សមាគមការពារសិទ្ធិមនុស្សប្រចាំខេត្តកំពត នៅថ្ងៃច័ន្ទ ១១ មករានេះ បានទាមទារឲ្យអាជ្ញាធរខ្មែរផ្តល់យុត្តិធម៌ឲ្យបុរសខ្មែរម្នាក់ដែលត្រូវគេសង្ស័យថា ត្រូវជនជាតិវៀតណាមវាយសម្លាប់កាលពីប៉ុន្មានថ្ងៃមុន នៅគ្រាដែលបុរសរូបនោះបានចូលទៅក្នុងទឹកដីវៀតណាមដើម្បីធ្វើកម្មករសំណង់។
អ្នកស្រី ទ្រី ឈូន មន្ត្រីសិទ្ធិមនុស្សអាដហុក បានបញ្ជាក់ថា ការស្លាប់នោះមិនមែនចៃដន្យឡើយ។ អ្នកស្រីគិតថា វាទាក់ទងនឹងអំពើឃាតកម្មយ៉ាងច្បាស់លាស់ បើសិនជាមិនដោះស្រាយបញ្ហានេះទេនោះ ការឈឺចាប់នឹងការរើសអើងពូជសាសន៍នឹងបន្តកើតឡើងគ្មានពេលឈប់។
អ្នកស្រី ទ្រី ឈូន មានប្រសាសន៍ដូច្នេះ ៖ «ជារឿងរំលោភសិទ្ធិមនុស្សមួយដ៏ធំណាស់។ ហេតុអីបានខ្ញុំយល់ឃើញអ៊ីចឹង? ដោយសារថា ប្រវត្តិសាស្រ្ដខ្មែរយើងជាមួយវៀតណាមវារអូមរអាមយូរហើយ។ ដោយសារតែមិនផ្ដល់យុត្តិធម៌ឲ្យពលរដ្ឋទាំងសងខាងនេះ ធ្វើឲ្យមានការរើសអើងពូជសាសន៍កាន់តែខ្លាំងទៅ»។
ប្រភពពីក្រុមអ្នកការពារសិទ្ធិមនុស្សដដែលបានអះអាងថា បុរសខ្មែររូបនោះឈ្មោះ ថន បាន អាយុ២៤ឆ្នាំ រស់នៅក្នុងភូមិកោះចំការ ឃុំបឹងសាលាខាងត្បូង ស្រុកកំពង់ត្រាច ខេត្តកំពត តែងបានជិះកង់ចូលទៅធ្វើជាកម្មករសំណង់នៅក្នុងទឹកដីវៀតណាមជារៀងរាល់ថ្ងៃ។
នៅថ្ងៃ៧ មករា កន្លងទៅថ្មីៗនេះ នៅវេលាដែល ថន បាន និងមិត្តភក្ដិរបស់ខ្លួនបានត្រឡប់មកពីធ្វើការវិញ វេលាប្រហែលម៉ោង១០យប់ តាមផ្លូវក្នុងស្រុកហាទៀង ខេត្តគានយ៉ាង ប្រទេសវៀតណាម ក៏បានជួបនឹងគ្រោះថ្នាក់ចរាចរណ៍មួយ ដោយត្រូវម៉ូតូជនជាតិវៀតណាមបុកខ្ទេចកង់។ នៅក្រោយគ្រោះថ្នាក់នោះ ជនជាតិវៀតណាមមានគ្នាជាច្រើននាក់ដេញមកតាមពីក្រោយ។ ថន បាន និងមិត្តភក្ដិក៏នាំគ្នាលីកង់រត់បែកផ្លូវគ្នា។ មកដល់ផ្ទះក្នុងទឹកដីខ្មែរវិញ គេមិនបានឃើញ ថន បាន មកវិញទេ ប៉ុន្តែរហូតមកដល់ថ្ងៃសៅរ៍មុននេះ ទើបគេប្រទះឃើញសាកសព ថន បាន អណ្តែតទឹក ដោយមានក្រុមអ្នកភូមិនិងក្រុមពេទ្យវៀណាម បានរកឃើញថា ថន បាន បាក់ធ្មេញមុខអស់រលីង មានស្នាមជាំនៅកផ្នែកខាងក្រោយនិងមានស្នាមជាំនៅលើដើមទ្រូង។
លោក អ៊ុន ខេត មេឃុំសាលាខាងត្បូង បានថ្លែងថា លោកក៏កំពុងជំរុញឲ្យមានការដោះស្រាយរឿងនេះដែរ ៖ «ឥឡូវហ្នឹងវៀតណាមនិងខ្មែរយើងកំពុងតែចរចាគ្នា ពិភាក្សាគ្នាអំពីរឿងហ្នឹង។ ខ្ញុំកំពុងរកហេតុផលហ្នឹងដែរ»។
ប្រជាពលរដ្ឋម្នាក់ដែលរស់នៅក្នុងភូមិជាមួយ ថន បាន បានសម្ដែងថា ថន បាន ច្បាស់ជាត្រូវជនជាតិវៀតណាមវាយសម្លាប់។ លោកសុំឲ្យអាជ្ញាធរខ្មែរការពារពលរដ្ឋខ្មែរយ៉ាងដូច្នេះ ៖ «ខ្ញុំសូមឲ្យសមត្ថកិច្ចគ្រប់ជាន់ថ្នាក់ ជាពិសេសថ្នាក់ដឹកនាំទាំងប្រទេសខ្មែរ ក៏ដូចជាប្រទេសវៀតណាមដែរ ធ្វើយ៉ាងណាការពារយុត្តិធម៌ឲ្យជនស្លូតត្រង់ផង ជនក្រីក្រផង»។
គួរជម្រាបជូនថា កាលពីឆ្នាំមុនមន្ត្រីជលផលខ្មែរម្នាក់ត្រូវបានទាហានវៀតណាមបាញ់សម្លាប់ នៅគ្រាដែលមន្ត្រីរូបនោះបានចូលទៅអន្តរាគមន៍ចាប់ជនជាតិវៀតណាម ដែលចូលមកនេសាទក្នុងដែនសមុទ្រខ្មែរ។
រហូតមកដល់ពេលនេះ គេនៅមិនទាន់ឮថា រឿងនោះមានការដោះស្រាយយ៉ាងណានៅឡើយទេ៕