ប្រតិកម្មបដិសេធនេះបានធ្វើឡើងបន្ទាប់ពីកាសែតថៃ The Nation ផ្សព្វផ្សាយថា លោក ថាក់ស៊ីន អតីតនាយករដ្ឋមន្ត្រីថៃដែលត្រូវថៃបណ្តេញចេញពីមុខតំណែងកំពុងលាក់ខ្លួននៅប្រទេសកម្ពុជា និងថា កំពុងបញ្ជាក្រុមអាវក្រហមយ៉ាងពេញទំហឹង។
លោក កុយ គួង មានប្រសាសន៍បន្តថា បើសិនលោក ថាក់ស៊ីន នៅក្នុងប្រទេសកម្ពុជាមែននោះ កម្ពុជាគ្មានអ្វីដែលត្រូវលាក់លាមឡើយ ព្រោះលោក ថាក់ស៊ីន ជាទីប្រឹក្សាផ្នែកសេដ្ឋកិច្ចរបស់ប្រទេសកម្ពុជា និងជាទីប្រឹក្សារបស់លោក ហ៊ុន សែន នាយករដ្ឋមន្រ្តីកម្ពុជាផង។
លោក កុយ គួង បានមានប្រសាសន៍ថា ៖ «ខ្ញុំសូមបញ្ជាក់ថា សម្ដេចតេជោ នាយករដ្ឋមន្ត្រី ហ៊ុន សែន លោកធ្លាប់បានលើកឡើងហើយថា ដំណើរចេញចូលរបស់ឯកឧត្ដម ថាក់ស៊ីន មកកម្ពុជា គឺជារឿងមិនមានភាពសម្ងាត់ ឬក៏លាក់កំបាំងអ្វីទេ។ គឺថា រាល់ពេលឯកឧត្ដមចេញចូលប្រទេសកម្ពុជាតែងតែបង្ហាញតាមកញ្ចក់ទូរទស្សន៍ តាមបណ្ដាញសារព័ត៌មាន តាមវិទ្យុ គឺគ្រប់ទាំងអស់ ដោយសារឯកឧត្ដមជាទីប្រឹក្សាផ្ទាល់របស់សម្ដេចតេជោផង ទីប្រឹក្សាសេដ្ឋកិច្ចរបស់រាជរដ្ឋាភិបាលកម្ពុជាផង។ ដូច្នេះមកដល់ពេលនេះគឺឯកឧត្ដម ថាក់ស៊ីន មិនមានវត្តមាននៅក្នុងប្រទេសកម្ពុជាទេ។ ដូច្នេះការលើកឡើងរបស់កាសែត The Nation ថ្មីៗនេះ Online (តាមប្រព័ន្ធអ៊ិនថឹណិត) នេះ គឺជារឿងមិនពិតទាល់តែសោះ! ដូច្នេះហើយចំពោះព័ត៌មាននេះ ក្រសួងការបរទេសកម្ពុជាសូមធ្វើការបដិសេធយ៉ាងដាច់អហង្ការ»៕