មន្ត្រីយោធាជាន់ខ្ពស់ខ្មែរបានឲ្យដឹងថា គេបានចាប់ផ្តើមប្រើកម្លាំងយោធានិងអាវុធស្វ័យប្រវត្តិចាប់ភ្ជាប់លើរថយន្តចល័តមួយចំនួនដើម្បីធ្វើយុទ្ធនាការតាមបង្រ្កាបយ៉ាងតឹងរ៉ឹងទៅលើក្រុមអ្នកកាប់ឈើនិងពួកឈ្មួញដឹកជញ្ជូនឈើធ្វើអាជីវកម្មខុសច្បាប់នៅតាមតំបន់ព្រំដែនក្នុងរយៈពេលជាង២សប្តាហ៍កន្លងមកនេះ។
អគ្គបញ្ជាការរងនៃកងយោធពលខេមរភូមិន្ទដែលកំពុងគ្រប់គ្រងយោធាខ្មែរនៅតំបន់ព្រំដែនជុំវិញប្រាសាទព្រះវិហារលោកឧត្តមសេនីយ៍ ជា តារា បានមានប្រសាសន៍កាលពីព្រឹកថ្ងៃពុធ ទី៣ ខែកុម្ភៈ ថា លោកបានរៀបចំកម្លាំងកងទ័ពដែលកំពុងការពារនៅតាមព្រំដែនឲ្យធ្វើការបង្រ្កាបទៅលើក្រុមអ្នកកាប់ឈើនិងឈ្មួញដឹកឈើធ្វើអាជីវកម្មខុសច្បាប់ ចាប់ពីតំបន់ព្រំដែននៃខេត្តព្រះវិហាររហូតដល់តំបន់ព្រំដែនខេត្តឧត្តរមានជ័យ។
លោក ជា តារា បានមានប្រសាសន៍ថា ឲ្យតែបទល្មើសកាប់និងដឹកជញ្ជូនឈើកើតឡើងនៅតំបន់ណា គឺលោកនឹងបញ្ជាទៅកងទាហាននៅក្បែរនោះឲ្យបង្រ្កាបភ្លាមៗ។ លោកឧត្តមសេនីយ៍ ជា តារា បានមានប្រសាសន៍ថា កម្លាំងចល័តមួយក្រុមរបស់លោកបានរៀបចំអាវុធស្វ័យប្រវត្តិតាមរថយន្តចល័តមួយចំនួនផងដែរក្នុងការតាមបង្រ្កាបទៅលើអាជីវកម្មខុសច្បាប់ណាដែលមានទ្រង់ទ្រាយធំ។
លោក ជា តារា មានប្រសាសន៍ដូច្នេះ ៖ «បទល្មើសវានៅតំបន់ណាគឺយើងហៅកម្លាំងក្បែរហ្នឹងអនុវត្តភ្លាម មានប្រសិទ្ធភាពណាស់។ អនុវត្តបទបញ្ជារបស់សម្តេចតេជោក្នុងការបង្រ្កាបបទល្មើសព្រៃឈើដែលអ្នកណាក៏ដោយ ក្នុងរូបភាពណាក៏ដោយ ឲ្យតែបំផ្លាញព្រៃឈើត្រូវបានបង្ក្រាប។ ចំពោះមុខយើងរកអ្នកល្មើសធំៗ ផ្ទាល់ដៃ ល្មើសធំដុំគឺត្រូវតែបង្រ្កាបរូបភាពណាក៏ត្រូវបង្រ្កាបដែរ»។
លោកឧត្តមសេនីយ៍ ជា តារា បានឲ្យដឹងថា បន្ទាប់ពីការបង្រ្កាបមួយរយៈនៅមានការកាប់និងដឹកជញ្ជូនឈើធ្វើអាជីវកម្មខុសច្បាប់ជារូបភាពតូចៗកំពុងគេចធ្វើសកម្មភាពនៅឡើយដែលកងទាហានបង្រ្កាបកំពុងតាមរក។
ចំណែកនៅឯតំបន់ស្រុកត្រពាំងប្រាសាទ ខេត្តឧត្តរមានជ័យ ដែលតែងមានប្រជាពលរដ្ឋខ្មែរលួចឆ្លងដែនចូលទៅកាប់ឈើគ្រញូងមកលក់ឲ្យឈ្មួញ ហើយត្រូវទាហានថៃបានស្លាប់និងរងរបួសជាហូរហែកន្លងមក ឥឡូវមានសេចក្តីរាយការណ៍ថា បានស្ងប់ស្ងាត់ការលួចឆ្លងដែនទៅកាប់ឈើនោះហើយ។
អភិបាលស្រុកត្រពាំងប្រាសាទ លោក វណ្ណ កុសល បានមានប្រសាសន៍ថា តំបន់របស់លោកបានស្ងប់ស្ងាត់សកម្មភាពប្រជាពលរដ្ឋនាំគ្នាលួចឆ្លងដែនទៅកាប់ឈើក្នុងទឹកដីថៃមកលក់ឲ្យឈ្មួញនោះ ក៏ប៉ុន្តែនៅមានអ្នកមកពីឆ្ងាយលបលួចឆ្លងដែនកាប់ឈើម្តងម្កាលដែរ។
លោក វណ្ណ កុសល បានឲ្យដឹងដូច្នេះថា ៖ «តាំងពីកងកម្លាំងអគ្គបញ្ជាការជួយចុះបង្រ្កាបមក កងកម្លាំងប្រដាប់អាវុធក៏គាត់ខំពង្រឹងតាមខ្សែបន្ទាត់ព្រំដែនទៅ ឥឡូវហ្នឹងគឺជ្រៀតចូលលែងរួចហើយ។ វាធូរស្រាលជាងមុនច្រើនមែនទែន»។
សមាគមការពារសិទ្ធិមនុស្សអាដហុក បានចេញរបាយការណ៍កាលពីពេលថ្មីថា ចាប់តាំងពីពាក់កណ្តាលឆ្នាំ២០០៨ រហូតដល់ខែកុម្ភៈ ឆ្នាំ២០១០ គឺមានប្រជាពលរដ្ឋខ្មែរតាមជាយដែនចំនួន១០នាក់ ត្រូវទាហានថៃបាញ់សម្លាប់ដោយចោទប្រកាន់ថា បានឆ្លងដែនចូលទៅកាប់ឈើក្នុងទឹកដីថៃខុសច្បាប់។
លោក ហ៊ុន សែន នាយករដ្ឋមន្ត្រីនៃរាជរដ្ឋាភិបាលខ្មែរ កាលពីថ្ងៃទី៦ ខែកុម្ភៈ កន្លងមក ក្នុងពេលដែលលោកអញ្ជើញទៅបើកសម្ពោធបន្ទាយយោធាកងពលធំអន្តរាគមន៍លេខ៣ជិតប្រាសាទព្រះវិហារបានព្រមានចំពោះការកាប់ឈើនិងដឹកជញ្ជូនធ្វើអាជីវកម្មខុសច្បាប់ ដោយលោកបានបញ្ជាឲ្យកងទាហានបង្រ្កាបការកាប់ឈើខុសច្បាប់នៅតាមតំបន់ព្រំដែនទាំងនោះ៕