ដីប្រកាសព័ត៌មានកាលពីពេលថ្មីៗនេះ បានឲ្យដឹងថា សហគមន៍ខ្មែរទាំងនោះរួមមាន គណៈកម្មាធិការព្រំដែនកម្ពុជា សម្ព័ន្ធខ្មែរការពារសិទ្ធិមនុស្ស និងសិទ្ធិបុរីជន សហព័ន្ធខ្មែរកម្ពុជាក្រោម គណបក្ស សម រង្សី ប្រចាំប្រទេសបារាំង គណបក្សសិទ្ធិមនុស្ស ប្រចាំប្រទេសបារាំង និងសមាជិកជាច្រើនទៀតនៃសហគមន៍ខ្មែរនៅប្រទេសបារាំង គ្រោងនឹងរួមគ្នាធ្វើបាតុកម្មនោះ នៅថ្ងៃអាទិត្យ ទី២៤ ខែតុលា ឆ្នាំ២០១០ ចាប់ពីម៉ោង ២រសៀល នៅឯទីលានសិទ្ធិមនុស្ស ឌ្រូកាដេរ៉ូ ក្នុងទីក្រុងប៉ារីស ប្រទេសបារាំង។
សហគមន៍ខ្មែរទាំងនេះធ្វើបាតុកម្មក្នុងបំណងទាមទារឲ្យរដ្ឋាភិបាលកម្ពុជា វៀតណាម ថៃ និងប្រទេសហត្ថលេខីទាំងអស់ ពិនិត្យ និងសើរើឡើងវិញចំពោះការអនុវត្តកិច្ចព្រមព្រៀងក្រុងប៉ារីសនេះ ដើម្បីឲ្យមានការគោរព និងអនុវត្តឲ្យបានត្រឹមត្រូវជាទីបំផុត។
បាតុកម្មរបស់ខ្មែរនៅប្រទេសបារាំងនោះ នឹងធ្វើឡើងក្នុងឱកាសដែលកិច្ចព្រមព្រៀងក្រុងប៉ារីស ឆ្នាំ១៩៩១ ស្ដីពីកម្ពុជា ឈានគម្រប់ខួប ១៩ឆ្នាំ៕