លោក កុយ គួង អនុរដ្ឋលេខាធិការនិងជាអ្នកនាំពាក្យក្រសួងការបរទេសកម្ពុជា បានឲ្យដឹងថា លោក ហោ ណាំហុង ឧបនាយករដ្ឋមន្រ្តីនិងជារដ្ឋមន្រ្តីក្រសួងការបរទេសកម្ពុជា នឹងដឹកនាំគណៈប្រតិភូកម្ពុជាមួយក្រុមទៅចូលរួមកិច្ចប្រជុំជាមួយប្រទេសលាវនេះ។
លោក កុយ គួង មានប្រសាសន៍ដូច្នេះ ៖ «កិច្ចប្រជុំគណៈកម្មការចម្រុះលើកទី១១នៅទីក្រុងវៀងច័ន្ទ ជាកិច្ចប្រជុំសម្រាប់កិច្ចសហប្រតិបត្តិការទ្វេភាគីរវាងកម្ពុជា-លាវ ហើយផ្ដោតទៅលើវិស័យទូទៅ។ សរុបទាំងអស់គឺរឿងបញ្ហាព្រំដែនជាបញ្ហាមួយនៅក្នុងបញ្ហាទូទៅហ្នឹងឯង គឺយើងគ្រាន់តែពង្រឹងនិងពង្រីកឲ្យកិច្ចសហការហ្នឹងឲ្យកាន់តែទូលំទូលាយ ឲ្យកាន់តែស៊ីជម្រៅថែមទៀត ហើយពិភាក្សាអំពីអ្វីដែលមានបញ្ហាកន្លងមក និងកំណត់ទិសដៅទៅឆ្នាំខាងមុខនេះទៀត»។
មន្រ្តីក្រសួងការបរទេសកម្ពុជា បានឲ្យដឹងថា កិច្ចប្រជុំប្រចាំឆ្នាំរវាងកម្ពុជាជាមួយលាវ ភាគច្រើនផ្តោតទៅលើពាណិជ្ជកម្មឆ្លងដែន ការវិនិយោគរវាងប្រទេសទាំងពីរ ការទប់ស្កាត់ការជួញដូរគ្រឿងញៀននិងឧក្រិដ្ឋកម្មឆ្លងដែន និងកិច្ចសហការលើវិស័យវប្បធម៌ជាដើម។
ប្រទេសកម្ពុជាជាមួយប្រទេសលាវ មានព្រំដែនរួមគ្នាប្រវែង៥៤០គីឡូម៉ែត្រ។
សន្និបាតបូកសរុបការងារព្រំដែនរបស់អាជ្ញាធរជាតិទទួលបន្ទុកព្រំដែន កាលពីថ្ងៃទី៣០ ធ្នូ ឆ្នាំ២០០៩កន្លងមក បានឲ្យដឹងថា ចាប់ពីឆ្នាំ២០០០ មកដល់ឆ្នាំ២០០៥ កម្ពុជាជាមួយលាវ បានត្រួតពិនិត្យខ្សែព្រំដែនរវាងប្រទេសទាំងពីរបាន៤៦៥គីឡូម៉ែត្រ និងសាងសង់បង្គោលបានចំនួន ១២១បង្គោលក្នុងចំណោមបង្គោលដែលត្រូវសាងសង់ទាំងអស់ចំនួន១៤៥បង្គោល៕