រដ្ឋមន្ត្រីប្រតិភូអមនាយករដ្ឋមន្ត្រី លោក ស្រ៊ី ថាមរង្គ មិនបានបញ្ជាក់ថាតើនាយករដ្ឋមន្ត្រីនៃប្រទេសទាំងពីរអាចនឹងពិភាក្សាគ្នាលើបញ្ហាជម្លោះព្រំដែនឬយ៉ាងណានោះទេ។
លោក ស្រី ថាមរង្គ មានប្រសាសន៍ដូច្នេះថា ៖ «កន្លងមកនេះ មិនទាន់មានកម្មវិធីទេ ក៏ប៉ុន្តែយើងដឹងថា ក្នុងកិច្ចប្រជុំវាមានពេលសម្រាក បាយការងារ វាមានជប់លៀង ដូច្នេះវាជៀសមិនផុត ហើយយើងឃើញថា វាមិនមានបញ្ហាអ្វីទេ ព្រោះថា កន្លងមក ការងារនៅព្រំដែន យើងឃើញថា មានសភាពការណ៍ល្អប្រសើរណាស់ សភាពការណ៍មិនមានអីគួរឲ្យបារម្ភដូចលើកមុនទេ។ យ៉ាងហោចណាស់ ក៏មានការជួបគ្នាជជែក ប៉ុន្តែគ្រាន់តែថា កម្មវិធីជួបដោយឡែក យើងអត់ទាន់មានទេ»។
នាយករដ្ឋមន្ត្រីខ្មែរ លោក ហ៊ុន សែន និងលោកនាយករដ្ឋមន្ត្រីថៃ ស៊ុមឆៃ វង់សាវ៉ាត់ ធ្លាប់បានជួបប្រជុំក្រៅផ្លូវការម្ដងរួចមកហើយនៅទីក្រុងប៉េកាំង ហើយភាគីទាំងពីរបានតាំងចិត្តថា នឹងការពារមិនឲ្យមានការផ្ទុះអាវុធដាក់គ្នានៅព្រំដែននោះឡើយ។
ក្រសួងការបរទេសខ្មែរបានឲ្យដឹងកាលពីថ្ងៃអាទិត្យផងដែរថា មន្ត្រីគណៈកម្មការព្រំដែនគោកកម្ពុជា-ថៃនឹងជួបប្រជុំពិសេសនៅថ្ងៃទី១០ និង ១១ វិច្ឆិកា នៅខេត្តសៀមរាប ហើយរដ្ឋមន្ត្រីការបរទេសនៃប្រទេសទាំងពីរ គឺលោក ហោ ណាំហុង និងលោក សំភុង អៈម៉នវីវ៉ាត់ នឹងជួបប្រជុំនៅថ្ងៃទី១២ វិច្ឆិកា ដើម្បីជំរុញល្បឿននៃការកំណត់ព្រំដែននៃប្រទេសទាំងពីរ។
ជុំវិញជម្លោះព្រំដែនកម្ពុជា-ថៃ គេសង្កេតឃើញថា នៅមុនការចរចារាល់លើករវាងភាគីទាំងពីរ រដ្ឋាភិបាលថៃតែងតែបានសុំការអនុម័តពីរដ្ឋសភា តែភាគីខ្មែរត្រូវបានគេមើលឃើញថា បានព្រងើយកន្តើយចំពោះស្ថាប័នកំពូលរបស់រដ្ឋនេះ។
តំណាងរាស្ត្រគណបក្សប្រឆាំងលោក សុន ឆ័យ បានឲ្យដឹងថា រដ្ឋាភិបាលមិនមានភាពម៉ឺងម៉ាត់ក្នុងការដោះស្រាយវិវាទព្រំដែន ហើយថា រដ្ឋាភិបាលបានមើលរំលងស្ថាប័នព្រះមហាក្សត្រនិងរដ្ឋសភាក្នុងការដោះស្រាយវិវាទព្រំដែន។
លោក សុន ឆ័យ មានប្រសាសន៍ដូច្នេះថា ៖ «ព្រះមហាក្សត្រលោកទទួលខុសត្រូវកំពូល រាជរដ្ឋាភិបាលត្រូវតែរាយការណ៍ថ្វាយព្រះមហាក្សត្រលើបញ្ហាអធិបតេយ្យ បូរណភាពទឹកដីនេះ គឺរាយការណ៍និងសុំរាជយោបល់ពីមហាក្សត្រ ហើយរាល់ការសម្រេចព្រមព្រៀងណាក៏ដោយ ត្រូវតែមានការអនុម័តយល់ព្រមពីសភាដូចគ្នា។ ប៉ុន្តែយើងសង្កេតឃើញថា កន្លងទៅ រដ្ឋាភិបាលហាក់ដូចជាមិនបានគោរពស្ថាប័នដទៃទេ ដូចជាស្ថាប័នព្រះមហាក្សត្រ ក៏ដូចជាស្ថាប័នសភា»។
លោក សុន ឆ័យ បានបន្តថា លោកនឹងសរសេរលិខិតអញ្ជើញនាយករដ្ឋមន្ត្រីឲ្យមកបំភ្លឺនៅរដ្ឋសភាជុំវិញមូលហេតុដែលរដ្ឋាភិបាលមិនព្រមរាយការណ៍ពីបញ្ហាជម្លោះព្រំដែនទៅស្ថាប័នអន្តរជាតិ។
ជម្លោះព្រំដែនកម្ពុជា-ថៃបានធ្វើឲ្យមានការប៉ះពាល់យ៉ាងខ្លាំងដល់ទំនាក់ទំនងរវាងប្រទេសទាំងពីរ នៅពេលដែលមានការផ្ទុះអាវុធដាក់គ្នា ដែលបណ្ដាលឲ្យទាហានខ្មែរ ៣នាក់និងទាហានថៃម្នាក់ស្លាប់បាត់បង់ជីវិត៕